Ebrœ̂ 8 - Kálara Zyɛ̌m Edwán é mpʉ̌n

Yesʉs, njwɨɨ opara ndɨ lʉ sa yiyɛh ɛ

¹ Lʉ ekan é bɨsa bɨh lé elɛɛ bɨn ɨ, wé ó wi: bɨna ga bé ó e mbi njwɨɨ opara waa, ndɨ e nkul eloŋlo syɛɛ yaa yiyɛh ɛ. Nye ó ndindil é mbo ejʉm mo waa ndɨ e mojwɨ̀ʼa monɨnɨ é jobo kʉ ɨ.

² Nye esea syɛɛ njwɨɨ opara ye ó, é l'Odia mo Zyɛm ndɨ e l'ekɛn ɨ. Tina, yé ó, nye esea ó, é mpaŋ Saʼ Nɨnɨ, yaa Da nye mʉr tɨʼ a fumo e. Yé abe fuma mobo mo bʉr.

³ Njwɨɨ opara nyiwɛh, nye cyela é dia para ye ó, nye dweʼ Zyɛm mɨndwɛa ndwe e motwina. Ebe no, yé ekʉ jala ó, nye pyala boo Zyɛm e sa nye ódwe nye e.

⁴ Nkʉ Yesʉs be ó be, be é si nwaʼ nɛʼɛ, mpa nye asea syɛɛ para ka, ebe, yé e l'opara ofih lé edwe Zyɛm mɨndwɛa, lé edu mpʉ motie lé elɛɛ ɛ.

⁵ Opara bɛɛ, bé esea-sea ó, é tiʼe ndɨ é l'efu le edwe Zyɛm kum ɨ. Tiʼe yaa, yé a saŋɔ ó, lé edu dweʼle Saʼ Nɨnɨ mo Zyɛm ndɨ é jobo kʉ ɨ. No ó, é jɔʼ Moyiz a be ó, nye fumo ó Saʼ Nɨnɨ mo Zyɛm ɨ, Zyɛm a lɛɛ e nye ó: «Gʉa komlo sa yiyɛh lé edu dweʼle saʼ go a lɛʼlɔ é l'ecwɨʼ kʉ ɨ.»

⁶ Syɛɛ para Yesʉs lé esea é l'efu ga lɨna é bananaʼ ɛ, yé e nyɔm é buobuo, laa syɛɛ para yé a duho mya ɛ. Nye ó ndɨ mosàa-mɔm lé esa ó, Zyɛm deʼ Edwan e mpʉn e bwa b'Ɨzraɛl ɨ. Edwan e mpʉn nye a de e, lé é bul mbɨa, laa mpʉn Zyɛm a de e be e. Lé nteme, lé ó e molele ebe monkɛʼ bɨna bé a bi ga ɛ. Monkɛʼ maa, mɨ laa maa mo mpʉn efoʼ é l'embɨa.

⁷ Nkʉ mpʉn Zyɛm a taare de e bwa b'Ɨzraɛl ɨ, a be ó be, alɨŋa ba nɛʼɛ, mpa nye a baade mpʉn, cwɨɨ é motié mo Yesʉs.

⁸ Sa gwar, Zyɛm a be ó si tɛɛ bʉr o mpʉn efoʼ waa, lé elɛɛ ó: «Da, nye elɛɛ ó: “É molu mé ndɨ eze e, me óde edwan e mpʉn e bwa b'Ɨzraɛl bé e bʉr o Yʉda.

⁹ É jɔʼ me a mɛr bɨmpam byɔɔ e mbo, pɛʼ be Egipten ɨ, me a be ó si de mpʉn e be. No ó, mpʉn me óka bâʼle de e bʉr ɨ, nye aŋa ka be mpʉ nyiha. Bé a baakœʼ ebò e cyen lé a jala e bʉr me a de mpʉn e be e. Ebe no ó me a baaka be e buʼ e be. Lwib mo Da ó nɨ!”

¹⁰ Ebe no ó Da lé elɛɛ ó: “Pie molu maa, mpʉn me óde e bwa b'Ɨzraɛl ɨ, nye óbe ó, é mbi wi: Me ógba motie mam é mɨpɛhla myɔɔ. Motie maa, mé óbe nteme ó mɨtila é mɨleme myɔɔ. Me óbe ó Zyɛm wɔɔ; bɛɛ, bé óbe ó baa bam.

¹¹ Yé ákwoʼ ka be e mʉr ógum ka yeʼle fo we, nkʉ mɨɔ we, lé elɛɛ ó: ‘Pa tɨ! Me paʼ lɛʼle go mpʉ bɨna lé ejala le egʉa ga Da é kpɛhla ɛ,’ ebe, bɨbɛh, bé ógʉa me é mbi waa, taare é bwɔɔncyom, to pyal é l'otamabʉr.

¹² Me ójwɨʼ be nkoo é lɔb bɨsyɛɛla bɨ ozyɛhozyɛh byɔɔ. Me aŋa ka toŋlo mɨsyem myɔɔ.”»

¹³ É mpʉ Zyɛm a jebe mpʉn mba nye a de ó, «edwan» ɨ, nye a si liŋ mpʉn efoʼ mbor. No ó, sa mu mbor, nkʉ yaa mu si jwɨm ɨ, yé mu nteme ó kunokuno le edim yiyɛh.