Ebrœ̂ 7 - Kálara Zyɛ̌m Edwán é mpʉ̌n

Mɛlkisedɛk, mʉr a taare be njwɨɨ opara ɛ

¹ Mɛlkisedɛk waa a be ó njwɨɨbʉr Salɛm. Nye nteme a be ó para mo Zyɛm ndɨ Lʉ bɨsa bibyɛh ɛ. É jɔʼ Abraham a to é dɔm, ntɔʼ bula, nye osi jʉ bʉr o dɔm be e, Mɛlkisedɛk a be ó si to, to bɔma e nye, ntɔʼ ze sʉ nye mocyɛʼ mo mpom le esyɛɛ nye mocyeele.

² É bɨsa bibyɛh Abraham a bula e bye, duho é dɔm laa ɛ, nye a be ó si pɛʼ nkɔb ewʉm, dwe Mɛlkisedɛk. Die le, lé lé edwirɔ ó, lé edwirɔ ó: «Njwɨɨ ndɨ etiʼe é l'ocɨcyel ɨ». Mpʉ nye a be njwɨɨbʉr Salɛm ɨ, nkʉŋ we, «njwɨɨbʉr Salɛm», wɛɛ, wé edwirɔ ó, «njwɨɨbʉr lé egba motala paʼra bʉr e bʉr ɨ.»

³ Yé abe e mʉr ndɨ egʉa sɔŋ nkʉ nyɔŋ mo Mɛlkisedɛk. Abe e mʉr a be e nkul eláa ntan ye. Mʉr, nye agʉa mpʉ Mɛlkisedɛk a byɛl ɨ, agʉa nteme nkʉ nye a si ka dwè. É paʼ waa, nye enwɨɨla ó e Mwan mo Zyɛm. Nye ó é dia para ye njʉmdia e njʉmdia.

⁴ Mbe ga! Abraham, sɔŋ bwa b'Ɨzraɛl bɨbɛh, a be ó mʉr nɨnɨ, nye nteme lé edwe Mɛlkisedɛk nkɔb ewʉm é bɨsa nye a bula e bye é dɔm ɨ.

⁵ Bʉr o b'eveh mo Levi, bé ome ó ndɨ enʉa dia para. Etie, lé edwe be nkul nteme ó, bé nʉŋa peh bɨsa bibyɛh bwa b'Ɨzraɛl lé ebi ɨ, jala e nkɔb ewʉm. Bé ebi-bi nkɔb waa ó, é mobo mo obɨɔ bɔɔ, dam ka be ó é mobo mo mpoŋbʉr mo Abraham.

⁶ To kœb ó, Mɛlkisedɛk a baabe mʉr eveh mo Levi! Dam be no, nye a be ó si sa ó, Abraham dweʼ nye nkɔb ewʉm. Mɛlkisedɛk ntɔʼ syɛɛ Abraham mocyeele, nyɛɛ mʉr a bi monkɛʼ mo Zyɛm ɨ.

⁷ Abe e mosono, syɛɛ-cyeele, wé elaa waa ndɨ esyɛɔ mocyeele e, é nkʉŋ.

⁸ No ó, bɨna bé a be ó si bee ga mpʉ bʉr o b'eveh mo Levi bé a nʉa-nʉa nkɔb ngwar é monkɔb ewʉm, bɛɛ nteme lé edwè e. É guu paʼ, bɨna bé ebee ga mpʉ Mɛlkisedɛk lé enʉa nkɔb waa, nye yɛɛ mʉr dina kʉ ɨ, mpʉ bé a boʼlo e.

⁹ Bɨna bé óbɛm lɛɛ ga, abœʼ lɔɔ ó, Levi a si jɛna we nkɔb nteme, cwɨɨ é sɔŋ mpam we Abraham, ntɔʼ dwe Mɛlkisedɛk nya, Levi waa nteme nwɨa nkɔb ewʉm.

¹⁰ Ebe, mpʉ Levi a be, apa byɛl ɨ, yé a be ó mpʉ sa lɛɛ ó, nye a be ó, nye dina é nyʉl mo sɔŋ mpam we Abraham tʉŋlʉ é jɔʼ Abraham bé e Mɛlkisedɛk, bé a bɔma ɛ.

Yesʉs, nye ó mpʉ mo Mɛlkisedɛk

¹¹ Dia para bʉr o b'eveh mo Levi, bé a di-di ɨ, yé ó b'a be etin e motie mé a cyelɔ bwa b'Ɨzraɛl ɨ. Nkʉ oLevit baa, bé a be ó be, be e nkul epubo bʉr é mɨpaʼ mimyɛh nɛʼɛ, mpa yé a baaka be e nyɔm ó, nuu para fih dila be, nyɛɛ nteme lé ecyelɔ para é l'esama le opara mo Mɛlkisedɛk. Nye a ngbaa be ó é l'esama le opara mo Arɔn.

¹² Yé be ó, lɨʼ esama le opara, lé mu ó si siila lʉʉ nɛʼɛ, yé ekʉ jala nteme ó, yé beʼ ndwe e modwan motie.

¹³ Bɨna bé egʉa ga ó, mʉr lé elwibɔ é lʉ we e, a baabyɛl é l'eveh mo Levi. Nye a byɛl ó, é l'eveh efih. Yé abe e mʉr eveh laa a cyelɔ é dia ediʼ mɨndwɛa é taa mɨndwɛa.

¹⁴ Bʉr bɨbɛh, bé egʉa ó, Tî ga wina a byɛl ó, é l'eveh mo Yʉda. No ó, Moyiz a baalɛɛ ó, mʉr eveh laa óbɛm nʉa dia para.

¹⁵ Sa bɨh lé elɛɛ ɛ, ocyecye o tɨ, wi nyin bʉr é mih é pono, ebe, para fih mu ó si pyal é l'efu le esea syɛɛ yaa, nye nteme lé ecyelɔ mpʉ Mɛlkisedɛk a cyelɔ ɛ!

¹⁶ Nye a baanʉa dia para ye ebe mbyɛla we. Nye a cyelɔ é dia njwɨɨ opara ó, é lɔb nkul we, le tiʼ ye ndɨ njʉmdia e njʉmdia ɛ.

¹⁷ Ebe, Kalara Zyɛm, nye eboʼlo, tiibe e nye ó: «Go ódi para ó njʉmdia e njʉmdia. Go ó é l'esama le opara mo Mɛlkisedɛk.»

¹⁸ Zyɛm a si gbɛɛ motie mo efoʼ, ebe, mé a baabe e nkul. Mé nteme, mé a baabe bʉr e ma nyɔm.

¹⁹ (Ebe, motie mo efoʼ maa, mé a baabe e nkul esa ó, mʉr kuma é l'ombɨmbɨa é mɨpaʼ mimyɛh.) No ó, sa lé elaa motie maa ɛ, yi pyal! Yé ó mbɛla ndɨ bɨna ga é mɨleme e. Wé ó ndɨ esa ó, bɨna dihla ga kunokuno e Zyɛm.

²⁰ Yʉʉ sɔʼɔ nteme ó yi: cyela Zyɛm a cyel Da é dia para ɛ, wé a be ó, nye osi taare de mɨnkɛla! To kœb ó, é jɔʼ bʉʉ bʉr bɛɛ, bé a nʉa-nʉa dia yaa ɛ, Zyɛm a baade mɨnkɛla.

²¹ Zyɛm a de mɨnkɛla é lɔb we ó, é jɔʼ nye a lwib e nye e. Yé ó tila ó: «Da a si de mɨnkɛla. Nye aŋa siila tiʼa nye a nʉa ɛ. Nye a lɛɛ ó: “Go ódi para ó njʉmdia e njʉmdia.”»

²² Mpʉ Zyɛm a de mɨnkɛla no e, nyi ze cyel Yesʉs é cye mʉr ndɨ ekamle e mpʉn nye a de e bʉr, waa ndɨ é mbɨa, laa njʉ̌m sàa ɛ.

²³ Esama le opara emya, lé a be ó e l'opara é buobuo, ebe, bé a be ó, nwaʼ dwè, nuu dila, to-toʼ. Efie, lé ó b'a kamle nuu mʉr é l'esama lɔɔ lé eliʼ é dia yaa é bɛabɛa.

²⁴ To kœb ó, mpʉ Yesʉs ndɨ njʉmdia e njʉmdia ɛ, nye ebaʼle dia para yaa ó nye ome.

²⁵ Ebe no, bʉr o ngo dihle kunokuno e Zyɛm dumo e nye e, nye e nkul edwe be tiʼ molu mo mpoʼ mɨmɛh. Nye ekʉ pɛʼ mobebe mɔɔ mɨmɛh. Mpʉ nye lé edi njʉmdia e njʉmdia ɛ, no nteme ó nye ndɨ e nkul esa Zyɛm mɨnjwɨʼla é l'efu lɔɔ é jɔʼ yiyɛh ɛ.

²⁶ Nye ó mbi njwɨɨ opara wé a kʉ jala e bɨna ga ɛ. Nye ó mʉr ndɨ ti, waa ndɨ akunbo e mpɨŋ ɨ. Sa ndɨ elœʼ mʉr é mih mo Zyɛm ɨ, yé akunbo e nye. Bé e l'osyɛl o mɨsyem, bé ó e bwaʼbwaʼ mbɛʼ. Nye nteme, nye ó mbɨna kʉ, laa jobo e l'ejyoo le ebantɛn.

²⁷ Nye abe mpʉ bʉʉ ojwɨɨ be opara, bé a be-be e. Nye abe é nkara ó, nye taara dwe motwina é dobo lɨlɛh lé ejɛna mobyaʼ é lɔb mɨsyem mye, pie tɨ, é lɔb myaa mɨ bʉʉ bʉr, ebe, nye a si kʉ bɛa dwe Zyɛm tiʼ ye tɔɔ motwina é jɔʼ gwar é bɨjɔʼ bibyɛh é lɔb mɨsyem ga mina mimyɛh.

²⁸ Motie mo Zyɛm, mé a kʉ cyel é dia njwɨɨ opara ó, bʉr o b'a be é cyɛʼ ɛ. No ó, pie motie maa, Zyɛm ze de mɨnkɛla, nye mʉr tɨʼ ze cyel Mwan we é dia njwɨɨ opara. Mwan we ó b'a kumo é l'ombɨmbɨa é mɨpaʼ mimyɛh, ó nye sea nye syɛɛ opara yaa njʉmdia e njʉmdia.