3 Yʉanes 1 - Kálara Zyɛ̌m Edwán é mpʉ̌n

Moswɨhlɨ

¹ Mɛm, cyɛb efoʼ Mbɛr-Zyɛm ó lé etile go. Me esoho go, mɨɔ kpɛl wih Gaywis. Me nteme, me ekpɛl go é l'ocyecye.

² Mɨɔ kpɛl wam, me ejwɨʼla e Zyɛm ó, go kœʼœ mbɨmbɨa ebò e cyen é nko paʼ tiʼ nyʉl bɨpuno, alɨn syɛl, abɨm ebɔʼ, jwɨʼ gwar mpʉ go lé ekœʼ mpaŋ ebò e cyen é nko paʼ sisim go e.

³ Me a si laŋle joʼo mombɨa é jɔʼ obuʼla bé a pyal ɨ. Bé a boʼlo é lʉ go ó, go ekʉ gʉa baʼle ocyecye, le ekœʼ nteme mpaŋ ebò e cyen.

⁴ Me apa joʼo yʉʉ sɔʼɔ embɨa mbi me lé ejoʼo é jɔʼ bé lé elɛɛ ó, bwan bam, bé lé ekœʼ ebò e cyen é l'ocyecye e.

⁵ Mɨɔ kpɛl wam, go ekʉ lɛʼle ó, go ó mʉr ebuʼla é jɔʼ go lé ebɨlan e l'obuʼla ɛ, dam be ó, bé ó go ojyoo.

⁶ Ojyoo bo baa, bé a si boʼlo é mih mo bʉr o Mbɛr-Zyɛm mpʉ go a cwɨa e be e. Dɨʼe fuʼo be no é bɨcyen byɔɔ, mbi fuʼa lé ejala e syɛl mosa mo Zyɛm ɨ, ó bé toʼ e bɨcyen byɔɔ dolo.

⁷ Bé mu ó si fulo é zi syɛɛ mo Krɨst. Bé esea syɛɛ yaa nteme ó, anyemle bʉr o ndɨ abe obuʼla ɛ, ó bé baʼla be bɨtiʼ.

⁸ Ebe no ó, bɨna ga obuʼla, bé ejala le efuʼo ga mbi bʉr waa ó, bɨna diʼe bʉr o ndɨ é l'empomo e syɛɛ egwar ɨ. Bɨna sea ga é l'efu le ocyecye mo Zyɛm.

Diotrɛfes bé e Demetrios

⁹ Me a si tile bʉr o mbɛr Zyɛm ma sɔʼɔ. No ó, anya-evuŋo mo Diotrɛfes, nye amɛʼle lɔɔ me a lɛɛ bɨn tɨʼ ɨ.

¹⁰ Ebe no, ǃme si bâʼle ze gʉʼ bɨn ye nɛʼɛ, me ójɨm nye bɨtoŋla é syɛɛla ebebe yiyɛh nye a pa sa ɛ. Nye eto le esa mpuʼ é lʉ wih é bebebebe. Abe njɨ bim yaa! Nye ebene bɨlan e l'obuʼla lé epyal-pyal bɨn ɨ. No ó, bʉr o b'a taare tiʼe é mɨleme ó, bé óbɨlan e l'ojyoo baa ɛ, nyɛɛ, nye ekamle be lé esa no. Nye nteme, nyi bana pɛʼ be é mbɛr Zyɛm win tʉŋlʉ!

¹¹ Mɨɔ kpɛl wam, abaŋa sa ndɨ é bebe e, njɨ yaa ndɨ é mbɨa ɛ. Mʉr lé esa bɨsyɛɛla bɨ ncwɨncwɨa ɛ, nye ó waa mo Zyɛm. Syɛl ebebe nyɛɛ, nye apa bee Zyɛm.

¹² Bʉr bɨbɛh, bé eboʼlo, tiibe e Demetrios ó, nye ekʉ gʉa sa. Ocyecye wé mʉr tɨ, ndwe e mboʼla bɨh bɛɛ lé eboʼlo e, byé ó lé eboʼlo, tiibe e nye. Go egʉa ó, mboʼla wih, wé ó cyecye.

Moswɨhlɨ

¹³ Me be é buo bɨsa bɨ elɛɛ bɨn. Sa gwar, me akpɛl ó, me lɛŋɨ bɨn bya é zi nkus ndwe e modibe mo lwab.

¹⁴ Me ebuʼla ó, me mu ó kunokuno le eze bee go. Bɨna bé ólwibla, lé ebɛɛla mompom.

¹⁵ Motala, mé beʼ e go. Ofo bo ndɨ wâʼ ɛ, bé esoho go. Soha me ofo ga bɨna ndɨ gʉʼ ɨ, mʉr nyiwɛh.