Éfɛsɔs 2 - Kálara Zyɛ̌m Edwán é mpʉ̌n

Pɛ̀ha foo

¹ Molu pihe, bɨn bé a be ó odwè é nko paʼ sisim, duho é motie bɨn bé a ntaa ɛ, le mɨsyem min.

² Bɨn bé a taare kœʼ ó, njɨ ebò e cyen le ebebe laa, jwɨʼ gwar e gwar e bʉr o mbi jɔʼ yiʼ bɨbɛh. Bɨn bé a tiʼe no ó, lé edu motɨɨ mo njwɨɨ mbi jɔʼ yi, waa ndɨ cyela é dia taʼa ye paʼra jobo e l'ejyoo le ebantɛn ɨ. Sisim waa ó lé ecyɛb bʉr é mɨleme é banana, baa lé esa Zyɛm ebɨh ɨ...

³ Bɨna bɨbɛh, bé a taare kœʼ ga ó, ebò e cyen egwar laa. Bɨna bé a kʉ saa-saa ga ó, njɨ edu bɨgwɨma bɨ nyʉl bɨpuno ga wina. Bɨgwɨma byaa ó b'a bul pebre-pebre bɨna ga é mɨleme. Sa yé a kʉ jala e bɨh oYʉden ɨ, yé a be ó, Zyɛm kpaŋa empime le e bɨh, jwɨʼ gwar e gwar mpʉ nye a jala le ekpaa e bʉr o ndɨ abe oYʉden ɨ.

⁴ To kœb ó, Zyɛm, nye é bul jwɨʼ bɨna ga nkoo. No ó nye a ze lɛʼle bɨna ga mpʉ nye a bul kpɛl bɨna kpɛl apurapura ɛ.

⁵ É jɔʼ bɨna bé a be ga odwè é nko paʼ sisim, duho é motie bɨna bé a ntaa ga ɛ, nye a si bana pɛ̀h bɨna ga é mofoo é jɔʼ nye a pɛ̀h Krɨst é we foo e,— bɨn bé a bi tiʼ molu mo mpoʼ mɨmɛh ó, é zi ncwɨncwɨa Zyɛm a lɛʼle bɨn ɨ.

⁶ Zyɛm a si pɛ̀h bɨna ga e boo Yesʉs-Krɨst é mofoo, ntɔʼ dil bɨna ga e boo nɔɔ é dia taʼa é jobo kʉ, é zyɛŋa wina boo Krɨst.

⁷ Nye a cwɨa e bɨna ga no ó, nye nkʉʼ lɛʼle kpɛl ye ndɨ apurapura sɔʼɔ ɛ, sa lé elaa yʉʉ sɔʼɔ é mpwaʼ ɛ. Kpɛl ye yaa, yé ónyin pie e l'esie e mbi jɔʼ yi. Bɨna bé ebi ga ncwɨncwɨa we ó, é zyɛŋa ga wina boo Yesʉs-Krɨst.

⁸ Ebe, bɨn bé a bi tiʼ molu mo mpoʼ mɨmɛh ó, é zi ncwɨncwɨa mo Zyɛm, é zi buʼo. Tiʼ yaa, yé aduho é bɨn bʉr o tɨ. Yé ó etʉm Zyɛm a ntɨh bɨn ɨ.

⁹ Nye a baacwɨa e bɨn ebe yʉʉ mpaŋ syɛɛla yin. Ndwe nteme, yé ajala ó, mʉr doʼa e nye mʉr tɨ.

¹⁰ Bɨna ga bé ó baa Zyɛm a kpaʼ e mobo me nye mʉr tɨʼ ɨ. Nye ntɔʼ ze dil bɨna ga é Yesʉs-Krɨst dil dilɨ é l'efu ó, bɨna diʼe ga bʉr bé ósa bɨsyɛɛla bɨ ncwɨncwɨa ɛ. Zyɛm nye mʉr tɨʼ ó b'a bɛa tiʼe é leme we ó, bɨna saʼ ga nye bya.

Bɨna ga mu ó mʉr ngwar é zyɛŋa ga wina boo Krɨst

¹¹ Toŋla ga ebyɛl lɨn. Bɨn, bʉr o ndɨ abe oYʉden ɨ, bɨn bé ó baa oYʉden lé ejebe ó, bʉr o ndɨ asaŋɔ mpʉn ɨ. Tina, yé ó, bʉr o ndɨ ejebe bɨn no e, bé ejebe bé bʉr o tɨʼ ó, baa b'a saŋɔ mpʉn ɨ. To kœb ó, mpʉn bé a saŋɔ ɛ, bʉr, bé a sa be nya ó, njɨ é nyʉl.

¹² Toŋla ga nteme mpʉ bɨn bé a taare be-be e. É til molu yaa, Lœma mulo mo Zyɛm a baakunbo e bɨn. É nko paʼ kul bwa b'Ɨzraɛl, bɨn bé a si pɨmɔ é sama yɔɔ, duho mya. É nko paʼ mpʉn Zyɛm a de e bɨmpam byɔɔ ɛ, ndwe e monkɛʼ nye a liʼe bye e ma ɛ, bɨn bé a baabe ba e nkɔb tɨ. É til molu yaa yiyɛh, mɨleme min, myé a baabe ba e mbɛla. É si nwaʼ nyiwɛh, bʉr o bɨkul bin, bé a be ó, lé ejeʼe Zyɛm.

¹³ To kœb ó, banana, bɨn mu ó é zyɛŋa win boo Yesʉs-Krɨst! Bɨn bʉr o b'a taare be é ncɛra e Zyɛm ɨ, bɨn mu ó kunokuno e nye, cwɨɨ é zi motié mo Krɨst.

¹⁴ Ebe, Krɨst nye mʉr tɨʼ ó b'a ze dwe bɨna ga motala. Nye ó b'a sa ó, oYʉden ndwe e baa ndɨ abe oYʉden ɨ, bé diʼe kul gwar. Mpʉ nye a bir nyʉl we ó, nye dwèʼ e, tɨʼ ó nye a buʼo pɨpɨm yé a bɛʼ-bɛʼ bɨna ga ó, bɨna siila ga paʼra ga wina ɛ.

¹⁵ Nye a gba motala paʼra ga wina ó, é jɔʼ nye a pɛʼ motie mo Moyiz le mompene ndwe e mɨtiʼa mimyɛh ɛ. Nye a pɛʼ bye ó, nye nkʉʼ nʉa bɨkul bɨba ga bina, ntɔʼ syɛŋ bye é nye mʉr tɨ, byé nkʉʼ fuʼla edwan e kul, nwɨɨla e mʉr ngwar.

¹⁶ É jɔʼ nye a cyèlɔ é klos ɨ, nye a si sa sàa paʼra ga wina boo Zyɛm, lé esa ó, bʉr o bɨkul bɨba ga bina byaa, diʼe mpʉ mʉr ngwar. Bɨna bé a ka gwaʼ lé esiila paʼra ga wina ó, é jɔʼ nye a dwè e.

¹⁷ Krɨst a ze é si nwaʼ ó, nye ntaʼ, ze tuno bɨn, bʉr o b'a be é ncɛra e nye e, lɔɔ wi: Zyɛm, nyi gba motala paʼra ga wina boo nɔɔ. Nye a tuno lɔɔ motala ngwar e ngwar waa nteme ó, boo bɨh oYʉden, dam be mpʉ bɨh bé a be-be kunokuno e Zyɛm ɨ.

¹⁸ Bɨkul bɨba ga bina dihla kunokuno e Zyɛm Sɔŋ, lé ecwɨɨ é zi Mbɨambɨa Sisim ngwar. Bɨna bé esa ga no ó, dumo e Krɨst.

¹⁹ Ebe no, bɨn bé aka be mɨndìndìl nkʉ mɨngbaalaŋa. Bɨn mu ó bʉr mo Zyɛm jwɨʼ gwar e gwar e mɨsaŋ mɨ bʉr be. Bɨn e boo nɔɔ, bé mu ó bʉr o mbɛr bʉr mo Zyɛm.

²⁰ Bɨn bé ó mpʉ obrik bé a bɨr pab mbɛr e be e. Nkan mbɛr nyɛɛ ó ndɨ mɨlʉmlʉ, bé e l'ogwiha o mɨlɔb. Yesʉs-Krɨst nye mʉr tɨʼ ó ndɨ ekoʼ lé esa ó bɨpab bɨ mbɛr, byé diʼe ocɨcyel ɨ.

²¹ Nye nteme ó lé efumo mbɛr waa, lɨl we, le ebœʼ we. Nye esa no ó, wé diʼe ti é l'efu ó, Da Yesʉs nkʉʼ kœb mpaŋ odia we nye ódi tɨʼ ɨ.

²² Da Yesʉs ó lé esa nteme ó, bɨn cyelɔ é bɨcye bin, mɨfuma é l'odia Zyɛm ódi ɨ. Sisim we ó ndɨ elɛʼle bɨgumo bɨn lé ejala le ecyɛb é odia waa ɛ.