Éfɛsɔs 6 - Kálara Zyɛ̌m Edwán é mpʉ̌n

¹ Bwan ɛɛ! Saʼ ga obyɛl bɨn mojoʼo, é zyɛŋa win boo Da Yesʉs. No, yé ó cɨcyel.

² Etie ndɨ elɛɛ ó: «Dwaaba sɔŋ e nyɔŋ go» e, lé ó b'a taare ze e monkɛʼ é motie mɨmɛh.

³ Lé a dumlo ó: «Sa yiyɛh, yé nkʉʼ pyal go mbɨmbɨa. Bɨn nkʉʼ díle tiʼ si nwa.»

⁴ Bɨn osɔŋ o bwan aa! Daʼ sa ga ó, bwan bɨn, bé joʼa mompime. Dɨʼe tɨe ga be, le ebal be, le edwe be mɨlɛʼla mo Da Yesʉs.

⁵ Molʉa ɛɛ! Bɨn bé ejala le esa ojwɨʼa bɨn, baa ndɨ bʉr o si nwaʼ ɛ, mojoʼo. Sea ga be syɛɛ e bʉa e mosaʼ, ndwe le egba monyʉl mɨn. Sea ga be e mpaŋ mojoʼo, mpʉ sa lɛɛ ó, bɨn bé esea ó Krɨst syɛɛ.

⁶ Mʉr asea syɛɛ njɨ é jɔʼ bé lé epala nye e. Mʉr beʼ l'asea é l'efu e moseʼla mo bʉr. Mpʉ bɨn mu osyɛl o mosa mo Krɨst ɨ, sea ga e be syɛɛ, lé eloŋlo gwɨma mo Zyɛm, e mɨleme min mimyɛh.

⁷ Sea ga be syɛɛ e mpaŋ gwɨma, mpʉ sa lɛɛ ó, bɨn bé esea ó, Da Yesʉs syɛɛ yaa, abe mʉr fih.

⁸ Gʉŋa ga ó, ǃɨ mʉr si sa syɛɛla ncwɨncwɨa nɛʼɛ, Da Yesʉs ódwe nye myɛna tɨ, nye dam be elʉa, nkʉ mʉr ndɨ é dia otî ɨ.

⁹ Bɨn ojwɨʼa o molʉa ɛɛ! Saʼ ga molʉa mɨn bɨsyɛɛla bɨmpwar bɨnɨ. Daʼ bɛŋ ga be. Bɨn bé ejala le egʉa ó, Da Yesʉs, mʉr mu lé edi é jobo kʉ ɨ, nye ó ndɨ Tî win boo molʉa mɨn, bɨn bɨbɛh. Nye adwaabe bʉr é lɔb mompom mɔɔ.

Elwimla dɔm e mokʉa mo dɔm mo Zyɛm

¹⁰ Sa me lé eka tile bɨn é l'epihe e, yé ó: lela ga nkul é zyɛŋa win boo Da Yesʉs tʉŋlʉ, é mpwaʼ nkul we.

¹¹ Biʼe ga mokʉa mo dɔm mɨmɛh Zyɛm lé elulo bɨn ɨ, é mbi ndɨ ó, é jɔʼ Njwɨɨ moleme óze bɛŋ bɨn ɨ, bɨn cyɛba é nkʉʼʉ, nyɛɛ l'antaa bɨn é pɨʼ.

¹² Ebe, yé abe ó, bɨna tɛl ga ó e bʉr o bɨpuno le motié. É l'ocyecye, bɨna bé elwimla ga ó e bɨcye bɨnɨnɨ bɨnâ mɨsisim mɨ apum: le mɨsisim mɨnɨnɨ, le myaa mɨ nkul, le myaa ndɨ e mojwɨ̀ʼa mo edurʉ ɨ, le myaa ndɨ é jobo e l'ejyoo le ebantɛn ɨ.

¹³ Ebe no, biʼe ga mɨmbi mokʉa mo dɔm mimyɛh Zyɛm lé entɨh bɨn ɨ. É jɔʼ bebebebe moho waa, wé óbe si pyal bɨn ɨ, bɨn bé óbe ó e nkul esa mʉr dɔm win mongan. Bɨn bé óbe ó si ngan é mbi wiwɛh, cyɛb é nkʉʼʉ, apɨŋla é bebebebe jɔʼ yaa.

¹⁴ Ebe no, cyɛba ga é nkʉʼʉ é cye dɔm yin. Bɨn bé à bwar ocyecye tɔɔ kana dɔm yɨma é kubo. Diʼe ga nteme e l'ocɨcyel tɔɔ bɨnkoho bé lé ebuuro bɨr e tɨʼ ɨ.

¹⁵ Gbaʼ ga monyʉl lé elɛɛ Mbɨambɨa Lɔɔ motala Zyɛm lé edwe bʉr ɨ. Tuno waa, wé diʼe bɨn tɔɔ ongʉb bɨn lé ebwar, to e be fum yiyɛh ɛ.

¹⁶ Buʼo yin, yé diʼe tɔɔ nkuo dɔm lé etwin mokʉa mo dɔm mo Bɨbla-mʉr, le edime mɨnjʉl mɨ siʼe mɨ tɨ.

¹⁷ Biʼe ga tiʼ molu mo mpoʼ mɨmɛh. Tiʼ molu mo mpoʼ mɨmɛh, yé ó tɔɔ kʉŋʉ dɔm lé ekamle e lʉ nkɔɔ ɛ. Bɨn bé à nʉa lɔɔ Zyɛm tɔɔ fòŋ Mbɨambɨa Sisim lé egœm é pɔb, ze timle bɨn ɨ.

¹⁸ Jwɨʼla ga é jɔʼ yiyɛh mpʉ Mbɨambɨa Sisim lé etɨe bɨn ɨ, lé eto le edî le ejaʼ é mozi mɨmɛh. Tɨʼ nteme, diʼe ga nkehe é jɔʼ yiyɛh. Gbaʼ ga monyʉl lé esa mɨnjwɨʼla é l'efu e mɨsaŋ mɨ bʉr mo Zyɛm mimyɛh.

¹⁹ Jwɨʼla ga nteme e Zyɛm é l'efu lam, ó nye dweʼ me mokan me lwibɨ, abaawe sɔʼɔ e mʉr ɨ. Me pɛʼla lwib odim lé etiibe e Mbɨambɨa Lɔɔ ɛ, bʉr gʉŋa we é kpɛhla.

²⁰ Yé ó é modila mo Krɨst ó me mu é nkara é lɔb Mbɨambɨa Lɔɔ ɛ. Jwɨʼla ga e Zyɛm, ó me pɛʼla we é kpɛŋlɛm, abe e bʉa, mpʉ wé lé ejala le epɛʼlɔ ɛ.

Moswɨhlɨ

²¹ Mɨɔ kpɛl ga wina Tisikos, ndɨ syɛl mosa é zyɛŋa wɔɔ boo Da Yesʉs ɨ, nye nteme mʉr ebuʼla. Nye ólɛɛ bɨn sa yiyɛh lé etiibe e me e, le é lɔb syɛɛ me mu lé esea ɛ.

²² Me elomlo bɨn nya ó, nye ntaʼ, ze lɛɛ bɨn mɨlɔɔ mɨ tiʼ yih, le eze gba bɨn nkul é monyʉl.

²³ Zyɛm Sɔŋ bé e Da Yesʉs-Krɨst, bé gbaʼ bɨn, obuʼla, motala é mɨleme ndwe e kpɛl, kumo e buʼo.

²⁴ Mocyɛʼ mo mpom mo Zyɛm, mé swɨŋɨ é mʉr nyiwɛh lé ekpɛl Tî ga wina Yesʉs-Krɨst kpɛl apurapura ɛ.