Ebrœ̂ 2 - Kálara Zyɛ̌m Edwán é mpʉ̌n

Zyɛm, nyi tiʼ bɨna ga

¹ Ebe no ó bɨna lé ejala le egʉa joʼlo sikʉlʉ bé a taare ntɛŋ bɨna ga ɛ, é l'efu ó, bɨna beʼ ga l'aka lɨŋa é buʼo.

² Bɨna bé egʉa ga ó, mpaŋla Zyɛm a lomlo bʉr e beengles ɨ, a be ó sa ndɨ ejala le enʉŋɔ é nkɔb ɨ. Mʉr nyiwɛh a ntaa etie e tɨʼ ɨ, le waa a sa mpaŋla waa ebɨh ɨ, a si bi myɛna mé a jala e l'ebɨh laa ɛ.

³ Bɨna bɛɛ, bé a be ó si joʼo ga mpaŋla tiʼ lé elaa mpaŋla beengles bé a cenɔ ɛ. Mʉr a taare cen mpaŋla waa ɛ, a be ó Da Yesʉs nye mʉr tɨ. Nteme, bʉr o b'a taare joʼo mpaŋla tiʼ waa ɛ, bé ó b'a lɛɛ e bɨna ga ó, nye ó mpaŋla ndɨ e modile e. ǃBɨna si pyeh ga mpaŋla waa nɛʼɛ, wáa mbi bɨna bé óka syɛhle ga mo Zyɛm ɨ?

⁴ Zyɛm, nyi ze boʼlo nteme ó, mpaŋla waa, nye ó cyecye, ebe, nye a si ntɨh bɨdweʼle bɨ nkul we, e bɨsa bɨ jehe ndwe e mosima mɨmbi mɨmbi, to kumo kuma e mɨndwɛa Mbɨambɨa Sisim lé entɨh bɨna ga ɛ, du mpʉ nye lé egwɨm sa ɛ.

Bɨna bé ekʉ du ga ó, mobò mo Yesʉs

⁵ Jwɨ̀ʼa Zyɛm ófuʼla cyel cyecye, yaa lɔb we bɨh lé elwib ɨ, yé óbe ó é jwɨ̀ʼa mo nuu mʉr. Ntʉʼ beengles nye a cyel é bɨdia bɨ taʼa é l'efu le ejwɨʼ bʉr o ndɨ é jwɨ̀ʼa yaa ɛ.

⁶ Nuu mʉr a si boʼlo tɨ é yʉʉ peh Kalara Zyɛm. Nye a tile ó: «Yé ndɨ mamʉr, ó go toŋla nye? Mamʉr, nye yé, ó go yeʼba nye?

⁷ É ma jɔʼ, go a si fil nye si. Beengles, bé a si nyin e duu, laa nye ba titia. Pie tɨ, gɨ ka bœr nye epʉʼlʉ é lʉ, le edwe nye kum ndwe e duu.

⁸ Go a si gba sa yiyɛh é jwɨɨ ye si, é mokʉ me si.» Mpʉ Zyɛm mu si syɛŋ bɨsa bibyɛh, gba bye é jwɨɨ ye si ɨ, yé abe e sa gwar ndɨ abe fila si é jwɨɨ ye yaa. To kœb ó, banana, bɨna bé apa bee ga ó, bibyɛh, bi sil gbaŋɔ é jwɨɨ ye.

⁹ Sa bɨna lé ekʉ gʉa bee ga ɛ, yé ó: é ma peh jɔʼ, Zyɛm a si taare fil Yesʉs si, beengles laa nye ba é duu. Pie tɨ, nyi ka bœr nye epʉʼlʉ é lʉ, le edwe nye kum ndwe e duu, ebe, nye a si sia e mɨtuu, ntɔʼ dwè. Sa nɨ yiyɛh é l'efu ó, Zyɛm lɛʼla bʉr bɨbɛh ncwɨncwɨa, lé esa ó, Yesʉs jala e be.

¹⁰ Sa yiyɛh, yé ó é l'efu mo Zyɛm, nyɛɛ waa a cye sa yiyɛh ɛ. É mpʉ nye a gwɨm liʼle buobuo bwan é gumo bé e boo nɔɔ, bé ódi e moncɛnba ɛ, no ó yé a jala ó, nye taara ntɨh Yesʉs mɨtuu, nyɛɛ mʉr ndɨ Etin e tiʼ ɨ, ó nye kuma é l'ombɨmbɨa é mɨpaʼ mimyɛh, duho é mɨtuu nye a sia e mye e.

¹¹ Yesʉs, mʉr lé epubo bʉr ɨ, bé e bʉr nye lé epubo e, bɨbɛh, bé mu ó bʉr o b'a duho é Sɔŋ ngwar ɨ. Ebe no ó Yesʉs ndɨ ajoʼo fwon lé ejebe be ó, obɨɔ bam e l'okɛl bam ɨ.

¹² É yʉʉ jɔʼ, nye a lɛɛ, cwɨɨ é zi ogwiha o mɨlɔb ó: «Me elɛʼle obɨɔ bam e l'okɛl bam die lo. Me ócyɛb teme bʉr go a syɛŋ ɨ, me ódwiibɨ go é zi bɨjɛɛ.»

¹³ Ndwe nteme, nye ebula lɛɛ ó: «Mɛm, me ójyɛʼ taa buʼo yam boo Zyɛm.» Nye a lɛɛ nteme ó: «Me ó nwa, bɨh e bwan Zyɛm a ntɨh me e.»

¹⁴ Ebe no, mpʉ bwan nye lé elwib, tiibe e be e, bé ó bʉr o bɨpuno le motié e, é jwɨʼ gwar e gwar yaa nteme ó Yesʉs a byɛl mʉr ɨ, nye ntɔʼ dwè é l'efu ó, nye teʼla mʉr a be-be e nkul efie e. Mʉr waa, nye ó Njwɨɨ moleme!

¹⁵ Nye a dwè nteme ó, nye pɛʼɛ bɨna ga é l'okomo, ebe, bɨna bé a taare lɛŋ ga bɨtiʼ ga bina ó, kɛʼa é l'okomo. Bɨna bé a di-di ga é nkara waa ó, é kpɛɛ efie.

¹⁶ Ebe, é l'ocyecye, nye a baaze beengles e mɨngula. Nye a ze e mɨngula ó, boo mpoŋbʉr mo Abraham.

¹⁷ Ebe, yé a jala ó, nye diʼe kʉ be mpʉ jyɛɛ ye é mɨpaʼ mimyɛh. Nye a nwɨɨla e bɨna ga é l'efu ó, nye nkʉʼ lɛʼle bɨna ga ncwɨncwɨa, le edi njwɨɨ opara ndɨ mʉr ebuʼla ɛ. Nye ó lé ejala le esea é mɨlɔb mimyɛh ndɨ edwɛʼ Zyɛm ɨ. Nye ó mʉr a dwè, jala e mɨsyem ga mina ɛ. Efie le, lé ó b'a leʼe empime mo Zyɛm.

¹⁸ Nye e nkul eze e mɨngula ó, boo bʉr o ndɨ ebɔma e mobʉbla ɛ, ebe, nye mʉr tɨʼ a be ó si sia e mɨtuu é jɔʼ nye a boblɔ ɛ.