Éfɛsɔs 4 - Kálara Zyɛ̌m Edwán é mpʉ̌n

Mpʉ mʉr lé edi é zyɛŋa ga wina boo Krɨst ɨ

¹ Ebe no, mɛm, mʉr ndɨ mbʉʼ é zyɛŋa wɔɔ boo Da Yesʉs ɨ, me ejwɨʼla e bɨn ó, bɨn kœʼœ mbɨambɨa ebò e cyen Zyɛm a lɛɛ bɨn ó, bɨn kœʼœ œ.

² Filɨ ga monyʉl si paʼra win. Diʼe ga bʉr o ndɨ é tala njwɨr ɨ, le bʉr o bihbe. Dihba ga paʼra win e leme ncwɨncwɨa.

³ Mbɨambɨa Sisim, nye cyɛba bɨn é mɨleme, ó bɨn diʼe é motala paʼra win. ǃƗ mɨleme min, myé óbe si loŋlo e motala maa nɛʼɛ, mbɛr Zyɛm wina, wé ódi ó njɨ egwar, abɔʼa-bɔʼa.

⁴ Nyʉl mo Krɨst, nye ó ngwar. Mbɨambɨa Sisim, nye ó ngwar. Mɨleme ga mina, myé ó mɨlwɨŋla e mbɛla ngwar, waa Zyɛm a gba bɨn é mɨleme é jɔʼ nye a jebe bɨn ɨ.

⁵ Tî ga wina, nye ó ngwar. Bɨna bé emɛʼle ga ó, buʼo gwar. Bɨna bé enʉa ga ó, ndubo ngwar.

⁶ Zyɛm, nye ó njɨ ngwar, Sɔŋ bʉr bɨbɛh. Nye ó lʉ sa yiyɛh, é sa yiyɛh. Nye nteme ó ndɨ é mʉr nyiwɛh tʉŋlʉ.

⁷ Bɨna ga bɨbɛh, bé a be ó si bi mɨndwɛa mɨmbi mɨmbi lé edu mpʉ Krɨst nyɛɛ lé entɨh bɨna ga mya ɛ.

⁸ Ebe, yé ó tila ó: «É jɔʼ nye a bere é jobo kʉ ɨ, yé a be ó, nye mu lé eto gʉʼ e mɨkomo nye a dwih é mpila okomo yɔɔ ɛ. Nye ntɔʼ kab odil o si nwaʼ mɨndwɛa.»

⁹ Ekan ndɨ ó: «Nye a si bere é jobo kʉ» ɨ, lé elɛɛ é yé? No, yé ó, nye a si fulo, ni é si nwa, bana to kpahla é si nwaʼ tʉŋlʉ.

¹⁰ Mʉr a fulo é si nwaʼ ɛ, nye nteme ó b'a bere, laa jobo e l'ejyoo le ebantɛn bibyɛh. Taare é cye yaa, ze kumo é gumo yiyɛh, nye ó ngo jwɨ̀ʼ sa yiyɛh.

¹¹ Nye ó b'a dwe bʉr mɨndwɛa mɨmbi mɨmbi. Nye a sa ó, baʼ bʉr, bé diʼe mɨlʉmlʉ; baʼ, ogwiha o mɨlɔb; bʉʉ, olɛa o Mbɨambɨa Lɔɔ; bʉʉ bʉr nteme, okobla o mɨmbɛr mɨ Zyɛm; bʉʉ, oyeʼle o mɨlɔb mo Zyɛm.

¹² Nye esa no ó, é l'efu e mɨsaŋ mɨ bʉr mo Zyɛm, ó myé beʼ bʉr o ndɨ e nkul eloŋlo syɛɛ ye e. Nye elɛʼle be lé esa no ó, é l'efu le egwɨl Mbɛr-Zyɛm, ndɨ nyʉl mo Krɨst ɨ.

¹³ É mbi waa, bɨna ga bɨbɛh, bé óbe ga ó zyɛŋa, cwɨɨ é zi buʼo gwar. Bɨna bé ógʉa ga Mwan mo Zyɛm é kpɛhla. Bɨna bé óbi ga pɨʼ otamabʉr, ntɔʼ gbabla le elele é mɨpaʼ mimyɛh, lé efuʼla nʉa cye mo Krɨst nye mʉr tɨ.

¹⁴ É jɔʼ yaa ó bɨna bé ópʉʼa ga é l'oncyom é nko paʼ buʼo e. Bɨsikʉlʉ bɨfih, byé aŋa ka ncyeŋ bɨna ga, nkʉ gomlo bɨna ga é zi fih, waa baanya-bɨkʉʉŋʉ ndɨ edu ɨ. Bé egwɨm ó, bé ntaŋa bɨna ga é pɨʼ wɔɔ, le nteme ó, bɨna buʼla sikʉlʉ yɔɔ yaa.

¹⁵ To kœb ó, ǃbɨna si lɛɛ ga ocyecye e leme ncwɨncwɨa nɛʼɛ, bɨna bé ógwɨe le ebwaʼ ga. Bɨna bé ódi ga é zyɛŋa ga wina boo Krɨst, ndɨ lʉ ga wina ɛ.

¹⁶ Nye ó mʉr ndɨ si syɛŋ bɨna ga bɨbɛh, ó bɨna diʼe ga nyʉl ngwar ɨ. Bɨfum bɨ nyʉl waa, nye edira bye é mobɨl e mɨsihe. Mɨsihe myaa ó ndɨ entɛŋ bɨfum bɨ nyʉl bɨsa ndɨ bye e nyɔm ɨ. Sihe wiwɛh, wé ejala le eze nyʉl é nkɔm, lé edu mpʉ Zyɛm a cye wiha ɛ. Nkul we ó ndɨ esa ó, nyʉl waa gwɨa mbɨmbɨa é jɔʼ bʉr o tɨʼ ndɨ e leme ncwɨncwɨa ɛ.

Edwan e tiʼ é zyɛŋa ga wina boo Krɨst

¹⁷ Ebe no ó me lé elɛɛ e bɨn, le eboʼlo é die mo Da Yesʉs ó, yé ajala ó, bɨn kœʼœ ebò e cyen egwar, bɨn e bʉr o ndɨ abuʼla ɛ. Bé ekʉ ka sa ó njɨ baambɛhambɛha o bɨsyɛɛla, ebe, mɨpɛhla myɔɔ, myé ó mbɛh e mbɛh.

¹⁸ Bé ejeʼe mɨlɔb ndɨ edwɛʼ Zyɛm ɨ. Bé e boo nɔɔ, bé abe e nduula. Bé egʉʼla é mɨlɔb mye, le elɨl mɨlʉ myɔɔ.

¹⁹ É sɔɔlʉ pɨʼ wɔɔ, bé a be ó si sa bɨmala zam e l'ekomo, le esa zyee lé elama fwon lé edu njɨ bɨjyɛʼ byɔɔ bibyɛh.

²⁰ Ntʉʼ ebò e cyen laa bɨn bé a yeʼlɔ é jɔʼ bɨn bé a jwɨʼ lé edi é zyɛŋa win boo Krɨst ɨ.

²¹ Bɨn bé a si joʼo bʉr lé eze tublo die le. Bɨn bé a si dweŋɔ sikʉlʉ é lɔb we. Bé a ka gʉa ó, ocyecye, wé ó é Yesʉs tʉŋlʉ.

²² Bɨn bé a yeʼlɔ ó, bɨn bé ejala le ebir mɨnjʉ̌m motum mɨn, sa lé eduho é l'ebò e cyen bɨn bé a kœʼ œ. Bɨgwɨma bɨ nyʉl bɨpuno byaa, byé egomlo bʉr é bebebebe zi.

²³ Bɨn bé ódwanba é pɨʼ.

²⁴ Bɨn bé ófuʼla modwan mo bʉr, tiʼ yin lé enwɨɨla e yaa mo Zyɛm. Nye óbâʼle cye bɨn mɨsaŋ mɨ bʉr mye, baa ndɨ ekœʼ ebò e cyen é l'ocyecye e.

Mpʉ bʉr odwan lé ejala le etiʼe e

²⁵ Daʼ lɛɛ ga mpʉl paʼra win. Mʉr nyiwɛh, nye lɛŋɨ mɨɔ we mʉr njɨ ocyecye, ebe, bɨna ga mu ó bɨfum bɨ nyʉl ngwar.

²⁶ É jɔʼ bɨn lé ekpaa empime e, asa ga syem ebe no. Mʉr beʼ l'abir ó, nye diʼe é bul duo leme, to pyal é modwine mo pum.

²⁷ Mʉr beʼ l'anee Njwɨɨ moleme zi é nye mʉr tɨ.

²⁸ Mʉr a be-be ndiblʉ ɨ, nye gwaʼa díbe. Nye sea syɛɛ ndɨ e nyɔm ɨ, e mobo me, é mbi ndɨ ó, nye diʼe e sa nye ógul baanteʼenteʼe e ye e.

²⁹ Bol lwib l'anyamle pʉʼa é nʉm win, njɨ yaa ndɨ e nyɔm é nko paʼ bʉʉ bʉr ɨ, ó bé gwɨa é buʼo yɔɔ. Yé ó é l'efu ó, Zyɛm sʉʼo bʉr o ndɨ ejoʼo bɨn ɨ, mocyɛʼ mo mpom. Lwib ye, yé diʼe sa ndɨ é bul jala ɛ.

³⁰ Mʉr asa syɛɛla ebebe yé ókwɨɨ Sisim mo Zyɛm ndɨ ti ɨ, empime é leme e. Sisim waa, wé ó mpʉ ejwɨʼ Zyɛm a gba é bɨn ɨ, ejwɨʼ lé elɛʼle ó, nye ódwih bɨn é mpila ebebe lɨn é pololo.

³¹ Pɛʼɛ ga edwie e leme e l'empime é mɨleme min. Adi ga okpɔɔ, e bʉr o montɛɛ ndwe e baanya-movoʼ. Pɛʼɛ ga mobebe mɨmɛh.

³² Diʼe ga e ncwɨncwɨa e nkʉnkoo paʼra win. Pɛʼla ga bɨbaa bɨ ebebe bɨn ndɨ eniʼla paʼra win ɨ, mpʉ Zyɛm a pɛʼ byaa nye a niʼe bɨn dumo e Krɨst ɨ.