Ebrœ̂ 6 - Kálara Zyɛ̌m Edwán é mpʉ̌n

¹ No ó, bɨna paʼ bir ga bɨsikʉlʉ bé lé etaare jwɨʼ é l'efoʼ, byaa lé etiibe e Krɨst ɨ. Bɨna dweela ga bɨsikʉlʉ lé esa ó, mʉr biʼe pɨʼ otamabʉr ɨ. Bɨh bé aŋa ka bâʼle yeʼle bɨn mɨlʉ mokan mi: egwɨma bɨbol bɨsyɛɛla, edwir leme, ejyɛʼ taa buʼo boo Zyɛm,

² edu sikʉlʉ lé edwɛʼ mpʉ bé lé enʉa mɨndubo e, egʉa mpʉ bé lé ekɛl bʉr mobo e, egʉa mpʉ odwè, bé ópàh é foo e, le egʉa mpʉ Zyɛm ótiʼe bʉr mɨlɔb etiʼ le epihe e.

³ ǃƗ Zyɛm si kpɛl nɛʼɛ, bɨna bé ódweela ga sikʉlʉ lé edwe bʉr pɨʼ otamabʉr ɨ.

^4-6 Bʉr o b'a taare kʉnɔ mɨmbah, bé a be ó lé etaare bi-bi mɨndwɛa lé eduho é jobo kʉ ɨ. É til molu yaa, Mbɨambɨa Sisim, bé e boo nɔɔ ó b'a be-be. Bé a be nteme ó, lé ejoʼo-joʼo lɔɔ Zyɛm ndɨ é bul mbɨa ɛ, joʼo monwam mo tɨ. Bɛɛ, bé a si taare dweŋɔ mbi nkul óka kabɔ pie e l'esie e mbi jɔʼ yiʼ ɨ. É jɔʼ mbi bʉr baa ka lɨŋa é buʼo e, bé abe e nkul ebâʼle gbɛlɔ, ó bé óbula gwɨma mobebe mɔɔ, le edwir mɨleme myɔɔ, ebe, bé bʉr o tɨ, bɨ kʉ gbaa ó, bé ócyèl Mwan mo Zyɛm é klos é jɔʼ mba, le esa ó, nye bul lwɨɔ é nkɛŋlɛm.

⁷ Gʉŋa ga ó, é jɔʼ peme lé ebi-bi modibe mo ompie é jɔʼ yiyɛh ɛ, yé e nyɔm. Obèl o mompœʼ, bé óbè mompœʼ mɔɔ. Yé óswɨɨ mocyɛʼ mo mpom mo Zyɛm é jɔʼ yaa.

⁸ Yé si ka be yɛɛ ó, peme yaa, yé epah ó, bɨka mpʉ mɨndwinʉ le ntʉmsakpɛl nɛʼɛ, peme yaa, yé abe e nyɔm. Zyɛm óka liʼ ó, cye modwine mo nya ó, nye káala ye. Yé ókʉ ka diʼɔ ó diʼɨ.

⁹ Obɨɔ o kpɛl bam aa! Bɨh dam lwib no, mɨ kʉ gʉa é lɔb win ó, sa ndɨ é mbɨa, laa bɨkɔ́ɔlʉ le mosyomlʉ ndwe e modiʼe e, yé ó bɨn zi dolo. Sa yaa, yé ó mpaŋ tiʼ molu mo mpoʼ mɨmɛh.

¹⁰ Ebe, Zyɛm, nye ákwoʼ kœʼ é l'ozyɛhozyɛh. Nye aŋa jɨha syɛɛ bɨn lé esea nye e. Nye nteme, nye aŋa jɨha kpɛl bɨn lé ekpɛl nye e. Kpɛl yin, yé a nyin é pono ó, é jɔʼ bɨn bé a be lé esea e mɨsaŋ mɨ bʉr be e. Bɨn nteme, bé eto dolo lé esea e mye no.

¹¹ Bɨh bé egwɨm ó, mʉr nyiwɛh saʼ zyee lé esea syɛɛ yaa, to pyal é l'odumo, akar. É jɔʼ yaa ó leme mʉr waa, wé óloŋlo e mbɛla ɛ.

¹² Bɨh bé agwɨm ó, bɨn saʼ ontwii. Bɨh bé ekʉ ka gwɨm ó njɨ bɨn nʉŋa dweʼle tiʼ mo bʉʉ obuʼla mo Zyɛm. Bé e buʼo ndwe e bihbe. Bɛɛ nteme ó ngo bi sa Zyɛm a kɛʼ be, jala e nkɔb wɔɔ ɛ.

Nkɛʼ mo Zyɛm

¹³ Yé a be ó é jɔʼ Zyɛm a kɛʼ Abraham bɨsa bɨ embɨa ɛ, nye a si de mɨnkɛla. É mpʉ yé ndɨ ó, yé abe e mʉr lé elaa Zyɛm é duu ɨ, no ó nye a de mɨnkɛla myaa é die le nye mʉr tɨʼ ɨ.

¹⁴ Nye a lɛɛ ó: «É l'ocyecye, me ósʉ go mocyɛʼ mo mpom, le esa ó, go bòna mpoŋbʉr ndɨ é bul buo bʉr ɨ.»

¹⁵ Abraham a be ó si dihbe mpono. Ebe no ó nye a bi sa Zyɛm a kɛʼ nye e.

¹⁶ É jɔʼ bʉr lé ede mɨnkɛla ɛ, bé ede mye ó, lé egba die e mʉr lé elaa be é duu ɨ, é mɨnkɛla. Mɨnkɛla myɔɔ myaa, myé esa ó, bʉr gwaʼa lé esa mosono, ndwe le eboʼlo ó, mʉr a de mɨnkɛla myaa ɛ, nye óbana kʉ loŋlo mye.

¹⁷ Zyɛm a nʉa tiʼa ó, bʉr, bé ógʉa cyecye ó, nye aŋa jɨha mbɨambɨa nkɛʼ we. No yaa ó nye a de mɨnkɛla é jɔʼ nye a liʼe bʉr e monkɛʼ me e. Bʉr o ndɨ ejala le ebi bɨsa bibyɛh Zyɛm a kɛʼ be e, bé ògʉa cyecye ó, nye ókʉ dira monkɛʼ me.

¹⁸ Yé e bɨsa bɨba ndɨ abe e nkul esiilɔ ɛ: monkɛʼ mo Zyɛm, ndwe e mɨnkɛla nye a de e. Zyɛm nteme, nye abe e nkul esa mpʉl tɨ. No ó, bɨna ga bé ó bʉr o mu si fim mɨkam é l'efu ó, bɨna biʼe ga sa nye a kɛʼ, yaa ndɨ esa ó, mɨleme ga mina loŋla e mbɛla ɛ. Nye a liʼe bɨna ga e monkɛʼ maa ó, bɨna nʉŋa ga pim é buʼo.

¹⁹ Mbɛla waa, wé ó waa ebuʼlɔ. Wé emɛr mɨleme ga mina ó, mpʉ monkwab bɨnkoho lé emɛr titima é sʉm dibe é larada ɛ. Wé ó mpʉ kol lé entaa kan ebe é l'odia mo Zyɛm tʉŋlʉ ɨ. Guu odumo o kol waa, wé ó tiila é Tiʼe ndɨ e l'ekɛn é buobuo e.

²⁰ É tiʼe yaa ó Yesʉs a ni ɨ. Nye a si ni efoʼ e bɨna ga, ze to é mih mo Zyɛm é l'efu ga lɨna. Nye mu bɨna ga ó Njwɨɨ opara é l'esama le opara mo Mɛlkisedɛk. Nye ódi nteme ó no njʉmdia e njʉmdia.