Ebrœ̂ 11 - Kálara Zyɛ̌m Edwán é mpʉ̌n

Buʼo, yé yé ɛ?

¹ Buʼo, yé ó sa go lé ebuʼla ó, yé ósyɛɛ, yɛɛ l'apa syɛɛlɨ ɨ. Buʼo, yé ó sa go lé egʉa ó, yé ó tɨ, go l'apa bee e.

² Zyɛm a seʼle bʉr o molu pihe ó, ebe buʼo yaa.

³ É zi buʼo, yé ó bɨna lé egʉa ga ó, Zyɛm ó b'a cye kʉ e si e lwib ye e. No ó, sa yiyɛh lé enyin ɨ, yé a duho ó, é yaa ndɨ anyin ɨ.

⁴ É zi buʼo, Abɛl a si dwe Zyɛm mpaŋ motwina, laa maa mo Kan. Zyɛm a si seʼle nye é lɔb buʼo ye, le elɛɛ ó, nye ó cɨcyel mʉr, le emɛʼle nteme motwina me. É zi buʼo, Abɛl, nye dina ó lé elwib e bɨna ga, dam be ó, nyi dwè.

⁵ Buʼo mo Enɔk ó b'a sa ó, nye beʼ l'adwè. Nye a di é di di di, bʉr ntɔʼ sanɔ nye. Nye a baaka beɔ, ebe, Zyɛm a si nʉa nye. Yé ó tila ó, Enɔk apa bɨnɔ kʉ, Zyɛm a si bɛa bee nye mbɨmbɨa.

⁶ Zyɛm ákwoʼ kpɛl mʉr ndɨ abe e buʼo e. Buʼo ó ndɨ esa ó, bɨna gʉŋa ga ó, Zyɛm, nye ó tɨʼ cyecye. Buʼo nteme ó lé elɛʼle bɨna ga ó, nye edwe myɛna mo embɨa ó, njɨ bʉr o ndɨ edu nye e.

⁷ É zi buʼo, Noe a si joʼo é jɔʼ Zyɛm a bal nye é lɔb sa yé a be ó, yé ósyɛɛlɨ ɨ. Nye l'apa bee ye e dih, nye a be ó si nʉa lwib mo Zyɛm yaa, gba é nkɔb, ntɔʼ kpaʼ byɛl, du mpʉ Zyɛm a tɨe nye ó, nye saʼ ɛ. Nye ze ni tɨ, bé e mbɛr bʉr we, bɨbɛh ntɔʼ tiʼe. É mbi waa ó nye a dwe bʉʉ bʉr mobe e, nyɛɛ ntɔʼ bi mokebe é mih mo Zyɛm, maa lé eduho é buʼo e.

⁸ É zi buʼo, Abraham a si sa Zyɛm mojoʼo é jɔʼ nye a jebe nye ó, nye toʼ, to di é lal nye a be ó, nye dwe ó nye e. Tœa nye a to é lal waa ɛ, wé a be ó, nye l'agʉa simsim gumo Zyɛm a gwɨm ó, nye toʼ, to di ɨ.

⁹ É zi buʼo, nye a si tiʼe é si tiila, mpʉ ndìndìl lé edi é bɨsaʼ. Ɨzak bé e Yakɔb, bʉr o bé e boo nɔɔ, bé a kɛʼɔ si tiila waa ɛ, bé a di nteme ó, é mompaʼ bé a sa ɛ.

¹⁰ Abraham nteme a sa no ó, nyɛɛ lé ebono ó, nye ódi é nkana Zyɛm a bòno le efumo e, nkana yaa e nkan Zyɛm a cyel, waa lé ecyɛb é nkʉʼʉ ɨ.

¹¹ É zi buʼo, nye a si bya mwan, nye osi laa jɔʼ nye a be ó, nye diʼe sɔŋ ɨ, ebe, nye a buʼla ó, waa a kɛʼ nye mwan ɨ, a be ó mʉr ebuʼla.

¹² Zyɛm ze dwe nye nkul ebòno mpoŋbʉr o ndɨ é bul buo bʉr ɨ, dam be mpʉ nye a be ó mpʉ ndwè. Bé ó tɔɔ baatwitwɛn, nkʉ ntɔʼ, tɔɔ mosɨa mo maŋ ndɨ é nkpah maŋ ɨ.

¹³ Bʉr onɨ bɨbɛh, bé a dwè ó, bé dina lé ejyɛʼ taa buʼo yɔɔ boo Zyɛm, bé l'apa bi yɛɛ sa nye a kɛʼ be e. Sa gwar, bé a bee sa nye a kɛʼ be ó, yé dina jaabe, bé ze soho ye. Bé a kʉ gʉa é l'ocyecye ó, bé ó ojyoo nkʉ mɨngbaalaŋa é si nwa.

¹⁴ Bʉr o lé elwib é mbi waa ɛ, bé elɛʼle tɨʼ ó, bé esaa lal bé ódi ɨ.

¹⁵ Nkʉ bé a be ó be, dɨ toŋlo lal bé a duho tɨʼ nɛʼɛ, mpa bé a be ó si bula, fiʼ, toŋɔ pihe.

¹⁶ Sa gwar, bé a be ó e dweh edi é mpaŋ lal, waa ndɨ é jobo kʉ ɨ. Zyɛm, nyi komlo be mpaŋ nkana, sa lé elɛʼle ó, nye ajoʼo fwon é jɔʼ bé lé egban nye e.

¹⁷ É zi buʼo, Abraham a si kebe é jɔʼ Zyɛm a boblo nye e. Abraham ze sa ó, nye jʉ ó nye Ɨzak tɔɔ motwina. Abraham ó b'a bi monkɛʼ monɨnɨ mo Zyɛm. Leme, wé a be ó nye é ntɨɨɨŋ ó, nye kɛha ó etiʼe e mwan le laa.

¹⁸ Dam be no, Zyɛm a si bɛa lɛɛ Abraham ó: «Mpoŋbʉr me a bɛa kɛʼ go e, nye óbyɛl ó, dumo e Ɨzak.»

¹⁹ Nye a jwɨʼ ó, Zyɛm óbɛm pɛ̀h Ɨzak é foo. Bɨna bé óbɛm lɛɛ ga ó, nye a si bâʼle nʉa Ɨzak pie e l'efie le.

²⁰ É zi buʼo, Ɨzak a si syɛɛ Yakɔb, bé e Eso mocyeele. Nye a si bɛa gwih sa yé a be ó, yé ósyɛɛlɨ ɨ.

²¹ É zi buʼo, Yakɔb, é jɔʼ nye a be, nye mu kunokuno le edwè e, a si syɛɛ bwan oba mo Yoseb mocyeele. Nye ze mʉa si, kubro é fumo we, ze dwiibɨ Zyɛm.

²² É zi buʼo, Yoseb a si lɛɛ bwa b'Ɨzraɛl, é l'esie e tiʼ ye ó, bé óduho é lal Egipten, fiʼɔ. Nye ze tiile be motie é lɔb bɨdwehe bye.

²³ É zi buʼo, obyɛl mo Moyiz, bé a si baʼle nye é l'efo ongɔn olɛl pie e l'ebyɛl le, ebe, bé a bee ó, nye a be ó é mbɨa lé ebee. Bé a si pɛʼ bʉa é mɨleme myɔɔ, ntɔʼ ntaa etie mo njwɨɨbʉr lal Egipten.

²⁴ É zi buʼo, Moyiz, é jɔʼ nye a be, nye mu tamamʉr ɨ, a si kɛla é jɔʼ bé a jebe nye ó, mwan mo sile mo Faraɔŋ ɨ.

²⁵ Laa ó nye tiʼa é l'entwɨʼ e bɨsʉhʉ, nyɛɛ yɛɛ é mpila mɨsyem, nye a fuo mɛʼle ó, nye jaʼra e tuu, bé e bʉʉ bʉr mo Zyɛm.

²⁶ Laa ó nye tiʼa é lal Egipten lé ebi okum e l'ogbaa tɨ, nye a fuo mɛʼle ó, bé e Lœma mulo mo Zyɛm, bé lwɨɔ zyɛŋa. Nye a be ó lé esyɛm mih ó, nye beŋɨ myɛna Zyɛm a komo nye e.

²⁷ É zi buʼo, nye a si duho é lal Egipten, akpɛɛ empime mo njwɨɨbʉr lal. Nye a kʉ cyɛb é mih me ó, é nkʉʼʉ, lé esa mpʉ sa lɛɛ ó, nye a bee-bee e mih me ó Zyɛm, waa ndɨ abe lé enyin ɨ.

²⁸ É zi buʼo ó nye a komlo ebʉʼ e Paska, le emyɛʼ-myɛʼ motié é monkan mobe e. Nye a sa no ó, engles beʼ l'aka jʉ modweʼe mo bwan bɔɔ.

²⁹ É zi buʼo, Moyiz bé e bwa b'Ɨzraɛl, bé a si ntaa Maŋ mo Akaa-e-kaa. Bé a ntaa me ó e mokʉ mɔɔ é vwah, mpʉ bʉr lé ekœʼ tin ɨ. É jɔʼ bʉr o b'Egipten, bé a ngbaa ntaa nteme e, modibe ze bila be. Bé ze sie é pira.

³⁰ É zi buʼo, bwa b'Ɨzraɛl, bé a si lie nkana Yeriko bɨjɔʼ tobo, é jɔʼ gwar é moho. No ó, é moho tambɛl, pɨpɨm nkana ze duma si.

³¹ É zi buʼo, Rahab, a be mbambama ɛ, a baadwè é jɔʼ bʉr ofih, bé a jʉŋɔ ɛ. Bé a si sa Zyɛm ebɨh; Rahab nyɛɛ ó b'a bɨlan e bʉr o b'a byamle lal Kanan ɨ.

³² Wáa tɔɔlʉ me kaʼ bâʼle lɛɛ bɨn ɨ? Yé esaa me ó jɔʼ, ó me taŋla bɨn mɨlɔb mo Gédéon bé e Barak, ndwe e Samsɔn, Yɛfta, David, Samuɛl, ndwe e l'ogwiha o mɨlɔb.

³³ É zi buʼo yɔɔ ó bé a lwimla e mɨlal mɨfih, bana ntaa mye e. Bé a si tiʼe bʉr mɨlɔb é l'ocɨcyel é zi buʼo yɔɔ. Bé a si bi nkɛʼ mo Zyɛm é zi buʼo yɔɔ. Bé a pɨr mɨngbampwɨɨ mɨnʉm nteme ó, é zi buʼo yɔɔ.

³⁴ Bé a si dime modiʼe, le ecɨŋ mɨfòŋ é zi buʼo yɔɔ. Bé a taare be ó é cyɛʼ, bé ntɔʼ bula nʉa nkul é monyʉl. Bé a si lwimla mɔm, ndwe le efo mosama mo dɔm é zi buʼo yɔɔ.

³⁵ É zi buʼo yɔɔ, bʉʉ bʉba, bé a bâʼle beŋle bʉr bɔɔ bé a taare dwè, ka pàh é foo e. Bʉʉ bʉr bɛɛ, bé a si sia e bɨntɨʼa, amɛʼle ó, bé pɛʼɔ é dia olʉa yɔɔ, ebe, bé a kpɛl ó, bé pàha é foo, bé nkʉʼ bi tiʼ ndɨ é bul mbɨa ɛ.

³⁶ É zi buʼo, bʉʉ bʉr, bé a si mɛʼle ó, bé lwɨɔ le ebîŋɔ, to kumo kuma ó, bé kaʼɔ e mɨkʉkob ndwe le egbaŋɔ be é mbɛr mɨmbʉʼ.

³⁷ Bʉʉ, bé a si lumɔ mokoʼ, bé ntɔʼ dwè. Baʼ siʼɔ e moziʼ, tiʼɔ bɨpeh bɨba. Bʉʉ, jʉŋɔ e mɨfòŋ. Bʉʉ, bé a si foŋɔ é mɨmbɛr myɔɔ, diŋɔ-diŋɔ kʉl e kʉl. Bé a kʉba-kʉba ó, njɨ bɨkʉr bɨntœme e bɨkɨla. Bʉr, bé a si bul tíile be, le esaŋɔ be cere ebe buʼo yɔɔ.

³⁸ Bé a yeŋe-yeŋe ó, é feha si ndwe e mocwɨʼ. Baʼ, bé a ja-ja ó, é mokul; bʉʉ, ja é bɨbah mokoʼ tʉŋlʉ. Bé a be ó é mbɨa bʉr. Yé a baajala ba ó, bé diʼe é bebebebe si nwa.

³⁹ Zyɛm a si mɛʼle bʉr baa bɨbɛh é lɔb buʼo yɔɔ, bɛɛ yɛɛ l'apa bi sa nye a kɛʼ be e.

⁴⁰ Jwɨʼ Zyɛm a bà é l'efu ga lɨna ɛ, yé é embɨa, laa yaa nye a bà é l'efu lɔɔ ɛ, ebe, nye a tiʼe é leme we ó, nye ósa ó, bé kuma é l'ombɨmbɨa é mɨpaʼ mimyɛh, njɨ é jɔʼ bɨna ga e boo nɔɔ, bé ókumo tɨʼ ɨ.