Jacques 3 - Kálara Zyɛ̌m Edwán é mpʉ̌n

Baʼla ga mɨnʉm min lé elɛɛ bɨsa ndɨ ambɨa ɛ!

¹ Obɨɔ ga bam aa! Yé ajala ó, buobuo bʉr o mbɛr Zyɛm win yeʼla mɨlɔb mo Zyɛm. Bɨn bé egʉa ó, é jɔʼ Zyɛm ótiʼe bɨh bɛɛ oyeʼle mɨlɔb ɨ, nye ótiʼe mye ó, e ncɨr é leme, abe mpʉ nye ótiʼe myaa mɨ bʉʉ bʉr ɨ.

² Bɨna ga bɨbɛh, bé esa ga mobebe, mɨmbi mimyɛh. Mʉr ndɨ abe lé esa ebebe é jɔʼ nye lé elwib ɨ, nyi kumo é l'ombɨmbɨa é mɨpaʼ mimyɛh. Nye ó e nkul ebaʼle nyʉl we, nye l'aka sa tʉa e syɛɛla ebebe.

³ Bɨna bé efwam ga bɨnkoho é mɨnʉm bɨkabala ó, byé saʼ bɨna ga mojoʼo. É mbi waa ó bɨna lé ecen ga monyʉl mɔɔ nko bɨna lé egwɨm to ga ɛ.

⁴ Yʉʉ dweʼle, yé ó titima nɨnɨ. Yé dam bwaʼ yáa bim, nkuo dam kuulo e wáa nkul, yé e ma nkɔb nɛra é ndʉa pihe ndɨ ecen ye nko ndul titima lé ekpɛl to e.

⁵ Jɨm mo mʉr, yé ó no. Yé dam twaʼbe, yé ó e nkul etwɨna é bɨsa bɨnɨnɨ yé lé esa ɛ. Ndwe nteme, bwaʼbwaʼ ekomo e diʼ, lé e nkul ediʼe ebe ma da e siʼe titia.

⁶ Yé ó kʉ be cyecye ó, jɨm, yé ó mpʉ siʼe! Bɨsyɛɛla bɨ ozyɛhozyɛh bibyɛh, byé eduho ó tɨ. Dia jɨm lé edi é bɨfum bɨ nyʉl mʉr ɨ, yé esa ó, bana kʉ lœʼ kubo mʉr wiwɛh ntinɨ. Jɨm, yé é bul nara siʼe é jɔʼ siʼe yaa, yé ó yaa lé eduho é Bɨ-siʼe e.

⁷ Yé dam be wáa mbi tir, wáa mbi nɔn, nkʉ fu, nkʉ nyʉa, bʉr, bé egba bibyɛh é jwɨɨ yɔɔ.

⁸ Sa gwar, abe e mʉr ngwar ndɨ si pa mɛr nʉm we ó, wé l'ayi lɛɛ sa ebebe. Jɨm mʉr, yé é laŋle bebe! Yé nteme, yé ó lwɨŋla e ful apurapura.

⁹ Jɨm bɨna lé eseʼle ga Zyɛm Sɔŋ ga wina e tɨʼ ɨ, yé nteme ó bɨna lé esyɛm ga mɨɔ ga wina mʉr e tɨ. To kœb ó, Zyɛm a cye mʉr waa ó, nye nwɨɨla e nye mʉr tɨ.

¹⁰ Nʉm ngwar waa, wé epyɛl bɨkɔ́ɔlʉ, ntɔʼ sʉ bʉr mocyɛʼ mo mpom. Obɨɔ ga bam aa! Yé ajala le ebe no.

¹¹ Zê eno e dibe egwar, lé lé epyɛl mpaŋ modibe, ntɔʼ pyɛl maa ndɨ é dwie dwie ma ɛ?

¹² Obɨɔ ga bam aa! Lɨ figye, yé abe e nkul egumo bumo oliv; etin e rezɛŋ agumo bumo fig. No nteme ó, eno lé epyɛl modibe ndɨ é jómo jómo e, lé abe e nkul ebula pyɛl modibe mo edeŋɔ.

Ocyoo lé eduho é lal mo Zyɛm ɨ

¹³ É mbɛr Zyɛm win, zé ndɨ cɨcyoo le ngwɨa ɛ? Mʉr ndɨ no e, nye ejala le elɛʼle ocyoo we waa ó, é zi mbɨambɨa ebò e cyen nye lé ekœʼ œ. Nye saʼ mɨmpaŋ bɨsyɛɛla, le etala njwɨr e bʉr bɨbɛh. Mpaŋ ocyoo, wé ó nɨ.

¹⁴ Sa gwar, yé be ó, bɨn bé esiila paʼ win ndwe le esa zyee lé efuo bɨdia nɛʼɛ, adoʼo ga mbɛh e syɛɛla nɨ, nkʉ lɛɛ ó, bɨn ó ndɨ e buʼo, sa ndɨ abe e l'ocyecye e,

¹⁵ ebe, ocyoo win waa, wé aduho boo Zyɛm. Sa ocyoo yaa, yé eduho ó, é si nwa. Yé eduho nteme ó boo moleme.

¹⁶ Ebe, gumo baʼ bʉr lé esie bʉʉ ndwe le esa zyee lé efuo bɨdia ɛ, tɨʼ, yé ó e l'oleŋeleŋe ndwe e bɨbebebebe mɨnjwɨr, mɨmbi mɨmbi.

¹⁷ Mpaŋ ocyoo lé eduho boo Zyɛm ɨ, wé ó é pememe. Mʉr ndɨ e l'ocyoo waa ɛ, nye esa ó, bʉr diʼe é motala. Nye ó é tala njwɨr, lé ekpahbe joʼo bʉʉ bʉr. Nye ejwɨʼ bʉr nkoo ndwe le ecwɨa e be. Nye abe lé eto mʉr é nkɔm ebe nduula bé e nɔɔ ndɨ e we e. Njwɨʼa-nkoo ye, yé eduho nye é mo si.

¹⁸ Bʉr o ndɨ egba motala paʼra bʉr e bʉr ɨ, bé esa no e mɨleme ndɨ mɨloŋla e motala ɛ. No ó, sa lé eduho tɨʼ ɨ, yé ó bɨsyɛɛla bɨ ocɨcyel.