Ebrœ̂ 4 - Kálara Zyɛ̌m Edwán é mpʉ̌n

Lwib mo Zyɛm

¹ Ebe no, mpʉ Zyɛm a liʼe bɨna ga e nkɛʼ ó, nye ódib zi egbala é l'efu ga lɨna ɛ, gʉa di ga ncye! Mʉr ngwar é l'esama lɨn, nye ajala le efib we nkɔb egbala laa.

² Bɨna bé a be ga ó, si joʼo Mbɨambɨa Lɔɔ jwɨʼ gwar e gwar e bɨmpam ga bina. Sa gwar, bé a joʼo we ó, mbɛh, ebe, bé a baabuʼla. Ejoʼo lɔɔ, lé a baadib lɔɔ waa zi ó, wé niʼe be é mɨleme.

³ Bɨna ga bɛɛ obuʼla ó ndɨ egbala ga, ebe, Zyɛm a lɛɛ, tiibe e be ó: «É l'empime lam laa, me a si de mɨnkɛla, le elɛɛ ó: “Me ópa bee nkʉ bʉr onɨ, bé óka ni é l'egbala me lé edwe bʉr bam ɨ!”» Zyɛm dam ka lwib no, syɛɛ ye, yé a sie cyecye ó, duho é l'etɛɛrɨ e si nwaʼ ɛ.

⁴ Ebe, yé ó tila é yʉʉ peh Kalara Zyɛm, tiibe e moho tambɛl ó: «No ó Zyɛm a ze gbala, aka sea bɨsyɛɛ ó, é l'elu e tambɛl.»

⁵ Tɨʼ é peh Kalara Zyɛm yaa, yé ó nye a lɛɛ ó: «Me ópa bee nkʉ bʉr onɨ, bé óka ni e l'egbala me lé edwe bʉr bam ɨ!»

⁶ Ebe no, lɔb, wi tiʼ cyecye ó, bʉʉ bʉr, bé ógbala, bé e boo Zyɛm sama. To kœb ó, bʉr o b'a taare bi Mbɨambɨa Lɔɔ, ó bé niʼe é gumo egbala yaa ɛ, bé a baagbala, ebe, bé a si sa Zyɛm ebɨh.

⁷ Zyɛm ze bâʼle cyel guu moho nye lé ejebe-jebe ó, muh ɨ. Nyi sa no, ntɔʼ lɛɛ bɨna ga lɔɔ, é lɔb waa dumo e David, mpʉ bɨh tile kʉ ɨ. Yé ó tila ó: «ǃBɨn si joʼo twii mo Zyɛm muh nɛʼɛ, mʉr alɨha motɨɨ me ebe elele e lʉ.»

⁸ Nkʉ Yesʉa a be ó be, niŋle bʉr be é gumo egbala ndɨ nɛʼɛ, mpa Zyɛm a be ó, aka lwib é lɔb moho egbala fih.

⁹ Lɔb, wi tiʼ nteme ó, bʉr mo Zyɛm, bé óni é l'egbala, laa e moho saba,

¹⁰ ebe, mʉr lé eni é l'egbala le e, nye egbala bɨsyɛɛ ó, jwɨʼ gwar e gwar e mpʉ Zyɛm nyɛɛ a gbala byaa bye e.

¹¹ Ebe no, bɨna gbaʼ ga monyʉl lé eni é l'egbala laa. Bɨn bé amu sa ebɨh lé ekœʼ ebò e cyen bɨmpam ga bina, bɨn ntɔʼ lɨŋa é buʼo.

¹² Lwib mo Zyɛm, yé ó sa ndɨ kublakubla ɛ. Yé ó e nkul. Yé nteme, yé é bɛbla, laa fòŋ ndɨ njèba mii mɨpaʼ mɨmba ɛ. É jɔʼ Zyɛm lé elwib ɨ, lwib ye, yé ekʉ bana syɛh mɨsʉn, to pyal é mobɨl, ntɔʼ pin bɨpeh bɨ nyʉl e mobʉo. Yé ekpahla gumo leme ndwe e sisim lé edira ɛ. Yé epahle le egba mbɛʼ paʼra mɨpɛhla ndwe e bɨjwɨʼ ga bina.

¹³ Abe e guu mbi cyea sɔʼɔ ndɨ fela é mih mo Zyɛm. Sa yiyɛh nye a cye e, yé é pono é mih me. Bibyɛh, byé ókar mɨnkar myɔɔ ó, é mih me.

Yesʉs, njwɨɨ opara ndɨ lʉ sa yiyɛh ɛ

¹⁴ Bɨna ga mu ó e njwɨɨ opara ndɨ lʉ sa yiyɛh ɛ: Yesʉs, Mwan mo Zyɛm. É mpʉ yé ndɨ no e, bɨna toʼ ga dolo lé emɛʼle buʼo ga yina. Nye a be ó si ntaa jobo e l'ejyoo le ebantɛn, lé ebula to di é jobo kʉ.

¹⁵ Ebe, njwɨɨ opara bɨna ga ndɨ e nye e, nye ó waa ndɨ e nkul ejwɨʼ bɨna ga nkoo é jɔʼ nye lé ebee ecyɛʼ ga lɨna ɛ. Nye a si boblɔ mɨmbi mimyɛh, jwɨʼ gwar e gwar e bɨna ga; sa gwar, nyɛɛ l'aduma, nkʉ sa ba syem.

¹⁶ Ebe no, bɨna dihla ga kunokuno e dia taʼa ye, abaawe sɔʼɔ e Zyɛm. Mɨleme ga mina, myé diʼe mɨlwɨŋla e mbɛla ó, bɨna bé óbi ga njwɨʼa-nkoo ndwe e ncwɨncwɨa. ǃBɨna si to ga é dia taʼa ye no nɛʼɛ, bɨna bé óbi ga ncwɨncwɨa é jɔʼ yé óbul jɨŋɔ ɛ.