Ebrœ̂ 1 - Kálara Zyɛ̌m Edwán é mpʉ̌n

Zyɛm a ka lwib ó, é zi Mwan we

¹ Molu pihe, Zyɛm a lwib-lwib e bɨmpam ga bina ó, é zi ogwiha o mɨlɔb. Nye a lwib-lwib e be ó é buobuo mozi.

² No ó, é mpʉ esie e mbi jɔʼ yi, lé mu ó kunokuno le epyal ɨ, nye mu ka lwib e bɨna ga ó, cwɨɨ é Mwan we. Mwan we ó nye a kɛʼ ó, nye óbi bɨsa bibyɛh. É zi we ó Zyɛm a cye mosi mɨmɛh ɛ.

³ Moncɛnba mo Zyɛm, mé enyin ó, é nye. Nye ó ndɨ gulo lé elɛʼle mpʉ Zyɛm nye mʉr tɨʼ ndɨ ɨ. Nye ebaʼle si nwaʼ nyiwɛh ó, é zi lwib ye ndɨ e nkul ɨ. Nye a si dib zi epubo bʉr é lɔb mɨsyem myɔɔ. Nye ze to é jobo kʉ, to di si é mbo ejʉm mo waa ndɨ e mojwɨ̀ʼa monɨnɨ é jobo kʉ ɨ.

⁴ Ebe no ó Mwan we mu mbɨna kʉ, laa beengles ɨ. Ebe no nteme ó, Zyɛm a dwe nye bwaʼbwaʼ nkʉŋ, laa waa wɔɔ ɛ.

Mwan mo Zyɛm, nye elaa beengles é nkul mojwɨ̀ʼa

⁵ Zyɛm, nye apa lɛɛ e engles ngwar ó: «Go ó me mwan. Mɛm, mɨ bya go muh.» Nye nteme, nye apa lɛɛ, tiibe e nuu engles ó: «Mɛm, me ó nye sɔŋ. Nye ó mwan wam.»

⁶ É jɔʼ Zyɛm a be ó, nye lomlo ó bʉr o si nwaʼ Mwan we ndɨ e nkʉŋ ndɨ é bul bwaʼ ɛ, nye a taare lɛɛ ó: «Beengles bɨbɛh, dwiibɨ ga nye.»

⁷ Yé ó tila é Kalara Zyɛm é lɔb beengles baa ó: «Zyɛm ó b'a sa beengles be ó, bé fimɨ mɨkam mpʉ mɨpubo. bé diʼe mpʉ mɨnjʉl mɨ siʼe.»

⁸ Sa gwar, nye a lɛɛ, tiibe e Mwan we ó: «Zyɛm ɛ! Go ó lé edi é dia taʼa yo njʉmdia e njʉmdia. Go ejwɨʼ bʉr bo é l'ocyecye.

⁹ Go ekpɛl ó, mʉr ndɨ cɨcyel ɨ, nwim waa ndɨ ntɔɔ motie e. Ebe no, Zyɛm ɛ! Zyɛm Sɔŋ go a si lœm go mulo le eloŋlo leme go e bɨsʉhʉ, laa bʉr o nduo yo.»

¹⁰ Yé nteme, yé ó tila, tiibe e Mwan ó: «Da e! É l'etɔɔrʉ, go ó b'a cyel nkan si nwa. Jobo e l'ejyoo le ebantɛn, bibyɛh byé ó syɛɛ mobo mo.

¹¹ Bɨsa byaa bibyɛh, byé ódim. Gwɔɔ, go ódi ó, njɨ njʉmdia e njʉmdia. Bɨsa bibyɛh byɛɛ, byé ójwɨm mpʉ mɨkan.

¹² Go óbâʼ bye mpʉ bé lé ebâʼ len kʉr, komo ye é wolo mɨkan ɨ. Yé ó no: go ósiila bɨsa bibyɛh mpʉ mʉr lé esiila mɨkan mye e! Sa gwar, é nko paʼ go, gwɔɔ, go ódi ó njɨ jwɨʼ gwar, ajwɨm.»

¹³ Zyɛm a baalɛɛ é lʉʉ dobo, tiibe e nuu engles we ó: «Ntaʼ, ze di si wâ, é mbo ejʉm wam, to pyal é jɔʼ me ósa bʉr o dɔm bo ó, bé diʼe cyela mokʉ yo e.»

¹⁴ Beengles bɛɛ, bé ozé? Bɨbɛh, bé ó mɨsisim lé esea e Zyɛm ɨ. Nye elomlo bɨna ga ba nteme ó, bé ntaʼ, ze fuʼo bʉr bé óbi tiʼ molu mo mpoʼ mɨmɛh ɛ.