Ebrœ̂ 13 - Kálara Zyɛ̌m Edwán é mpʉ̌n

Tiʼ mʉr mo Zyɛm

¹ Kpɛl obuʼla, yé toʼ dolo lé egwɨe.

² Ajɨha ga lé ebɨlan e l'ojyoo lé epyal bɨn ɨ. Bʉʉ bʉr, bé a si baʼle ojyoo mbɨmbɨa, bé ntɔʼ kœb ó, mpa yé a be ó beengles, bɛɛ l'agʉa.

³ Toŋla ga mɨmbʉʼ: diʼe ga mpʉ sa lɛɛ ó, bɨn e boo nɔɔ bɨbɛh, bé ó mɨmbʉʼ e mɨmbʉʼ. Toŋla ga baa lé ebɔma e mɨtuu ɨ, ebe, bɨn bé egʉa mpʉ bɨntɨʼa ndɨ ekpaa é nyʉl ɨ.

⁴ Dweʼ ga eba duu. Sa ndɨ elœʼ mʉr é mih mo Zyɛm ɨ, yé ajala le esaŋɔ fum mɨmbɛa mɨ bʉr ndɨ esyɛŋa ɛ. Gʉŋa ga ó, Zyɛm ótiʼe osyɛl o bɨmala bé e l'osyɛl o mɨfyɛba mɨlɔb myɔɔ.

⁵ Mʉr alaʼ ga lʉ é kpɛl mɔn. Filɨ ga mɨleme si é bim bɨn lé ebi ɨ, ebe, Zyɛm a lɛɛ ó: «Me abe e nkul eliʼe go é ntɛʼɛ nkʉ ntwiŋ go.»

⁶ Ebe no ó bɨna ndɨ e nkul etʉm monyʉl, ntɔʼ lɛɛ ó: «Da ó ndɨ kɛma wam. Me aŋa ka kpɛɛ sɔʼɔ. Yé mʉr ósa me e?»

⁷ Toŋla ga ocyɛb be efoʼ bɨn, baa b'a lɛɛ-lɛɛ bɨn lɔɔ Zyɛm ɨ. Toŋla ga ebò e cyen bé a kœʼ œ, e ndumlo bɨtiʼ byɔɔ. Jyɛʼɛ ga taa buʼo yin boo Zyɛm mpʉ bé a sa ɛ.

⁸ Mpʉ Yesʉs-Krɨst a be kʉʼ ɨ, mpʉ yaa nteme ó nye ndɨ muh. Nye ódi nteme ó no, njʉmdia e njʉmdia.

⁹ Gʉa di ga ncye. Abir ga ó, bʉr gomla bɨn é zi fih, é zi mɨmbi bɨsikʉlʉ bé lé elɛʼle, myaa bɨn ndɨ agʉa ɛ. Ncwɨncwɨa mo Zyɛm nye ome ó ndɨ egba bʉr nkul é monyʉl. Yé é mbɨa ó, bɨn biʼe nkul tɨ. Nyɔmlʉ bab lé elɛɛ ó, mʉr, nye ejala le ede é l'efu le edwiibɨ Zyɛm e nye e, nye abe e nyɔm é nko paʼ mo bʉr o lé ede nye e.

¹⁰ Opara ndɨ esea é Saʼ Nɨnɨ mo Zyɛm ɨ, bé abe e nkul eze é taa mɨndwɛa ga yina, de mode ndɨ kɛla tɨʼ ɨ.

¹¹ Njwɨɨ opara nyiwɛh, nye esa-sa ó, ni é Mpah Zyɛm ndɨ e l'ekɛn ɨ, e motié mo otir nye a taare tiʼe e. Tir waa, nye etiʼɔ é l'efu le epɛʼ mɨsyem é bʉr. Bɨsa bɨ mo ndwe e kʉr tir, byé epɛʼɔ ó mompaʼ mɔɔ, to diʼɔ é mompaʼ kʉl.

¹² Yesʉs a be nteme ó no. Nye a to sia e mɨtuu ó, é nkana kʉl. Nye a sa no ó, nye nkʉʼ nʉa motié me, ze pubo kul bʉr ye e tɨ.

¹³ Ebe no ó bɨna lé ejala le eduho ga é mompaʼ maa, to pyal ga nko Krɨst ndɨ é mompaʼ kʉl ɨ, bɨna ga e boo nɔɔ nkʉʼ lwɨɔ jwɨʼ gwar,

¹⁴ ebe, é si nwa, bɨna bé abe ga e nkana lé edi njʉmdia e njʉmdia ɛ. Bɨna bé ejoʼo ga dweh eni é nkana fih é molu ndɨ eze e.

¹⁵ Bɨna dwiibɨ ga Zyɛm é jɔʼ yiyɛh. Dweʼ ga nye motwina maa é die mo Yesʉs, lé eseʼle die le.

¹⁶ Saʼ ga bʉʉ bʉr bɨsyɛɛla bɨ embɨa. Fuʼa ga bʉr e mobi mɨn. Anyamle jɨha esa syɛɛla yaa, ebe, yé ó motwina Zyɛm lé ebee mbɨmbɨa ɛ.

¹⁷ Saʼ ga ocyɛb be efoʼ bɨn mojoʼo. Filɨ ga monyʉl si e be, ebe, bɛɛ ó ndɨ edwiile mɨsisim min. Bé ó ngo to lɛɛ Zyɛm mpʉ bɨn bé a kœʼ ebò e cyen ɨ. ǃBɨn si sa be mojoʼo nɛʼɛ, bé ósea syɛɛ yɔɔ e bɨsʉhʉ. Yé baabe no nɛʼɛ, bé ójoʼo mompime. Syɛɛla yaa, abe bɨn e nyɔm.

¹⁸ Dɨʼe sa ga mɨnjwɨʼla é l'efu lɨh. Bɨh bɨ kʉ gʉa ó, mɨpɛhla mɨleme mih, myé ó njɨ myaa ndɨ é pyɛɛɛ ɛ. Bɨh bé e gwɨma ó, bɨna kœʼœ ga ebò e cyen ndɨ cɨcyel ɨ, é bɨcye bibyɛh.

¹⁹ Sa me lé edî nɨ, yé ó, bɨn saʼ Zyɛm mɨnjwɨʼla é l'efu lam, ó nye mɛʼla ó, me bâʼla ze kœb bɨn kam e kam.

²⁰ Neme Zyɛm Sɔŋ ndɨ egba motala paʼra ga wina, nye ó b'a pɛ̀h Tî ga wina ndwe e Kobla bɨntœme nɨnɨ, Yesʉs é foo, pɛ̀ha foo we lé elɛʼle ó, nyi mɛʼle motié nye a sʉ é l'efu ó, Sɔŋ we nkʉʼ de mpʉn njʉmdia e bɨna ga ɛ.

²¹ Nye komla bɨn é mɨpaʼ mimyɛh, ó bɨn saʼ bɨsyɛɛla bɨ embɨa bɨn lé ebee ó, byé lé edu gwɨma ye e, nye gʉa cyel bɨna ga é mih me dumo e Yesʉs-Krɨst, ndɨ e kum njʉmdia e njʉmdia ɛ. Amɛn.

Moswɨhlɨ

²² Obɨɔ ga bam aa! Me etile bɨn ó, me gbaʼ bɨn nkul é monyʉl. Me etile ó, bwa mokan abuo. No ó, me ejwɨʼla e bɨn ó, bɨn dihba mokan maa lé ejoʼo!

²³ Gʉŋa ga ó, mɨɔ ga wina Timote lwanbe pʉʼa é mbɛr mɨmbʉʼ! ǃNye si pyal me ye nɛʼɛ, bɨh e nɔɔ bé óze bee bɨn.

²⁴ Soha ga ocyɛb be efoʼ o Mbɛr-Zyɛm ndwe e mɨsaŋ mɨ bʉr mimyɛh. Obuʼla o lal Italia, bé esoho bɨn.

²⁵ Mocyɛʼ mo mpom mo Zyɛm, mé swɨŋɨ é bɨn bɨbɛh.