Ebrœ̂ 9 - Kálara Zyɛ̌m Edwán é mpʉ̌n

Mɨtiila é lɔb duu obuʼla, bé ejala le esea e Zyɛm é mbɛr kan we e

¹ Sàa Zyɛm a cyel dumo e Moyiz ɨ, a be ó e we mbi motum e mɨtiʼa lé edwɛʼ mpʉ mʉr lé ejala le edwiibɨ Zyɛm ɨ. Nye a lɛɛ nteme ó, yé ó e yʉʉ gumo é si nwaʼ é l'efu le Odia mo Zyɛm ndɨ e l'ekɛn ɨ.

² Gumo yaa, yé a be ó Saʼ Nɨnɨ mo Zyɛm. Yé a fumɔ ó, é mbi wi: epɛn, lé a be ó tɨ. Bé a jebe-jebe le ó, Epɛn ndɨ e l'ekɛn ɨ. Tɨʼ tʉŋlʉ, yé a be ó e cye elama ndwe e teble. Bler yé a be koma é nko paʼ duu mo Zyɛm ɨ, yé a komɔ-komɔ ó, é teble waa kʉ.

³ Yé ó e guu kan ndɨ ela ebe e. Wiha kan ebe, wé ó waa mba para a be lé ebɔma e we é jɔʼ nye a ni é Saʼ Nɨnɨ mo Zyɛm ɨ. É kan ebe waa pihe, yé a be ó e tiʼe yé a be die ó, Tiʼe ndɨ e l'ekɛn é buobuo e.

⁴ Taa mɨndwɛa, yé a be ó tɨ, yaa yé a kpaʼɔ e gol ɨ. Bé a si tira-tira duro tɨʼ kʉ, lé ediʼ-diʼ ndwam. Yé a be nteme ó e Wolo sàa. Wolo yaa, yé a si gbaŋɔ gol é mɨpaʼ mimyɛh. É Wolo sàa tʉŋlʉ, bé a si komo mpɨ a kpaʼɔ e gol ɨ. Nye a be ó lwɨŋla e manne. É Wolo sàa, yé a be nteme ó e fumo mo Arɔn wé a pah bɨka ɛ. É wolo yaa, yé a be nteme ó e bɨpeh mokoʼ bɨba, e mɨtila: motie mo Njʉ̌m Sàa.

⁵ Yé a be nteme ó e mbuura Wolo sàa, gumo bé a myɛʼ-myɛʼ motié mé a leʼe-leʼe empime mo Zyɛm ɨ. É mbuura waa kʉ, yé a be ó e bɨdweʼle bɨ okerʉbim oba. Mompaba mɔɔ, mé a be ó mɨsyɛma, lé esa duʼbo é nko paʼ mbuura. Bé ó b'a be lé elɛʼle ó, Zyɛm, nye ó tɨʼ é gumo yaa. Bɨna bé abe e nkul epu bɨsa byaa si wâʼ é banana.

⁶ Jɔʼ bé a sil komlo bɨsa byaa bibyɛh ndwe le etaʼ bye é bɨcye byɔɔ ɛ, opara bɛɛ ze taare lé eni-ni é l'Epɛn ndɨ e l'ekɛn ɨ. Bé a dɨ sa no ó, é tititi, lé eto le eloŋlo syɛɛ yɔɔ gʉ.

⁷ Sa gwar, njwɨɨ opara nye ome ó b'a ni-ni é Tiʼe yé a be e l'ekɛn é buobuo e. Nye a kʉ ni-ni tɨʼ ó, njɨ é jɔʼ gwar é mbu. Nye a to-to gʉʼ ó e fua motié mo otir, ó Zyɛm nkʉʼ pɛʼ bɨbaa bɨ ebebe nye a pa niʼe e: le byaa mo para, é lɔb mɨsyem mye nye mʉr tɨ, ndwe e byaa bɨ bʉʉ bʉr é lɔb mɨsyem bé a sa, bɛɛ l'agʉa ɛ.

⁸ Mbɨambɨa Sisim, nye elɛʼle bɨna ga é lɔb waa ó, jyɛm Saʼ Nɨnɨ mo Zyɛm, yé a be, yé dina lé ecyɛb cɨcyel ɨ, zɨze mʉr, wé a baabe e nkul ekœb zi mbeʼ ndɨ ó, wé kuma é Tiʼe yé a be e l'ekɛn é buobuo e.

⁹ Yiʼ, yé ó dweʼle, sa lé elɛʼle bɨna ga mpʉ yé ndɨ é bananaʼ ɛ. Bʉr, bé dam dwe Zyɛm wáa mbi mɨndwɛa e motwina, byé abe e nkul epubo be é mɨpaʼ mimyɛh. Mɨpɛhla mɨleme myɔɔ, myé abe e nkul ebula di é pyɛɛɛ é zi waa.

¹⁰ Zyɛm a nʉa tiʼa ó, bʉr, bé ódu mbi motie myaa ó, to pyal é jɔʼ nye óka komlo mozi bʉr, bé ójala le edu ɨ. Motie mo efoʼ monɨ, mé a kʉ dwɛʼ ó, njɨ bɨsa bɨ tiʼ mʉr kaʼ si. Mé a lɛʼle nye ó, mɨmbi monyɔmlʉ le monyʉla myé a jala le edeŋɔ ɛ, ndwe mpʉ bʉr lé ejala le edubo bɨsɔʼɔ é modibe lé epub bye e.

Motié mo Krɨst

¹¹ Krɨst, nye mu ó si nʉa dia njwɨɨ opara, ntɔʼ ze kab bɨna ga bɨsa bɨ embɨa bɨna lé ebono ga ɛ. Nye esea syɛɛ ye yaa ó, é Saʼ Nɨnɨ mo Zyɛm yé a be, afumɔ e mobo mo bʉr ɨ. No yé ó, yé abe lé egumo e si nwa. Yé elaa Saʼ Nɨnɨ mo Zyɛm yé a taare be e, é l'ompwaʼ ndwe e l'ombɨmbɨa é mɨpaʼ mimyɛh.

¹² É jɔʼ Yesʉs a ni é gumo yé a be e l'ekɛn ɨ, nye a baanʉa fua motié bɨkɨla, nkʉ maa mo bwa bɨntɛɛ. Motié nye a nʉa, ze ni e me e, mé a be ó maa me nye mʉr tɨ! Nye ze to ni tɨʼ é jɔʼ gwar é bɨjɔʼ bibyɛh, ó nye nkʉʼ dwih bɨna ga é mpila ebebe lɨna é pololo.

¹³ É mpʉ ontɔɔ o motie, bé lé elœʼ bé bʉr o tɨʼ é mih mo Zyɛm ɨ, bé lé eka pubɔ é nko paʼ monyʉl mɔɔ ó, e motié bɨntɛɛ ndwe e maa bɨtab, le mofii mo ma myɛl ntɛɛ. Sa opara onɨ, bé a koʼo e, yé a be ó epubo be monyʉl e motié maa.

¹⁴ No ó, Krɨst nyɛɛ, nye elaa naa! Nye ópubo mɨleme ga mina e me motié, ó mɨpɛhla mɨleme ga mina nkʉʼ liʼ é pyɛɛɛ, myé l'aka toŋlo bɨsyɛɛla bɨ ebebe ga bina. É mbi waa ó bɨna bé ódwiibɨ ga Zyɛm ndɨ kublakubla ɛ. Ebe, é zi Mbɨambɨa Sisim lé edi njʉmdia e njʉmdia ɛ, nye a be ó si dwe Zyɛm Sɔŋ nyʉl we. Ndwɛa nyʉl we, wé ó b'a kʉ jala e bɨna, lé epɛʼ mɨsyem bɨna bé a sa ga ɛ. Wé nteme ó ndɨ e l'ombɨmbɨa é mɨpaʼ mimyɛh.

¹⁵ Ebe no ó Krɨst ndɨ mosàa-mɔm lé eduula paʼra wina boo Zyɛm ɨ. Nye a cyelɔ é dia mosàa-mɔm yaa ó, Zyɛm nkʉʼ de edwan e mpʉn ɨ. Nye a de mpʉn waa ó, e bʉr nye a jebe e, ó bé biʼe tiʼ molu mo mpoʼ mɨmɛh nye a kɛʼ be e. Ebe, Krɨst a si kɛha tiʼ ye lé ejala e mɨsyem ga mina, ó nye kʉrɨ bɨna ga. Mɨsyem myaa, myé a dɨ mɛr bɨna ga ó, taare é jɔʼ bɨna bé a be ga é mpʉn nye a taare de e bɨmpam ga bina ɛ.

¹⁶ ǃƗ mʉr si tile kalara bɨliʼ, ntɔʼ dwè nɛʼɛ, bʉr, bé óbono, to pyal é jɔʼ bé óbe si pa bee dweʼle, sa lé ekʉ lɛʼle ó, mʉr a tile e, nyi dime mih ɨ. ǃBé si bee dweʼle yaa nɛʼɛ, bé òkabla bɨliʼ bye é jɔʼ yaa.

¹⁷ Yé be ó, mʉr a tile kalara bɨliʼ waa ɛ, nye dina kʉ nɛʼɛ, bʉr, bé abe e nkul enʉa kalara waa, gba é nkɔb. Mɨtila mɨ tɨ, myé óka gbaŋɔ é nkɔb ó, njɨ pie e l'efie e mʉr waa.

¹⁸ Njʉ̌m Sàa Zyɛm a cyel paʼra wɔɔ boo bwa b'Ɨzraɛl ɨ, wé a taare nʉa nkul ó no, é jɔʼ motié mo otir, mé a swɨɨ si ɨ.

¹⁹ É jɔʼ Moyiz a be, nye mu si láa bwa b'Ɨzraɛl bɨbɛh motie mo Zyɛm mɨmɛh ɛ, nye a si tiʼe bwa bɨntɛɛ ndwe e bɨkɨla, ze nʉa motié mɔɔ, ze syɛŋ me e modibe. Nye ze nʉa ebuho le ɨzɔb ndwe e mye bɨntœme, mé a dubɔ é kaa ɛ, ze nʉa ebuho laa, dubo le é motié, ze dɨ pubo mbom okalara o motie baa, ndwe e bʉr baa bɨbɛh.

²⁰ Nye a lɛɛ e be ó: «Maʼ, mé ó motié lé eboʼlo mpʉn Zyɛm mu lé ede e bɨna ga ɛ. Zyɛm, nye elɛɛ bɨna ga ó, bɨna duʼo ga motie ndɨ mɨtila é lɔb mpʉn waa ɛ.»

²¹ Moyiz a be nteme ó, si pubo Saʼ Nɨnɨ mo Zyɛm e motié mompwar maa, pubo nteme bɨsa bibyɛh nye a dɨ bi é jɔʼ nye a dɨ dwiibɨ Zyɛm tɨʼ ɨ.

²² Motie Zyɛm a tiile e, mé elɛɛ ó, opara, bé puba kunokuno e bɨsa bibyɛh e motié mo otir. Cye yiyɛh motié l'apa swɨɨ si ɨ, Zyɛm, nye apa pɛʼ mʉr bɨbaa bɨ ebebe nye a niʼe nye e.

Ndwɛa mo Krɨst, wé ó ndɨ epɛʼ ebebe

²³ Ebe no, yé a kʉ jala ó, bʉr puba bɨsa bɨ si nwaʼ e motié mo otir, ebe, byaa bɨ si nwaʼ, byé ó njɨ bɨdweʼle, bɨsa lé elɛʼle byaa bɨmpa ndɨ é jobo kʉ ɨ. No ó, yé a kʉ jala ó, bɨsa bɨ jobo kʉ, byé pubɔ é zi mpaŋ motwina. Mɨha motwina, mé ó ndɨ é bul buo dime, laa maa mo efoʼ.

²⁴ Ebe, odia mo Zyɛm ndɨ e l'ekɛn, waa bʉr, bé a fumo e, ntʉʼ odia waa Krɨst a ni ɨ. Wiha, wé a be ó zɨze dweʼle, sa lé elɛʼle mpaŋ odia mo Zyɛm ndɨ é jobo kʉ ɨ. Mpaŋ odia waa ó nye a ni. Nye mu ó lé edi tɨʼ é jobo kʉ é l'efu ga lɨna, lé ecyɛb é mih mo Zyɛm Sɔŋ.

²⁵ Njwɨɨ opara, nye eni-ni é Tiʼe ndɨ e l'ekɛn é buobuo e, lé esa no mbu wiwɛh. Motié nye lé enʉa é jɔʼ yaa ɛ, mé abe maa me. Krɨst nyɛɛ a baani-ni é jobo zɔʼ e zɔʼ, lé eto dwe Zyɛm nyʉl we.

²⁶ Nkʉ Krɨst a be ó be, be lé edwe Zyɛm nyʉl we zɔʼ e zɔʼ tɔɔ motwina nɛʼɛ, mpa nye a be ó si bee tuu zɔʼ e zɔʼ, duho é l'etɛɛrɨ e si nwaʼ ɛ. To kœb ó, nye a kʉ ka nyin é si nwaʼ ó njɨ é jɔʼ gwar e gwar é kpɔŋ. Yé a be ó é jɔʼ esie e mbi jɔʼ yi, lé a pyal bɨna ga ɛ. Nye ze kɛha nyʉl we, lé epɛʼ bʉr bɨbaa Zyɛm a niʼe be é lɔb mɨsyem myɔɔ é jɔʼ gwar é bɨjɔʼ bibyɛh.

²⁷ Sa Zyɛm a komo é l'efu e bʉr ɨ, yé ó efie. Mʉr, nye edwè njɨ é jɔʼ gwar, ntɔʼ to tiʼɔ mɨlɔb é mih mo Zyɛm.

²⁸ Jwɨʼ gwar e gwar yaa nteme e Krɨst. Nye a kʉ ka dwè ó njɨ é jɔʼ gwar é l'efu ó, nye jala e mɨsyem mɨ bʉr é buobuo. É dobo nye óbula ze e, nye aŋa bâʼle dwih bʉr é mpila ebebe lɔɔ. Zea nye óze e, wé óbe ó, lé edwe bʉr o ndɨ ebono nye e, tiʼ molu mo mpoʼ mɨmɛh.