Jacques 1 - Kálara Zyɛ̌m Edwán é mpʉ̌n

Moswɨhlɨ

¹ Jacques, syɛl mosa mo Zyɛm bé e Da Yesʉs-Krɨst ó lé etile bɨn kalara nwa. Me esoho bɨn, bʉr o moveh ewʉm e moba mo Zyɛm, mu si myɛʼa, jala si nwaʼ nyiwɛh ɛ.

Bɨsʉhʉ é jɔʼ bɨn ndɨ ebɔma e mobʉbla ɛ

² Obɨɔ ga bam aa! É jɔʼ bɨn bé ebɔma e mobʉbla mɨmbi mimyɛh ɛ, bɨn bé à gʉa ó, yé ó bɨn jɔʼ bɨsʉhʉ,

³ ebe, bɨn bé ejala le egʉa ó, é jɔʼ yaa, sa ndɨ enyin bɨn é mih é pono e, yé ó mpʉ bɨn bé a jyɛʼ taa buʼo yin boo Zyɛm ɨ. Yé be ó, bɨn bé a kʉ nʉa pim é buʼo yin nɛʼɛ, yé ódwe bɨn leme bihbe.

⁴ Sa gwar, yé ejala ó, bihbe waa diʼe bɨn e nyɔm é mɨpaʼ mimyɛh. Nye ósa ó, bɨn kuma é l'ombɨmbɨa é mɨpaʼ mimyɛh, abe e sa yé lé esa bɨn sɔɔlʉ.

⁵ ǃƗ nuu mʉr é mbɛr Zyɛm win si bee ó, ocyoo, wé ejɨ sa nye sɔɔlʉ nɛʼɛ, nye jaʼa Zyɛm wa. Nye ódwe nye wa. Zyɛm, nye edwe bʉr bɨbɛh ó, é ntuʼ-ntu-ntuʼ, atam be.

⁶ Sa gwar, nye ejala le esa Zyɛm mɨnjwɨʼla e mbɛla é leme, lé ekʉ jyɛʼ taa buʼo ye boo nye, asoŋlo, ebe, mʉr lé esoŋlo Zyɛm é jɔʼ nye lé esa nye mɨnjwɨʼla ɛ, nye enwɨɨla ó e l'oboʼo o maŋ. Bé ó pubo lé etine, cen gumo yiyɛh ɛ.

⁷ No ó, mʉr ndɨ kʉ kwɨh ɨ, nye ákwoʼ bi yʉʉ sɔʼɔ boo Da ebe mɨnjwɨʼla mye,

⁸ ebe, nye ó mɨleme mɨmba. Ebò e cyen nye lé ekœʼ œ, lé ó ozyɛhozyɛh.

Baanteʼenteʼe bé e l'obil o bɨsa

⁹ Mɨɔ wina é mbɛr Zyɛm ndɨ é l'enteʼe e, nye ejala le edoʼo e dia nɨnɨ Zyɛm a cyel nye tɨʼ ɨ.

¹⁰ To kœb ó, mbil bɨsa nyɛɛ, nye doʼa e dia mosɔm Zyɛm a dil nye e, ebe, nye ólaa mpʉ fulawa.

¹¹ Dobo, lé ekah; dwehe, diʼ bɨka, byé ntɔʼ dwɛhla. Fulawa nyɛɛ, nye ntɔʼ fiʼa. Ojaa we, wé òsie. Yé elɛʼle nteme mpʉ mbil bɨsa ófuʼla ɛ. Nye ódwè ó, nyɛɛ lé ebɛla ó, nye dina e l'epʉla ó, nye toʼ dolo lé esa mompɛma ɛ.

Zyɛm aboblo bʉr

¹² Zyɛm sʉʼo mocyɛʼ mo mpom me é mʉr lé entaa mobʉbla e bihbe e. Pim ndɨ é buʼo ye e, nye ókʉ nyin. Nye óbœrɔ epʉʼlʉ e tiʼ molu mo mpoʼ mɨmɛh é lʉ, yaa Zyɛm a kɛʼ bʉr o ndɨ ekpɛl nye e.

¹³ Mʉr, nye ajala le elɛɛ é jɔʼ nye lé entaa mobʉbla ó: «Zyɛm, nyi boblo me, lé eyɨm me ó, me saʼ ebebe.» Mʉr, nye abe e nkul eboblo Zyɛm, nkʉ yɨm nye ó, nye saʼ ebebe. Nye nteme, nye abe lé eboblo mʉr.

¹⁴ Bɨbebebebe bɨgwɨma ndɨ mʉr é leme tʉŋlʉ ɨ, byé ó ndɨ etiŋle mʉr tɨ, le ekwab nye ó, nye saʼ ebebe.

¹⁵ Bɨgwɨma bye byaa, byé ónʉa ebum, ntɔʼ bya Syem. Syem nyɛɛ ógwɨe, ntɔʼ sa mʉr, ntɔʼ ze bya we mwan, Efie!

¹⁶ Obɨɔ o kpɛl bam aa! Abir ga ó, mʉr gomla bɨn é bebebebe zi.

¹⁷ Ndwɛa wiwɛh ndɨ mbɨmbɨa ɛ, ndwe e dah lɨlɛh ndɨ mbɨmbɨa é mɨpaʼ mimyɛh ɛ, yé eduho ó, é lal mo Zyɛm boo Sɔŋ ga wina, nyɛɛ mʉr a cye dobo, ndwe e l'alomo, e baatwitwɛn ɨ. Nye abe lé esiila, nkʉ cene cye mpʉ dobo lé ecene cye ye, dime, ka liʼe bʉr é pyoo e.

¹⁸ Nye mʉr tɨʼ ó b'a bya bɨna ga é zi gwɨma ye. Nye a sa no ó, é jɔʼ nye a lɛʼle bɨna ga lwib ye ndɨ cyecye e, bɨna ntɔʼ buʼla ga ye. Ebe no, é nko paʼ mɨcyea bɨsa bibyɛh, bɨna ga ó ndɨ mpʉ tom nye a pɛʼ é peme ye e.

Saʼ ga Zyɛm mojoʼo

¹⁹ Obɨɔ o kpɛl bam aa! Diʼe ga é luumo, joʼlo bʉʉ bʉr. Alɨ lwib ga. Alɨ kpaa ga mompime,

²⁰ ebe, é jɔʼ mʉr ndɨ e leme é twii kʉ ɨ, nye abe e nkul eka sa syɛɛla gwar ndɨ cɨcyel é mih mo Zyɛm ɨ.

²¹ Diʼe ga bʉr o ndɨ é cyɛʼ mɨnjwɨr ɨ. Pɛʼɛ ga ebɨ-leme ndwe e bɨsyɛɛla bibyɛh ndɨ elœʼ bɨn é mih mo Zyɛm ɨ. Yé ó, é laŋle buo! ǃBɨn si sa no nɛʼɛ, bɨn bé ógʉa nʉa lwib ocyecye Zyɛm a ntɨh é mɨleme min tʉŋlʉ ɨ. Lwib ye yaa ó ndɨ e nkul edwe bɨn tiʼ molu mo mpoʼ mɨmɛh.

²² Mokan Zyɛm lé elɛɛ bɨna ga ɛ, bɨn bé à du me. Ajoʼo ga njɨ e mogwal. ǃBɨn si joʼo njɨ e mogwal nɛʼɛ, lɛɛ ó, bɨn bé ekʉa ó bɨn bʉr o tɨ.

²³ Mʉr lé ejoʼo lwib yaa, adu ye e, nye ó ndɨ waa lé edwɛʼ mpom we é l'enyin, bee mpʉ Zyɛm a me nye e.

²⁴ Jɨh tɨʼ nyi kʉ dwir koo, nye ejɨha mpʉ mpom wé be e.

²⁵ No ó, mʉr waa lé ebee etie ndɨ mbɨmbɨa é mɨpaʼ mimyɛh ɛ, (no, yé ó etie ndɨ ecyel bʉr é dia otî ɨ), nye ó ndɨ eto dolo lé edu etie laa mbɨmbɨa. Nye abe mbi mʉr ndɨ, le ejoʼo, le ejɨha ɛ. Nye esa syɛɛla tɨ. Nyiha ó ndɨ waa Zyɛm ósʉ mocyɛʼ mo mpom é syɛɛla yiyɛh nye ósa ɛ.

²⁶ ǃƗ mʉr si kʉ lɛɛ ó, nye ó é l'esama e bʉr o ndɨ egʉa du mɨlɔb mo Zyɛm nɛʼɛ, nye mɛrɨ nʉm we lé elwib sa ebebe. ǃNye baamɛr nʉm we no nɛʼɛ, nye egomlo nye mʉr tɨʼ é bebebebe zi. Buʼo mo mʉr waa, yé ó mbɛh e mbɛh.

²⁷ Mpaŋ buʼo ndɨ é ncyɛh-ncyɛh é mih mo Zyɛm Sɔŋ ɨ, yé ó, mʉr toʼ le egul bwɔɔnul ndwe e mɨkuho mɨ bʉba, bʉr o ndɨ é mɨtuu ɨ, sa nteme okan é mbi nyɛɛ lé etiʼe e, ebe, bɨsa bɨ jobo yi, byé amu jaa go nye é nyʉl mpʉ mobar.