Ebrœ̂ 12 - Kálara Zyɛ̌m Edwán é mpʉ̌n

¹ É paʼ ga wina, bɨna ga bé ó é sama bʉr baa tʉŋlʉ. Bé ebʉmra bɨna ga é nka, lé eboʼlo lɔɔ Zyɛm. Mpʉ bɨna ga ndɨ no e, gʉa ó, bɨna bé ejala le eliʼe ga mɨmbeʼ modile mimyɛh pihe, ndwe e mɨsyem ndɨ ejɨ kwable bɨna ga ɛ, mimyɛh. Bɨna dihba ga lé esa jwɨʼla mɨkam mokʉ, to pyal é njɨ Zyɛm a tulo e.

² Mih ga mɨna, mé dwɛʼa sɔʼɔ, njɨ Yesʉs, ebe, nye ó etin e buʼo ga yina. Nye nteme ó b'a sa ó, buʼo ga yina diʼe é l'ombɨmbɨa é mɨpaʼ mimyɛh. Nye a mɛʼle ó, nye sia e mɨtuu, bé jʉʼo nye, lé ecyèl nye é klos kʉ. Nye a si pyeh fwon mʉr lé ebi é mbi efie laa ɛ. Nye a fuo mɛʼle ó, nye dwèʼ no ó, nye nkʉʼ bi bɨsʉhʉ Zyɛm a bɛa komo nye e. Banana, nye mu ó si é die é mbo ejʉm mo Zyɛm Sɔŋ, mʉr ndɨ é dia taʼa ɛ.

³ Toŋla ga nye. Toŋla ga mpʉ osyɛl o mɨsyem bé a sa-sa nye mosono, nyɛɛ njɨ lé edihbe be e. Dɨʼe toŋlo ga no, bɨn nkʉʼ be, akar mɨtuu, nkʉ cyɛʼ.

Zyɛm, nye eturo bwan be mɨlʉ

⁴ É mpʉ bɨn lé ebaran e Syem ɨ, bɨn bé apa sa mongan e Syem, to pyal é jɔʼ eto e motié lɨn, lɨ taba si ɨ.

⁵ Zê bɨn bɨ jɨha mokan mé a taare lé egba bɨn nkul é monyʉl ma ɛ? Zyɛm a ntɨh bɨn ma ó, lé elwib e bɨn mpʉ bwan be. Nye a lɛɛ ó: «Mwan wam, é jɔʼ Da mu lé eturo go lʉ ɨ, anyamle nʉa ye é l'ongbɛr-ngbɛr. É jɔʼ nye mu lé edwe go mobe e, acyɛʼ nyʉl,

⁶ ebe, Da, nye eturo mʉr lʉ ó, waa nye lé ekpɛl ɨ, waa nyiwɛh nye lé ekuro bɨr ɨ, le elɛɛ ó: “Nwa, nye ó mwan wam” ɨ.»

⁷ No ó, dihba ga é jɔʼ Zyɛm lé eturo bɨn mɨlʉ ɨ. Mpʉ Zyɛm lé edwe bɨn bɨntɨʼa byaa ɛ, yé ó ebe bɨn ndɨ bwan be. ǃƗ sɔŋ si bene lé eturo mwan lʉ nɛʼɛ, gʉŋa ga ó, mwan waa, nye abe mwan kpɛl we.

⁸ Zyɛm, nye eturo-turo bwan be bɨbɛh mɨlʉ ó no. Yé be ó, nye aturo bɨn mɨlʉ nɛʼɛ, lɛɛ ó, bɨn bé abe bwan be. Bɨn bé ó njɨ bwan ndɨ agʉa osɔŋ ɨ.

⁹ Yé e yʉʉ sɔʼɔ: osɔŋ ga bɨna, bé a bya bɨna ɛ, é jɔʼ bé lé eturo bɨna ga mɨlʉ ɨ, bɨna bé ebula dwaabe ga be tɨ. No ó, Sɔŋ ga wina lé edwɛʼ mɨsisim ga mina ɛ, ǃnye si turo bɨna ga nteme mɨlʉ nɛʼɛ, zê bɨna bé ajala le efil ga monyʉl si e nye ɛ? ǃBɨna si sa ga no nɛʼɛ, lɛɛ ó, bɨna bé óbi ga tiʼ molu mo mpoʼ mɨmɛh.

¹⁰ Osɔŋ ga bɨna, bé a kʉ turo bɨna ga mɨlʉ ó, njɨ é ma jɔʼ. Bé a si bee embɨa lé esa bɨna ga no. No ó, Zyɛm Sɔŋ ga wina nyɛɛ, nye eturo bɨna ga mɨlʉ ó, njɨ é l'efu e nyɔm ga wina. Nye esa no ó, bɨna nkʉʼ kœʼ ga ebò e cyen ndɨ é pememe e, ebò e cyen ga lɨna lé enwɨɨla e laa le.

¹¹ É jɔʼ nye mu lé eturo bɨna ga mɨlʉ ɨ, yé é kpaa é leme, anwɨɨla ó, yé ó sa esoho. É jɔʼ tuu waa ka laa ɛ, bʉr o ndɨ egʉa sa ndɨ tɨʼ ɨ, bé ntɔʼ ka gʉa ó, mpa wé ebana komlo be mɨleme. Bé eka liʼ lé esa pie tɨʼ ó, njɨ bɨsyɛɛla ndɨ cɨcyel ɨ, le ebi motala tɨ.

¹² É mpʉ yé ndɨ no e, ebe yé bɨn lé efil mobo mɨn si ɛ? Bɨn bé à dihbe elɨl moboo mɨn mu mɨnjyɛma ɛ.

¹³ Bɨn bé à gʉa komlo mozi, cyel me é liim, ó baanya-bɨjyɛm, bé nkʉʼ kœʼ tɨʼ, mokʉ mɔɔ l'aka piha. Bé tiʼa yɛɛ tiʼa.

¹⁴ Gbaʼ ga monyʉl lé egba motala paʼra win boo bʉr bɨbɛh. Baʼla ga bɨn bʉr o tɨʼ ti. ǃƗ mʉr si lɨŋa é paʼ ebò e cyen le nɛʼɛ, nye ákwoʼ bee Da.

¹⁵ Diʼe ga ncye, ó mʉr ayi fib nkɔb é leme ncwɨncwɨa mo Zyɛm. Kaale lɨ ndɨ é dwie dwie e, bɨntoʼdu, byé amu pah, lé eduho tɨ. Byé óka lœʼ buobuo bʉr é mih mo Zyɛm.

¹⁶ Diʼe ga ncye! Mʉr alama fwon é zi bɨduo. Mʉr beʼ l'asa lɔɔ Zyɛm ebɨh, é mpʉ Eso a sa ɛ. Nye a si dwɛna dia modweʼe ye, dwe ncyom, le esiila ye é l'efu le enʉa ma fua mode!

¹⁷ Pie tɨ, nyi ka ze kpɛl ó, nye nʉŋa we nkɔb é mocyeele mo sɔŋ we. Bɨn bé egʉa ó, sɔŋ a si bene lé esyɛɛ nye ma. Eso a si kʉ jɨ, é jɨ jɨ jɨ, sa gwar, nye a baaka be e nkul esa ó, sɔŋ siila mɨtiʼa mɨ leme we ebe myɛɛle me maa.

¹⁸ Bɨn bɛɛ, bé abe cyela é l'ecwɨʼ bɨn ndɨ, bɛm bobo e, laa ndɨ e siʼe lé eduo é bɨl-bɨl ɨ, edurʉ le ankom-nkom, nkuo lé ekuulo tɨ.

¹⁹ Bɨn bɛɛ, bé abe lé ejoʼo sebe, nkʉ twii mo Zyɛm. Bʉr o b'a joʼo twii waa ɛ, bé a si joʼo bʉa, ntɔʼ jwɨʼla e nye ó, nye l'aka bâʼle lɛɛ be lʉʉ ekan,

²⁰ ebe, sa nye a lɛɛ be e, yé a si ntaa be é nkul. Nye a lɛɛ e be ó: «Nkʉ mʉr si kuna e l'ecwɨʼ nɛʼɛ, —dam be tir ókuna e le e, —bé luma nye mokoʼ, nye à dwè.»

²¹ Mbea bé a bee ecwɨʼ laa ɛ, ekɛn ze swɨɨ be é monyʉl. Moyiz ntɔʼ lɛɛ ó: «Me elaŋle saʼ, le ejoʼo bʉa!»

²² Bɨn bɛɛ, bé abe no. Bɨn bɨ ze é l'ecwɨʼ e Sion. Yé ó nkana mo Zyɛm ndɨ kublakubla ɛ: Yerʉsalɛm, yaa dina é jobo kʉ ɨ. Beengles otɔɔyin otɔɔyin, bé ó tɨ, abe e tolɔɔ. Bé etwaare e l'ebʉʼ e bɨsʉhʉ.

²³ Bɨn bɨ pyal é gwɨhla modweʼe mo bwan mo Zyɛm. Mie mɨn boo nɔɔ, mé ó mɨtila é jobo kʉ. Bɨn bɨ dihle boo Zyɛm, mʉr ndɨ etiʼe mɨlɔb mɨ bʉr bɨbɛh ɛ. Bɨn bɨ pyal gumo ocɨcyel o bʉr ndɨ ɨ, baa mɨsisim myɔɔ mu si kumo é l'ombɨmbɨa é mɨpaʼ mimyɛh ɛ.

²⁴ Bɨn bɨ ze nteme boo Yesʉs, mosàa-mɔm a sa ó, Zyɛm deʼ Edwan e Mpʉn e bʉr ɨ. Bɨn bé epyal é mih me ó, cwɨɨ é zi motié me, maa nye a pubo bɨn e me e. Motié me maa, mé ekʉ lwib-lwib ó, njɨ mokan ndɨ é mbɨa ɛ, laa maa Abɛl nyɛɛ a lɛɛ ɛ.

²⁵ Ebe no, gʉa di ga ncye, ó bɨn beʼ l'abene mʉr mu lé ebal bɨn ɨ. Molu pihe, bé a si bene lé ejoʼo mʉr a ze é si nwaʼ ɛ. Nye a ze ó, nye bal ó be, bɛɛ l'akpɛl joʼo. É jɔʼ yé a ka be ó, ebebe laa pyala be e, yé a baabana ó, bé syɛhla le. No ó, mʉr a ka ze lwib e bɨna ga bɛɛ ɛ, nye ó ndɨ mʉr a duho é jobo kʉ ɨ. ǃBɨna si bene ga ejoʼo lɔɔ we nɛʼɛ, zê bɨna bé ósyɛhle ga bɨntɨʼa bɨ tɨ, laa be ɛ?

²⁶ Molu pihe, twii we, a be ó si ncyeŋ si nwa. No ó, banana, nyi liʼe bɨna ga e nkɛʼ ó: «Me óbâʼle ncyeŋ si, kumo e jobo e l'ejyoo le bantɛn é jɔʼ gwar.»

²⁷ É mpʉ nye a lɛɛ ó, nye ópɨʼ bye é jɔʼ gwar ɨ, yé elɛʼle ó, bɨsa nye a cye e, byé óncyeŋa, ntɔʼ dim. Sa ndɨ ecyɛb é nkʉʼʉ, ancyeŋa ɛ, yiha ó ngo liʼ.

²⁸ Ebe no, bɨna dweʼ ga Zyɛm ekiba, ebe, nyi niŋle bɨna ga é jwɨ̀ʼa ye. Yé abe e nkul epɨŋla. Bɨna dwiibɨ ga nye le ebil ekɛn é mih me, ndwɛa kum ga wina waa nkʉʼ jala e nye,

²⁹ ebe, Zyɛm Sɔŋ ga wina, nye ó mpʉ siʼe ndɨ é diʼa-diʼa ɛ.