Filipi 1 - Kálara Zyɛ̌m Edwán é mpʉ̌n

Moswɨhlɨ

¹ Mɛm Pol, bɨh e Timote, osyɛl o mosa mo Yesʉs-Krɨst ó lé etile bɨn. Bɨh bé etile mɨsaŋ mɨ bʉr mimyɛh ndɨ é zyɛŋa wɔɔ boo Yesʉs-Krɨst, baa lé edi nkana Filipi ɨ. Bɨh bé etile nteme ó, obɔʼlʉ o mbɛr Zyɛm win tʉŋlʉ, bé e boo odiakɔn.

² Mocyɛʼ mo mpom le motala mo Zyɛm Sɔŋ ga wina bé e Da Yesʉs-Krɨst, mé swɨŋɨ é bɨn.

Mɨnjwɨʼla mo Pol é l'efu e bʉr o nkana Filipi

³ Me edwe Zyɛm Sɔŋ wam ekiba é lɔb win é jɔʼ yiyɛh me lé etoŋlo bɨn ɨ.

⁴ É jɔʼ yiyɛh me lé ejwɨʼla é l'efu lɨn ɨ, me ejwɨʼla ó e bɨsʉhʉ,

⁵ ebe, mpʉ bɨn bé a syɛŋa mobo e me e, yé a be ó é mbɨa. Bɨn bé a si baʼra e me lé elɛɛ Mbɨambɨa Lɔɔ, taare é l'elu le efoʼ, ze pyal é muh é dobo lɨ.

⁶ Mɨ kʉ gʉa ó, Zyɛm, nyi taare lé esa mpaŋ syɛɛla é mɨleme min tʉŋlʉ. Mɨ kʉ gʉa nteme ó, nye óto le esa no, to pyal é jɔʼ nye ósil komlo bɨn é dobo Yesʉs-Krɨst óbula ze e.

⁷ Yé ejala nteme ó, me pahla lɔb win é mbi waa, ebe, me ecwɨa e bɨn é buobuo. Zyɛm a si cwɨa e bɨna ga bɨbɛh jwɨʼ gwar. Me dam be é mbɛr mɨmbʉʼ tʉŋlʉ mpʉ me mu ɨ, me dam be é dia otî lé eboʼlo Mbɨambɨa Lɔɔ ndɨ eduho boo Zyɛm ɨ, mocyɛʼ mo mpom mo Zyɛm, mé eswɨɨ é bɨna ga é mbi ngwar.

⁸ Zyɛm, nye ó me mboʼla: me ekpɛl bɨn bɨbɛh mpʉ Yesʉs-Krɨst lé ekpɛl bɨn ɨ.

⁹ Mɨnjwɨʼla me lé ejwɨʼla é l'efu lɨn ɨ, myé ó: kpɛl yin, yé bwaʼa bwaʼa. Kpɛl yin, yé gwɨa é l'ocyoo le pɨʼ.

¹⁰ Ebe no ó bɨn bé óbe e nkul edweʼe sa ndɨ é bul jɨŋɔ ɛ. É dobo Krɨst óbula ze e, nye ókœb ó, bɨn mu ó bʉr o b'ocyecye, abe e mobe.

¹¹ No ó bɨn bé ódi ocɨcyel o bʉr é zyɛŋa win boo Yesʉs-Krɨst ɨ. Bʉr, bé óbul dwe Zyɛm kum le eseʼle nye ebe bɨn.

Nyɔm wam, wé ó, me gumla Krɨst

¹² Obɨɔ ga bam aa! Me egwɨm ó, bɨn gʉŋa ó, sa yé a pyal me e, yé ó b'a tine Mbɨambɨa Lɔɔ ó, wé bâʼla myɛma.

¹³ Obɔʼlʉ o mɨmbʉʼ bɨbɛh ndɨ wâʼ é bii mo njwɨɨbʉr ɨ, bé e bʉr ofih, bé mu ó lé ebɛa gʉa ó, me ó mbʉʼ é l'efu e syɛɛ mo Krɨst me lé esea ɛ.

¹⁴ Mpʉ me ndɨ wâʼ é mbʉʼ wiʼ ɨ, yé esa ó, bʉʉ obuʼla, bé gʉa jyɛʼ taa buʼo yɔɔ boo Da Yesʉs. Bé mu ó lé elɛɛ lɔɔ Zyɛm é hwɨm, abaawe sɔʼɔ e bʉr. Bé elɛɛ mye nteme ó, laa bim bé a taare lɛɛ-lɛɛ mye e.

¹⁵ Yé cyecye ó, baʼ bʉr, bé etuno lɔɔ mo Krɨst lé ejɨ pɨna e me, ebe, bé ekpɛl ó, bé lwibɨ, laa me. Bʉʉ bʉr, bé esa tuno we ó e mpaŋ gwɨma.

¹⁶ Bé esa no é lɔb kpɛl bé le ekpɛl me e, bɛɛ lé egʉa ó, Zyɛm a dil me wâʼ é mbʉʼ ó, me nkʉʼ kamle e Mbɨambɨa Lɔɔ.

¹⁷ No ó, bʉr onɨ, bé elɛɛ lɔɔ mo Krɨst lé esa zyee lé efuo bɨdia e me, bɛɛ lé ejwɨʼ ó, bé óko me tuu fih cye yiyɛh me dina é mbʉʼ ɨ. Sa yaa, yé aduho be é mɨmo si.

¹⁸ Bɨna bé ólɛɛ ga é yé? Sa ndɨ tɨʼ yé ó, bé etuno lɔɔ mo Krɨst. Wé mu ó lé etunɔ é mozi mɨmɛh, dam be ó é zi bɨkʉʉŋʉ, dam be ó é l'ocyecye. Yé ó sa lé esa ó, me soha. Me óbâʼle to dolo lé esoho,

¹⁹ ebe, me egʉa ó, me ótiʼɔ ebe mɨnjwɨʼla min ndwe e Sisim mo Yesʉs-Krɨst lé eze me é nkɔm ɨ.

²⁰ Leme wam, wé ó lwɨŋla e mbɛla ó, me ákwoʼ sɔma e yʉʉ syɛɛla yam gwar. Me ebuʼla ó, me óto le ekœʼ mpaŋ ebò e cyen é hwɨm, abaawe sɔʼɔ e bʉr, mpʉ me a bɛa sa-sa ɛ, é l'efu ó, bʉr toʼ dolo lé egumlo Krɨst. Dam be ó me etiʼe, dam be nteme ó, mɨ dwè: bé óto le egumlo Krɨst ebe me.

²¹ No ó, é nko paʼ wam, tiʼ yam, yé ó me diʼe é zyɛŋa e Krɨst. Myɛna mam, mé ó efie.

²² ǃMe si to dolo lé etiʼe mʉʉ molu é si nwaʼ nɛʼɛ, yé óbe ó me e nyɔm lé ebâʼle gumo mpumo é syɛɛ-Zyɛm yam. Ebe no ó me ndɨ, agʉa sa me ópɛh ɛ: nkʉ efie, nkʉ tiʼ.

²³ Leme, wé ó me é mo é zaaama. É wiʼ paʼ, me egwɨm dime mih, to gbala boo Krɨst. Sa yaa ó ndɨ é bul mbɨa.

²⁴ É guu paʼ, ebe bɨn, yé ekʉ jala ó, me bâʼla tiʼe mʉʉ molu é si nwa.

²⁵ Mɨ kʉ gʉa no, ndwe le egʉa nteme ó, me óto le etiʼe. Bɨna bé ódi ga é tiʼ. Yé óbe bɨn e nyɔm ó, bɨn toʼ dolo lé esoho é buʼo.

²⁶ No ó é jɔʼ me óbula ze di kunokuno e bɨn ɨ, bɨn bé óbul mɨɨla ebe syɛɛla Yesʉs-Krɨst a sa me e.

²⁷ Sa gwar, kœʼœ ga ebò e cyen lé ejala e bʉr o ndɨ ebuʼla Mbɨambɨa Lɔɔ mo Krɨst ɨ. ǃBɨn si sa no nɛʼɛ, me ójoʼo lɔɔ win, gʉa nteme ó, bɨn dina é zyɛŋa win boo Sisim ngwar ɨ, lé ecyɛb é nkʉʼʉ e twii ngwar, le ekœʼ ebò e cyen é zi buʼo mpʉ Mbɨambɨa Lɔɔ lé elɛʼle e. Me ójoʼo lɔɔ é lɔb ebò e cyen laa, me ntɔʼ soho, me dam be si pyal, bee bɨn e mih, me dam liʼ é guu paʼ, ntɔʼ joʼo njɨ lɔɔ e lɔɔ.

²⁸ Me ekpɛl joʼo ó, bɨn bé aka joʼo bʉa é mih mo bʉr o dɔm bɨn. Mpʉ bé lé esa bɨn mongan, bɨn l'akpɛɛ be e, sa yaa, yé ó bɨdim byɔɔ, sa lé elɛʼle be ó, bé ódim ɨ. é nko paʼ win wɛɛ, yé elɛʼle ó, bɨn bé óbi tiʼ molu mo mpoʼ mɨmɛh, tiʼ yaa, lé eduho boo Zyɛm.

²⁹ Nye a dwe bɨn tiʼ molu mo mpoʼ mɨmɛh ó, bɨn gumla Krɨst, abe njɨ é jɔʼ bɨn lé ejyɛʼ taa buʼo yin boo nye e, kʉ bul be é jɔʼ bɨn mu lé ebɔma e mɨtuu ebe zyɛŋa win boo nɔɔ ɛ.

³⁰ No ó, bɨn mu ó lé elwimla dɔm egwar bɨn bé a bee me lé elwimla ɛ. Me dina ó lé elwimla dɔm laa, ze pyal é muh é dobo lɨ, mpʉ bɨn bé a joʼo e.