Filipi 4 - Kálara Zyɛ̌m Edwán é mpʉ̌n

Lɔɔ Pol lé elɛɛ obuʼla ɛ

¹ Obɨɔ o kpɛl bam aa! Me ekpɛl bɨn ndwe le egwɨm bâʼle bee bɨn. Bɨn o ndɨ edwe me buobuo bɨsʉhʉ é leme. Bɨn ó ngo sa ó, Zyɛm bœrɨ me epʉʼlʉ é lʉ. Ofo bam, cyɛba ga é nkʉʼʉ é zyɛŋa win boo Da Yesʉs.

² Me ejwɨʼla e bɨn, Evodia bé e Sʉntike, mpʉ bɨn mu é zyɛŋa win boo Da Yesʉs ɨ, diʼe ga nteme twii ngwar.

³ No ó, gwɔɔ mpaŋ mʉr nwan yam! Me ejwɨʼla nteme e go ó, go toʼ, to kɛm bʉba onɨ, ó bé diʼe twii, ebe, bé ó bʉr o bɨh e boo nɔɔ ndɨ é l'empomo e syɛɛ egwar ɨ, bé e Kelemaŋ ndwe e bʉʉ bʉr. Mie mɔɔ, mé ó mɨtila é kalara tiʼ tʉŋlʉ.

⁴ Diʼe ga jɔʼ yiyɛh e bɨsʉhʉ ebe zyɛŋa win boo Da Yesʉs. Me ebâʼle lɛɛ ó, soha ga.

⁵ Me ekpɛl ó, bɨn lɛʼla bʉr bɨbɛh mpʉ bɨn ndɨ é tala njwɨr ɨ. Da Yesʉs, nye mu ó kunokuno le ebula.

⁶ Asyɛl ga ba e bɨn bʉr o tɨ, tiibe e yʉʉ sɔʼɔ. Jwɨʼla ga e Zyɛm é bɨjɔʼ bibyɛh, é bɨsa bibyɛh bɨn lé ejaʼ ɛ. Dweʼ ga nye ekiba é jɔʼ yiyɛh é lɔb bɨsa nye lé edwe bɨn ɨ.

⁷ Zyɛm óbaʼle mɨleme min ndwe e mɨsisim min ó, é zi motala me. Mɨleme min loŋla e motala ebe zyɛŋa win boo Yesʉs-Krɨst, ebe, motala mo Zyɛm lé entaa ocyoo wiwɛh ɛ, mé óbaʼle mɨleme min ndwe e mɨsisim min é zyɛŋa win boo Yesʉs-Krɨst.

⁸ Obɨɔ ga bam aa! Sa me óka tile bɨn é l'epihe e, yé ó nɛɛ: pahla ga bɨsa ndɨ cyecye e ndwe e byaa bɨ duu, bɨsa ndɨ cɨcyel ɨ. Pahla ga bɨsa ndɨ é pememe le ebul kpɛlɔ ɛ. Pahla ga mɨlɔb bʉr lé ebul mɛʼle e, le bɨsa ndɨ é mbɨa le egumlɔ ɛ.

⁹ Duʼo ga sikʉlʉ bɨn bé a jwɨʼ boo me e. Duʼo ga mɨlɔb mimyɛh bɨn bé a joʼo me lé elɛɛ, myaa bɨn mu lé emɛʼle e. Ebò e cyen bɨn bé a bee me lé ekœʼ œ, kœʼœ ga le. Zyɛm, waa lé egba bɨna ga motala é mɨleme e, nye ódi é bɨn.

Pol lé edwe bʉr o nkana Filipi ekiba é lɔb mɨngula myɔɔ

¹⁰ Me ebul soho bɨn é mih mo Da, ebe, é jɔʼ yi, bɨn bɨ bâʼle toŋlo me mpʉ bɨn bé a bɛa toŋlo-toŋlo me e. Sa gwar, bɨn bé a taare be ó, abe e l'epʉla ó, bɨn cwɨa e me.

¹¹ ǃMe si lwib no nɛʼɛ, yé alɛɛ ó, me ó é sɔɔlʉ bɨsɔʼɔ, ebe, mɨ bɛa jwɨʼ ó, me soha sa me ndɨ e ye e.

¹² Me egʉa edi é l'enteʼe. Me egʉa edi é twiha bɨsa nteme. Me a si jwɨʼ edi mbɨmbɨa é bɨcye bibyɛh, é dia yiyɛh me lé edi ɨ. Me dam díle, me dam ja za, me dam bi twiha mobi, me dam be é sɔɔlʉ mobi, me yɛɛ ó mbɨmbɨa.

¹³ Me ó e nkul esa bɨsa bibyɛh no é Krɨst, mʉr lé edwe me nkul ɨ.

¹⁴ Sa ndɨ tɨʼ yé ó, bɨn bé a si kʉ sa embɨa lé enʉa nkɔb é mɨtuu myam.

¹⁵ Bɨn bʉr o Filipi, bɨn bé egʉa é jɔʼ me a mʉa é Masedwan, lé etaare to lɛɛ Mbɨambɨa Lɔɔ ɛ, bɨn ó b'a be mbɛr Zyɛm ngwar wé a fuʼo me e.

¹⁶ Ebe, é jɔʼ me a be é lal Tesalonika ɛ, bɨn bé a si ze me e ngula, lé edwe me sa yé a be lé esa me sɔɔlʉ ɨ, laa jɔʼ gwar.

¹⁷ Me agwɨm ba ndwɛa win, wé mʉr tɨ. Me ekʉ ka gwɨm ó njɨ Zyɛm niʼa bɨn bɨbaa bɨ embɨa é lɔb sa bɨn bé ódwe-dwe me e.

¹⁸ Me a si bi sa yiyɛh bɨn bé a lomlo me e. Bim yaa, yé é buo! Me mu ó, é twiha ebe bɨsa Epafrɔdit a ze e bye e. Zyɛm, nye ebee mɨndwɛa min mbɨmbɨa, mpʉ nye lé enʉa motwina ndɨ ediʼɔ nye e bɨsʉhʉ ɨ.

¹⁹ No ó, Zyɛm Sɔŋ wam óloŋlo bɨn e bɨsa bɨn lé esaa ɛ, dwe bɨn bya ntuʼba, lé edu mpwaʼ okum we. Nye ósa no ebe zyɛŋa win boo Yesʉs-Krɨst.

²⁰ Kum diʼe e Zyɛm Sɔŋ ga wina njʉmdia e njʉmdia. Amɛn!

Moswɨhlɨ

²¹ Soha ga me mɨsaŋ mɨ bʉr mimyɛh ndɨ é zyɛŋa wɔɔ boo Yesʉs-Krɨst ɨ. Obuʼla bɨbɛh bɨh e boo nɔɔ ndɨ wâʼ ɛ, bé esoho bɨn.

²² Mɨsaŋ mɨ bʉr mo Zyɛm mimyɛh ndɨ kaʼ ɛ, myé esoho bɨn, kʉ bul be baa ndɨ é mbɛr mo Kɛɛza tʉŋlʉ ɨ.

²³ Mocyɛʼ mo mpom mo Da Yesʉs-Krɨst, mé swɨŋɨ é sisim win.