2 Yʉanes 1 - Kálara Zyɛ̌m Edwán é mpʉ̌n

Moswɨhlɨ

¹ Mɛm, cyɛb efoʼ Mbɛr-Zyɛm ó lé etile bɨn. Me etile ó, tamamʉma Zyɛm a pɛh ɛ, bé e bwan be. Me ekpɛl bɨn é l'ocyecye. Ntʉʼ me ome lé ekpɛl bɨn; yé nteme, yé ó bɨh e bʉr bɨbɛh ndɨ ekpɛl ocyecye e.

² Me etile bɨn é l'efu ó, bɨna nkʉʼ di ga e l'ocyecye. Wé ódi é bɨna ga é jɔʼ yiyɛh.

³ Mocyɛʼ mo mpom e njwɨʼa-nkoo ndwe e motala mo Zyɛm Sɔŋ bé e Yesʉs-Krɨst, ndɨ Mwan mo Zyɛm Sɔŋ ɨ, mé óswɨɨ é bɨna ga é zi ocyecye ndwe e ncwɨncwɨa.

Ocyecye ndwe e ncwɨncwɨa

⁴ Me a si laŋle joʼo mombɨa é jɔʼ me a joʼo ó, bwan bo, bé dina ó lé ekœʼ mbɨambɨa ebò e cyen é l'ocyecye tʉŋlʉ, mpʉ Zyɛm Sɔŋ a tiile bɨna ga etie e.

⁵ No ó, Mbɨambɨa mbɛa mʉma wi, mé etiile bɨn etie lɨ—ntʉʼ edwan le etie me lé etiile bɨn ɨ; yé ó njʉ̌m etie bɨn bé a bɛa bi, duho é l'etɔɔrʉ ɨ—, bɨna kpɛla ga paʼra ga wina!

⁶ Mpʉ bɨna lé ejala le elɛʼle kpɛl ó yi: lé ekœʼ mbɨambɨa ebò e cyen, lé edu motie me. No ó, etie laa, lé ó laa bɨn bé a joʼo, duho é l'etɔɔrʉ ɨ. Zyɛm a tiile bɨn la é l'efu ó, bɨn kœʼœ ebò e cyen laa.

⁷ Ebe, baanya-bɨkʉʉŋʉ, bé mu ó si buo é si nwaʼ nyiwɛh. Bé akpɛl mɛʼle ó, Yesʉs-Krɨst a ze é si nwaʼ ó e nyʉl bɨpuno. Mʉr lé esoŋlo ó, buʼo ga yina, yé abe cyecye e, nye ó ndɨ anya-bɨkʉʉŋʉ le mʉr dɔm mo Krɨst.

⁸ Bɨn bé à di ncye é nko paʼ bɨn bʉr o tɨ. Abir ga ó, bɨn dimla sa bɨna bé a bɛa sea ga syɛɛ é l'efu le e. Saŋa ga ó, bɨn biʼe myɛna maa é ntuʼ-ntu-ntuʼ.

⁹ Mʉr a be si taare jwɨʼ sikʉlʉ mo Krɨst, é jwɨʼ jwɨʼ, ntɔʼ ka kaŋa e sikʉlʉ yaa, liʼe ye pihe, ntɔʼ bula gʉmla, to le ejwɨʼ bɨsikʉlʉ bɨfih ɨ, bé e Zyɛm, bé aka be é nkɔm mpwar. Waa lé ejwɨʼ sikʉlʉ yaa, akaŋa e ye e, bé e Zyɛm Sɔŋ ndwe e Mwan we bɨbɛh, bé ó é nkɔm mpwar.

¹⁰ Ebe no, yé be ó nuu mʉr, nye efuuba ze gʉʼ bɨn ye, adwe bʉr bɨsikʉlʉ bɨmpwar ga bina nɛʼɛ, aniŋle ga nye ɨ modwii mɨn, nkʉ soho nye soha,

¹¹ ebe, mʉr lé esoho mbi mʉr waa ɛ, nye etœb bɨsyɛɛla bɨ ebebe mʉr waa lé esa ɛ, bana fuʼla nteme e myɛna mo tɨ.

Moswɨhlɨ

¹² Me é buo bɨsa bɨ elɛɛ bɨn. No ó, mɨ bee ó, me ákwoʼ lɛɛ bɨn bya é zi modibe mo lwab le epeb. Me ebuʼla ó, me óze gʉʼ bɨn ye, me lwibɨ e bɨn, bɨna lé ebɛɛla ga mompom, é mbi ndɨ ó, sʉhʉ ga yina, yé diʼe lwɨŋla ntinɨ e ntinɨ ɨ.

¹³ Bwan mo mɨɔ go, bʉr o Zyɛm a pɛh ɛ, bé nteme, bé esoho go.