Ebrœ̂ 10 - Kálara Zyɛ̌m Edwán é mpʉ̌n

¹ Motie Zyɛm a ntɨh Moyiz ɨ, mé ó dweʼle, sa lé elɛʼle mpʉ bɨsa bɨ embɨa, byé ójala le ebe é jɔʼ byé ópyal ɨ. Motie maa, mé adila mɨkubo bɨsa byaa. Opara, bé ediʼ Zyɛm otir tɔɔ motwina mompwar ó, é mbu wiwɛh é l'efu e bʉr o ndɨ egwɨm dwiibɨ Zyɛm ɨ. Sa gwar, motwina mɔɔ, mé ákwoʼ sa ó, bé kuma é l'ombɨmbɨa é mɨpaʼ mimyɛh.

² Nkʉ mɨndwɛa mpʉ motie lé elɛɛ ɛ, myé a be ó be, be lé esa ó, Zyɛm dihla boo bʉr nɛʼɛ, mpa baa lé edwiibɨ Zyɛm é zi mɨndwɛa ɛ, bɨ bɛa pubɔ jɔʼ gwar é bɨjɔʼ bibyɛh. Bé a ngbaa be ó, si gwaʼ lé esyɛl ba e bé bʉr o tɨ, tiibe e mɨsyem myɔɔ.

³ To kœb ó, yé abe no. É mbu wiwɛh, mɨndwɛa myaa, myé ekʉ jɨm-jɨm bɨtoŋla mɨsyem myɔɔ ó, jɨm jɨmɨ.

⁴ Ebe, motié mɨnjʉm bɨntɛɛ ndwe e maa bɨkɨla, mé ákwoʼ sa ó, Zyɛm pɛʼɛ baa nye a niʼe mʉr é lɔb mɨsyem mye e.

⁵ Ebe no, é jɔʼ Krɨst a be, nye mu kunokuno le eni é si nwaʼ ɛ, nye a lɛɛ e Zyɛm ó: «Go agwɨm ó, bé dweʼ go motwina, nkʉ mɨndwɛa. Go a cye nyʉl wam ó, nye jɛna mobyaʼ mo bʉr.

⁶ Leme go, wé a baagwɨm ó, bé diʼɨ go otir, ó bé dwe ó go ba. Wé a baakpɛl ó, bé dweʼ go yʉʉ sɔʼɔ mpʉ motɔɔ ebe mɨsyem myɔɔ.

⁷ No ó me a lɛɛ e go ó: “Mbe me! Da Zyɛm ɛ! Me kʉ ka ze ó njɨ me saʼ gwɨma yo! Me ó mʉr lɔb we ndɨ tila é Kalara Zyɛm go e.”»

⁸ Sa Krɨst a lɛɛ ɛ, yé a be ó: «Go agwɨm ó, bé dweʼ go motwina, nkʉ mɨndwɛa, nkʉ ntɔʼ otir ontinɨ lé ejɛna mobyaʼ mɔɔ e tɨʼ ɨ. Go agwɨm nteme ó, bé dweʼ go yʉʉ sɔʼɔ mpʉ motɔɔ é lɔb mɨsyem myɔɔ.» To kœb ó, mɨndwɛa myaa mimyɛh, myé ó b'a lwibɔ é motie mo Zyɛm!

⁹ Krɨst ntɔʼ lɛɛ ó: «Mbe me! Da Zyɛm ɛ! Me kʉ ze ó, lé eze sa gwɨma yo!» Nye a pɛʼ mɨndwɛa mɨ efoʼ ó, nye nkʉʼ kar zi edwe edwan e ndwɛa we.

¹⁰ Bɨna mu ó si pubɔ jɔʼ gwar é bɨjɔʼ bibyɛh ebe gwɨma yaa, ndwe e kɛha Yesʉs-Krɨst a ze kɛha nyʉl we tɔɔ motwina ɛ.

¹¹ Opara, bé esea ó, dobo lɨlɛh. Bé ecyɛb ocɨcyel lé ediʼ otir tɔɔ motwina ndwe e motwina é tititi, dam be mpʉ mɨndwɛa mɨnɨ ndɨ mbɛh, abe e nkul esa ó, Zyɛm pɛʼɛ baa gwar é bim bɨbaa nye a niʼe é lɔb mɨsyem ɨ.

¹² To kœb ó, Krɨst nyɛɛ a si dwe Zyɛm motwina mompwar é jɔʼ gwar lé epɛʼ mɨsyem é l'efu e bɨjɔʼ bibyɛh. Nye ze to di si é mbo ejʉm we.

¹³ Yi ka liʼ ó, njɨ sa gwar: ebono jɔʼ Zyɛm ósa bʉr o dɔm be ó, bé diʼe cyela mokʉ ye e.

¹⁴ Nyɛɛ a kʉ dwe ó njɨ ndwɛa ngwar, bʉr o b'a be ó, bé pubɔ ɛ, bé ntɔʼ puba mbɨmbɨa é mɨpaʼ mimyɛh. Bé ódi-di no ó njʉmdia e njʉmdia.

¹⁵ É lɔb ngwar waa, Mbɨambɨa Sisim, nye eboʼlo nteme e bɨna ga ó:

¹⁶ «Da, nye elɛɛ ó: “É jɔʼ ndɨ eze e, me óka de mpʉn e be ó, é mbi wi: Me ógba motie mam é mɨleme myɔɔ. Motie maa, me óbe nteme ó mɨtila é bɨtoŋla byɔɔ.”»

¹⁷ Pie tɨ, nye ze ko tɨʼ nteme ó: «Mɨsyem myɔɔ le ntaŋa motie wɔɔ, me aŋa ka toŋlo bye.»

¹⁸ É jɔʼ bɨbaa bɨ ebebe bɨnɨ, byé mu si niʼɔ, é niʼɔ niʼɔ, ntɔʼ ka pɛʼɔ ɛ, mɨndwɛa lé epubo mʉr tɨʼ é nko paʼ mɨsyem ɨ, myé aka bâʼle be e nyɔm.

Bɨna dihla ga kunokuno e Zyɛm

¹⁹ Ebe no, obɨɔ ga bam aa! Eswɨɨ e motié mo Yesʉs, lɨ sa ó, mɨleme ga mina diʼe mɨlwɨŋla e mbɛla. Bɨna toʼ ga ó, to pyal é l'Odia mo Zyɛm ndɨ e l'ekɛn ɨ, tʉŋlʉ.

²⁰ Yesʉs a kar bɨna ga edwan e zi ó, bɨna nkʉʼ ntaa ga kan ebe wé a taare la bɨna ga zi ɨ. Bɨna mu ó lé ebi tiʼ molu mo mpoʼ mɨmɛh é zi waa, é jɔʼ bɨna lé ecwɨɨ ga é nyʉl we e.

²¹ Mpʉ bɨna ga mu e njwɨɨ opara ndɨ lʉ sa yiyɛh, waa ndɨ é mpaŋ Odia mo Zyɛm ɨ,

²² no ó bɨna lé ejala le edihle ga kunokuno e nye e, lwɨŋla e mbɛla e buʼo ndɨ eduho é mɨmo si ɨ. Mɨleme ga mina, myé mu ó si pubɔ. Mɨpɛhla mɨleme ga mina, myé abe lé eka nwahle bɨna ga ó, bɨna bé ó e mobe. Monyʉl ga mɨna, mé ó mɨnjwɨ̀a e modibe ndɨ é ncyɛh-ncyɛh ɛ.

²³ Bɨna mɛʼla ga sa lé eloŋlo mɨleme ga mina e mbɛla ɛ, abe e l'ocabcab. Mʉr a liʼe bɨna ga e monkɛʼ ɛ, nye nteme, nye ó mʉr ebuʼla.

²⁴ Mʉr nyiwɛh cwɨa e l'obɨɔ ga bɨna. Yé ó ngo sa ó, mɨɔ nyiwɛh toʼ dolo lé ekpɛl bʉr ofih, le esa be mɨmpaŋ bɨsyɛɛla.

²⁵ Mʉr aliʼe ga obɨɔ ga bɨna é jɔʼ bé lé egwɨhla lé edwe Zyɛm kum ɨ. Bʉʉ bʉr bɛɛ, bé mu ó lé esa no. Laa ó, bɨn saʼ no, fuo gba ga bʉʉ obɨɔ nkul é monyʉl. Saʼ ga no é buobuo, ebe, dobo Da Yesʉs óbula ze e, lé mu ó lé ekunbo, é mpʉ bɨna mu lé ebee ga ɛ.

²⁶ Yé be ó, bɨna bɨ gʉa ocyecye é kpɛhla, bɨna ntɔʼ kʉ gbaa ga ó, bɨna sa ga ó syem nɛʼɛ, lɛɛ ó, yé abe e motwina mé óbɛm pubo bɨna ga é nko paʼ mɨsyem myaa.

²⁷ Mʉr lé entaa motie no e, yé eka liʼ nye ó, njɨ ejoʼo bʉa, le ebono ebee mbi mobe Zyɛm ódwe nye e. Nye óto é Bɨ-siʼe ndɨ é diʼa diʼa, yé ódiʼ bʉr o dɔm mo Zyɛm ɨ.

²⁸ Mʉr nyiwɛh lé entaa motie mo Moyiz ɨ, bé ejʉ nye ó, jʉ jʉʼo, abe e njwɨʼa-nkoo. Bé esa nye no ó, é jɔʼ bʉr oba, nkʉ olɛl, lé esyɛŋa lé eboʼlo nye mboʼla ngwar ɨ.

²⁹ Bʉr pa taare jʉŋɔ é lɔb ebɨh bé lé esa motie mo Moyiz ɨ, a dwɛʼra e mʉr lé etíile Mwan mo Zyɛm é mobò me si ɨ? Nye ókʉ jala e bɨbebebebe bɨntɨʼa, laa naa! Mpʉ jwɨʼ ye ndɨ ɨ, yé ó yi: motié Krɨst a pyɛl é l'efu ó, Zyɛm deʼ edwan e mpʉn ɨ, mé mu nye ó tɨtoʼo, nyɛɛ yɛɛ si pa pubɔ e tɨ! Bɨn bé ejwɨʼ é yé, tiibe e mʉr a pyeh nteme Mbɨambɨa Sisim, a bɛa lɛʼle nye ncwɨncwɨa ɛ? Mʉr tɨʼ ósaŋɔ nyá ɛ?

³⁰ Bɨna bé ekʉ gʉa ga mʉr a lɛɛ ó: «Me ó ndɨ e nkuno. Me ódwe be myɛna mo ebebe lɔɔ.» Nye nteme ó b'a bâʼle lɛɛ ó: «Da nye mʉr tɨʼ ótiʼe kul bʉr ye mɨlɔb.»

³¹ Zyɛm, nye ó kʉ be kublakubla! Mʉr lé ekur é mobo me e, nye é bul bil ekɛn!

³² Toŋla ga mpʉ bɨn bé a be, é jɔʼ bɨn bé a kʉnɔ myɛn tiʼ ɨ, bɨn ze baran e mɨtuu e mɨndɛl le ekʉ dihbe.

³³ É til molu yaa, baʼ bʉr é l'esama lɨn, bé a be ó lé elwɨɔ le etíilɔ é kpɛŋlɛm. No ó, bʉʉ bʉr bɛɛ, bé a mɛʼle ó, bé fuʼa bʉr o b'a saŋɔ no e.

³⁴ Bɨn bé a si jwɨʼ bʉr o mɨmbʉʼ nkoo. É jɔʼ bʉr, bé a dɛn bɨn bɨsa bin ɨ, bɨn bé a be ó si bir bɨsa byaa e bɨsʉhʉ, ebe, bɨn bé a be ó si kʉ gʉa ó, bɨn bé óbana bi bɨdime bɨsa, laa byaa bé a dɛn ɨ. Byé nteme, byé ó bɨsa lé edi ɨ.

³⁵ Ebe no, mʉr beʼ l'acyɛʼ nyʉl. É jɔʼ bɨn ndɨ etʉm monyʉl ɨ, yé óbe bɨn e myɛna monɨnɨ.

³⁶ Sa lé ejɨŋɔ é nko paʼ win ɨ, yé ó bihbe. ǃBɨn si be e bihbe waa nɛʼɛ, bɨn bé ósa gwɨma mo Zyɛm é jɔʼ yaa. Bɨn bé óbi sa nye a kɛʼ bɨn ɨ.

³⁷ Kalara Zyɛm, nye elɛɛ ó: «Yi liʼ njɨ ma jɔʼ, mʉr lé eze e, nye ópyal; nye aŋa deʼ.

³⁸ Mʉr wam ndɨ e tiʼ molu mo mpoʼ mɨmɛh ɛ, nye ó njɨ waa a bi mokebe é mih mam ebe taa buʼo nye a jyɛʼ boo me e. Yé óbe si ka pyal ó, nyi buulo ntuʼo wa, leme wam, wé óbe ó, aka bee nye mbɨmbɨa.»

³⁹ Sa gwar, bɨna ga bɛɛ, bé abe bʉr o ndɨ ebuulo ntuʼo, ntɔʼ pɔhba, to dim ɨ. Bɨna ga bé ó bʉr o ndɨ e buʼo, baa bé óbi tiʼ molu mo mpoʼ mɨmɛh ɛ.