Filipi 2 - Kálara Zyɛ̌m Edwán é mpʉ̌n

Filɨ ga monyʉl si paʼra win

¹ Yé be ó, bɨn bɨ gbaŋɔ nkul é monyʉl, duho é zyɛŋa win boo Yesʉs-Krɨst nɛʼɛ, yé be ó, kpɛl ye, yi lɨl bɨn wa, yé be ó, bɨn mu ó é zyɛŋa win boo Mbɨambɨa Sisim cyecye wa, yé be ó, bɨn bé ó e njwɨʼa-nkoo paʼra win wa,

² bɨn bé à di e lwib gwar, lé ekpɛla paʼra win. Bɨn bé ódi e leme ngwar, twii ngwar. ǃBɨn sa no nɛʼɛ, yé óbul dwe me bɨsʉhʉ.

³ Asa ga zyee lé efuo bɨdia paʼ win. Ankɛɛ ga monyʉl. Mʉr nyiwɛh, nye dweʼ bʉʉ bʉr duu, laa mpʉ nye lé ebee nye mʉr tɨʼ ɨ.

⁴ Mʉr nyiwɛh é mbɛr Zyɛm win, nye beʼ l'agwɨm sa yé óbe nye é nyɔm nye ome e. Mʉr nyiwɛh, nye toŋla nteme sa bʉʉ bʉr, bé óbɛm dira nyɔm e tɨʼ ɨ.

⁵ Diʼe ga e leme ncwɨncwɨa, mpʉ Yesʉs-Krɨst a kpɛl bɨn ɨ.

⁶ Nye a bɛa be ó, mbi tiʼ we, bé e waa mo Zyɛm Sɔŋ asiila ɛ. No ó, nye a baabee ó, cye Zyɛm ye yaa, yé a be ó sa nye a jala le emɛr é kpɨɨɨ ɨ.

⁷ Laa ó, nye nyinɨ njɨ é cye yaa, nye a fuo fil yɛɛ nyʉl we si, ze kʉ nyin mpʉ elʉa. É mbi waa ó nye a ka fuʼla mʉr mpʉ bɨna ndɨ ga ɛ.

⁸ É jɔʼ nye a be, nye mu ó lé etiʼe mpʉ mamʉr ɨ, nye a si fil nyʉl we si, lé esa Zyɛm mojoʼo, dam be mpʉ nye a lomo nye ó, nye ntaʼ, ze dwè bɨbla efie é klos kʉ ɨ.

⁹ Ebe no ó Zyɛm a bul bɨn nye kʉ ɨ, lé ebɨr nye nkʉŋ lé elaa mɨnkʉŋ mimyɛh é mpwaʼ ɛ.

¹⁰ Nye a dwe nye wa ó, mʉr nyiwɛh kurɨ moboo si, dwiibɨ die mo Yesʉs. Bɨsa bibyɛh, byé ókʉ dwiibɨ nye, taare é bɨsa bibyɛh ndɨ é jobo kʉ ɨ, ze kɛl byaa ndɨ é si nwaʼ ɛ, to pyal é byaa ndɨ é bwah tʉŋlʉ ɨ.

¹¹ No nteme ó mʉr nyiwɛh ómɛʼle ó, Yesʉs-Krɨst ó ndɨ bwaʼbwaʼ Njwɨɨ, lé edwe Zyɛm Sɔŋ kum é zi waa.

Obuʼla, bé ó myɛn si nwa

¹² No ó, obɨɔ o kpɛl bam aa! Bɨn bé a be ó si sa Zyɛm mojoʼo é jɔʼ bɨna bé a be ga gumo gwar ɨ. No ó, banana, é mpʉ me mu é nko paʼ fih, aka be bɨn ye e, bɨn bé ejala le eto dolo lé esa no. Zyɛm, nyi tiʼ bɨn. No ó, sea ga e bʉa e mosaʼ é l'efu ó, bɨn kœʼœ ebò e cyen laa.

¹³ Ebe, Zyɛm ó ndɨ edwe bɨn gwɨma edu mpaŋ zi waa. Nye nteme ó ndɨ edwe bɨn nkul ó, bɨn kœʼœ tɨʼ mbɨmbɨa.

¹⁴ Saʼ ga sa yiyɛh atʉʼra, nkʉ e mosono é mɨleme.

¹⁵ Ebe no ó bɨn bé óbe e mɨleme é sɔɔɔ ɛ. Ebò e cyen lɨn, lé óbe ó, alɨŋa ba. Bɨn bé óbe ó bwan mo Zyɛm, abe e sa ebebe bé a ngbaa nwahle bɨn e tɨ. Bɨn bé óbul pan mpʉ baatwitwɛn ndɨ é jobo kʉ, teme ozyɛhozyɛh o bʉr o b'a lɨŋa, jyɛl ɨ diʼ ɨ.

¹⁶ Bɨn bé ólɛʼle be mɨlɔb mɨ tiʼ. Tɨʼ ó me óbi zi lé edoʼo e syɛɛ yam é dobo Krɨst óbula ze e. Me ógʉa é jɔʼ yaa ó, lelelele syɛɛ me a sea ɛ, yé a baadwè ntuʼ.

¹⁷ Bɨn mu ó lé esa Zyɛm syɛɛ nye lé egwɨm ɨ, duho é buʼo yin. Bɨn bé edwe nye bɨtiʼ bin tɔɔ motwina. Dam be mpʉ motié mam mu lé eswɨɨ é mɨndwɛa mɨn kʉ ɨ, me esoho. Bɨna bé esoho ga tɨ.

¹⁸ Jwɨʼ gwar e gwar yaa nteme e bɨn, bɨn bé esoho e me é jɔʼ me ndɨ e bɨsʉhʉ ɨ.

Timote bé e Epafrɔdit

¹⁹ Da Yesʉs, nyi loŋlo leme wam e mbɛla ó, me mu ó kunokuno le elomlo bɨn Timote. Me ólaŋle soho é jɔʼ me ójoʼo lɔɔ wé óduho gʉ, tiibe e mbɛr Zyɛm win ɨ.

²⁰ Me abe e mʉr fih mpʉ mo nye. Bɨsyɛɛla lé edwɛʼ nyɔm win ɨ, byé ekʉ pebre nye é leme.

²¹ Ebe, bʉʉ bʉr bɛɛ, bé esaa ó, njɨ mɨnyɔm myɔɔ. ǃBé si joʼo sa lé etiibe e Yesʉs-Krɨst nɛʼɛ, bé agum nʉa ye, gba é nkɔb.

²² Bɨn bʉr o tɨ, bé egʉa mpʉ Timote lé ebɛa di-di me mpʉ mwan ɨ, le mpʉ nye lé edihbe syɛɛ bɨh e nɔɔ lé esea lé elɛɛ Mbɨambɨa Lɔɔ ɛ. Ebò e cyen nye lé ekœʼ œ, lé ó dweʼle, sa lé ekʉ lɛʼle ó, nye e nyɔm ɨ.

²³ Ebe no, nye ó waa me lé ebuʼla ó, me óntɨh bɨn ɨ, jɨh tɨʼ me óbe si bee mpʉ mɨlɔb myam miʼ, myé ófuʼla ɛ.

²⁴ Da Yesʉs, nyi loŋlo leme wam e mbɛla ó, me ókpahbe ze gʉʼ bɨn ye.

²⁵ Mɨ ze bee ó, yé a kʉ jala ó, me buula bɨn mɨɔ ga wina Epafrɔdit. Bɨh e nɔɔ ó ndɨ é l'empomo e syɛɛ egwar. Nye ó mʉr bɨh e nɔɔ ndɨ elwimla dɔm ɨ. Nye nteme, nye ó mwa mɨlʉmlʉ win, ó nye ntaʼ, ze fuʼo me é zi bɨsa byé a sa me sɔɔlʉ ɨ.

²⁶ Nye ekpɛl bee bɨn bɨbɛh. Nye a be nteme ó, lé esyɛl ba e bɨn, tiibe e mɨlɔɔ mɨ esyɛb le bɨn bé a joʼo e.

²⁷ Nye a si kʉ syɛb. Nye a duho ó, é ka foo! Sa gwar, Zyɛm a si jwɨʼ nye nkoo. Abe nye e nye, ndwe e mɛm mʉr tɨʼ nteme. Nye a tiʼ nye ó, ebe, nye a si kamle e me. Nye a baamɛʼle ó, me bâʼla ka bul kpaa empime, ntaa njɨ.

²⁸ No ó, me egwɨm ó, me buula bɨn nya kam e kam, ó bɨn nkʉʼ bâʼle soho é buobuo é jɔʼ bɨn bé óbee nye e. Mɛm nteme, me aŋa ka laŋle syɛl ba e bɨn.

²⁹ Ebe no, é jɔʼ nye ópyal é l'esama lɨn ɨ, bɨn bé à nʉa nye e bɨsʉhʉ bibyɛh ebe nye ndɨ mɨɔ ga wina, waa ndɨ é zyɛŋa ga wina boo Da Yesʉs ɨ. Dwaaba ga mbi bʉr o ndɨ mpʉ mo nye e,

³⁰ ebe, nye a be ó si ngbaa dwè é lɔb syɛɛ mo Krɨst! Nye a si ngbaa dimle tiʼ ye, lé eze tʉŋ me, lé edwe me ngula bɨn bé a be, abe e nkul edwe me e.