Éfɛsɔs 5 - Kálara Zyɛ̌m Edwán é mpʉ̌n

¹ Ebe no, nʉŋa ga dweʼle tiʼ mo Zyɛm, ebe, bɨn mu ó bwan o kpɛl be!

² Kœʼœ ga ebò e cyen ndɨ elɛʼle leme ncwɨncwɨa win ɨ, mpʉ Krɨst a taare cwɨa e bɨna ga ɛ. Nye a si dwè, jala e bɨna ga, ó nye diʼe mpʉ mɨndwɛa ndwe e motwina. Motwina me maa, mé a be ó e monumo Zyɛm lé ebul kpɛl ɨ.

³ Sa gwar, mʉr ayi joʼo lʉʉ dobo ó, mʉr fih mʉr kɛ̀l, nye ó é mbɛr Zyɛm win, nye nteme lé elœʼ nyʉl é zi bɨduo, nkʉ lé elama fwon lé edu njɨ bɨjyɛʼ bye, nkʉ lé ecen mih é bɨsa byoonkan. Mɨsaŋ mɨ bʉr mo Zyɛm, myé ajala le ebul jwɨ̂ʼlɨ e bɨsyɛɛla binɨ.

⁴ Yé ajala ó, bɨn lwibɨ lwib fulʉs, nkʉ lwib ogʉ, nkʉ lwib bɨnkpala ndɨ ambɨa ɛ. Yé ekʉ ka jala ó njɨ bɨn dweʼ Zyɛm ekiba.

⁵ Gʉŋa ga ó, bʉr o ndɨ esa bɨmala e mɨfyɛba ɛ, e baa lé elœʼ bé bʉr o tɨʼ é mih mo Zyɛm ɨ, e baa lé ecen mih é bɨsa byoonkan ɨ, mʉr ndɨ ekœʼ ebò e cyen laa ɛ, nye ákwoʼ niŋlɔ é jwɨ̀ʼa mo Krɨst, ndɨ jwɨ̀ʼa mo Zyɛm ɨ. Gʉŋa ga ó, waa ndɨ ecen mih é bɨsa byoonkan ɨ, syɛɛla ye yaa, yé ekʉ lɛʼle ó, mʉr tɨ, nye edwiibɨ bɨbaŋabaŋa bɨdweʼle bɨ ozyɛm!

Kœʼœ ga e myɛn

⁶ Mʉr beʼ l'agomlo bɨn diʼ é zi lwib ndɨ mbɛh ɛ. Bɨsyɛɛla bɨ ebebe bɨnɨ, byé ó ndɨ egba Zyɛm empime é leme. Empime laa ó nye ókpaa e bʉr o ndɨ esa nye ebɨh ɨ.

⁷ Ebe no, mʉr atœb ga bɨsyɛɛla bɨ bʉr onɨ!

⁸ Molu pihe, bɨn bé a be-be ó é l'edurʉ. No ó, banana, bɨn mu ó é myɛn, duho é zyɛŋa win boo Da Yesʉs. No ó, kœʼœ ga ebò e cyen ndɨ ejala e bʉr o ndɨ é myɛn ɨ.

⁹ Me elɛɛ no ó, ebe, bʉr o ndɨ é myɛn ɨ, bɛɛ ó ndɨ egumo mbɨambɨa mpumo mɨmbi mimyɛh: myaa mɨ ncwɨncwɨa e l'ocɨcyel ndwe e l'ocyecye.

¹⁰ Saŋa ga ó, bɨn dweʼa sa Da Yesʉs lé ebee mbɨmbɨa ɛ.

¹¹ Mʉr beʼ l'atœb bɨsyɛɛla bɨ apum, sa ndɨ abe e nyɔm ɨ. Pyɛlɨ ga bɨdweʼle ndɨ elɛʼle ó, bʉr o ndɨ esa bɨsyɛɛla byaa ɛ, bé e mobe.

¹² Yé é bul sa bɨna ga fwon lé etublo bɨsyɛɛla bé lé esa é mofo, bɨna dam tublo ga njɨ mie.

¹³ É jɔʼ bɨna lé edwe ga bʉr mobe é lɔb bɨsyɛɛla byaa ɛ, myɛn, wé eze kʉn bye,

¹⁴ ebe, sa yiyɛh myɛn lé ekʉn ɨ, yé mu ó lé epan mɨmbah. Ebe no ó bé lé elɛɛ ó: «Gwɔɔ mʉr ndɨ é dwo e, jɨma. Pàha é foo. Krɨst pana go mɨmbah, gba go é myɛn tʉŋlʉ.»

¹⁵ Ebe no, gʉa dwɛʼ ga mbi ebò e cyen bɨn lé ekœʼ œ. Akœʼ ga ebò e cyen mpʉ bɨgʉ, njɨ mpʉ mɨpɨpɨʼ.

¹⁶ Gʉa bɨlan ga e mopʉla mɨmɛh bɨn lé ebi ɨ, ebe, molu bɨna lé etiʼe ga ma, mé é bebe.

¹⁷ Ebe no, adimle ga pɨʼ. Saŋa ga ó, bɨn saʼ bɨsyɛɛla Da Yesʉs a gwɨm é leme we ó, bɨn saʼ ɛ.

¹⁸ Afwaʼ ga monwoʼ. Mé esa ó, mʉr dimla tiʼ modile ye. Diʼe ga yɛɛ lwɨŋla e Mbɨambɨa Sisim.

¹⁹ Jɛŋɨ ga osam, e bɨjɛɛ mo Zyɛm ndwe e bɨjɛɛ Sisim we lé elɛʼle bɨn ɨ. Jɛŋɨ ga bɨjɛɛ ndɨ e nyɔm le eseʼle Da Yesʉs ɨ, e mɨleme min mimyɛh.

²⁰ É jɔʼ yiyɛh, dweʼ ga Zyɛm Sɔŋ ekiba é lɔb sa yiyɛh, é die mo Tî ga wina Yesʉs-Krɨst.

Mobò mo cyen bʉr ndɨ ejala le ekœʼ œ

²¹ Filɨ ga monyʉl si paʼra win, ebe, bɨn bé edwaabe Krɨst.

²² Bɨn bʉba ɛɛ! Filɨ ga monyʉl si e l'ojʉm bɨn, mpʉ bɨn lé esa-sa Da Yesʉs ɨ.

²³ Ebe, mʉrʉm, nye ó lʉ mo myɛl, mpʉ Krɨst ndɨ lʉ Mbɛr-Zyɛm ɨ. Krɨst nye mʉr tɨʼ ó ndɨ Tiʼbʉr é nko paʼ Mbɛr-Zyɛm, ndɨ nyʉl we e.

²⁴ No ó, jwɨʼ gwar e gwar mpʉ Mbɛr-Zyɛm lé esa Krɨst mojoʼo e, bʉba, bé ejala le esa ojʉm bɔɔ mojoʼo é mozi mɨmɛh.

²⁵ Bɨn bʉrʉm aa! Mʉr nyiwɛh, nye kpɛlɨ myɛl mpʉ Krɨst a kpɛl Mbɛr-Zyɛm ɨ. Nye a si dwè, jala e we.

²⁶ Nye a sa no ó, wé nkʉʼ di waa mo Zyɛm, nye osi pubo we e modibe ndwe e lɔɔ we.

²⁷ Ebe, nye a kpɛl ó, wé nkʉʼ cyɛb é mih me é ncyɛh-ncyɛh: abe e l'ebar, nkʉ mɨlur, nkʉ yʉʉ sɔʼɔ ndɨ é bebe e. Wé ókʉ ka gumo ó njɨ e nye, abe e sa ebebe nye a ngbaa nwahle we e tɨ.

²⁸ No ó, é nko paʼ ojʉm, bé kpɛlɨ bʉba bɔɔ jwɨʼ gwar e gwar mpʉ bé lé ekpɛl bé bʉr o tɨʼ ɨ. Waa nyiwɛh ndɨ ekpɛl myɛl ɨ, nye ó waa ndɨ ekpɛl nye mʉr tɨʼ ɨ.

²⁹ Abe e mʉr lé enwim nyʉl we. Nye edwe-dwe nye mode le ebaʼle nye. Mbi ngwar waa ó Krɨst lé ecwɨa e Mbɛr-Zyɛm ɨ.

³⁰ Ebe, bɨna ga bɨbɛh, bé ó bɨfum bɨ nyʉl we.

³¹ Ebe, yé ó tila ó: «Ebe no ó mʉrʉm óliʼe sɔŋ bé e nyɔŋ we, to nara e mʉma we e. Bé e nɔɔ, bʉr oba, bé ófuʼla ó nya e puno, sʉn ngwar.»

³² Lwib odim nɨ, yé elɛʼle bɨna ga ó bwaʼbwaʼ sɔʼɔ. Yé ó sa yé a taare folɔ, yaa ndɨ etiibe e Krɨst bé e Mbɛr-Zyɛm ɨ.

³³ Sa ndɨ tɨʼ yé ó, mʉrʉm nyiwɛh, nye ejala le ekpɛl myɛl we mpʉ nye lé ekpɛl nye mʉr tɨʼ ɨ. Mʉma nyɛɛ, nye dwaaba njʉm we.