Ebrœ̂ 5 - Kálara Zyɛ̌m Edwán é mpʉ̌n

¹ Ebe, bé epɛh njwɨɨ opara nyiwɛh ó, é sama bʉr tʉŋlʉ. Nye ó cyela é dia para ye ó, nye cyɛba é modila mo bʉr é mɨlɔb lé edwɛʼ Zyɛm ɨ. Nye ó mʉr lé ejɛna mobyaʼ mɔɔ ɛ, le ediʼ Zyɛm otir tɔɔ motwina ndwe e mɨndwɛa myɔɔ é lɔb mɨsyem myɔɔ.

² Para nyiwɛh, nye e nkul ekɛm bɨgʉ́ʼ ndwe e bʉr o ndɨ elɨŋa é buʼo e, ebe, é mɨpaʼ mimyɛh, ecyɛʼ le, lé enyin é mih me.

³ Ebe no ó nye lé ejala le ediʼ Zyɛm mɨndwɛa é lɔb mɨsyem mye e, jwɨʼ gwar e gwar e mpʉ nye lé ejala le ediʼ mye é lɔb mɨsyem mɨ bʉʉ bʉr ɨ.

⁴ Mʉr, nye abe e nkul egbana dia para, nkʉ duu tɨ. Bʉr o ndɨ ejala e dia yaa ɛ, bé ó njɨ baa Zyɛm a jebe e. Yé ó jwɨʼ gwar mpʉ Zyɛm a taare jebe Arɔn, cyel nye é dia para ɛ.

⁵ Jwɨʼ gwar e gwar yaa nteme e Krɨst. Nye a baagban dia njwɨɨ opara, nkʉ saa kum ndɨ tɨʼ ɨ. Nye a cyelɔ ó cyelɨ é dia yaa. Mʉr a cyel nye e, a lɛɛ e nye ó: «Go ó mwan wam. Mɛm, mɨ bya go muh.»

⁶ É yʉʉ peh Kalara Zyɛm fih, Zyɛm a lɛɛ nteme ó: «Go ódi para ó njʉmdia e njʉmdia. Go ó é l'esama le opara mo Mɛlkisedɛk.»

⁷ Jyɛm Yesʉs a tiʼe é si nwaʼ ɛ, nye a be-be lé ejwɨʼla e waa a be e nkul epɛʼ nye é l'efie e. Nye a si bʉ tim, jɨ kʉ kʉ, lé eto le edî le ejaʼ Zyɛm ngula. Zyɛm nyɛɛ ntɔʼ joʼo nye é lɔb mojoʼo Yesʉs a sa nye e.

⁸ Dam be mpʉ nye a be Mwan mo Zyɛm ɨ, nye a be ó si jwɨʼ esa Zyɛm Sɔŋ mojoʼo, jwɨʼ jwɨʼɨ. Nye a jwɨʼ esa nye mojoʼo maa ó, é mɨtuu nye a jaʼra e mye e.

⁹ Pie mɨtuu myaa ó nye a be, nye mu si kumo é l'ombɨmbɨa é mɨpaʼ mimyɛh ɛ. No ó nye a ze fuʼla Etin e tiʼ é l'efu e bʉr bɨbɛh bé ósa nye mojoʼo e.

¹⁰ No ó Zyɛm a cyel nye njwɨɨ opara é l'esama le opara mo Mɛlkisedɛk ɨ.

Aduma ga

¹¹ Bɨh bé é buo bɨsikʉlʉ bɨ edwe é lɔb wi. Sa gwar, yé é bul kɔbla lé edwe bɨn bya é banana, é lɔb elele e mɨlʉ min.

¹² Yi bɛa laa jɔʼ bɨn bé a jala le epam oyeʼle e. To kœb ó, yé dina lé ejɨ ó, bʉʉ bʉr bâʼla ze dwe bɨn sikʉlʉ efoʼ bɨn bé a taare dweŋɔ é mɨlɔb mo Zyɛm ɨ! Bɨn dina ó kʉ be mpʉ bɨcyee lé ede njɨ monyaŋ ɨ! Bɨn bé apa jyɛnba lé ede mode mo otamabʉr.

¹³ Mʉr dina lé ede monyaŋ ɨ, nye apa jyɛnba e sikʉlʉ lé etiibe e l'ocɨcyel ga wina ɛ, ebe, nye dina ó ma cyee.

¹⁴ Otamabʉr bɛɛ ó lé ejala e mpaŋ mode. Bɛɛ bé ome ó ndɨ e pɨʼ lé esa ó, bé gʉŋa mbɛʼ paʼra embɨa e l'ebebe e. Bé ebi pɨʼ waa ó, ebe zyee bé lé esa tɨʼ ɨ.