2 Timotɛ 4 - Kálara Zyɛ̌m Edwán é mpʉ̌n

Lɛŋɨ Mbɨambɨa Lɔɔ

^1-2 Me entɛŋ go mɨnkɛla é mih mo Zyɛm bé e Yesʉs-Krɨst waa óze tiʼe mɨkubla le odwè mɨlɔb ó, go lɛŋɨ Mbɨambɨa Lɔɔ. Nye óbula ze, ntɔʼ cyel jwɨ̀ʼa ye. Leme, wé diʼe go é ntɨɨɨŋ ó, go lɛɛ ó njɨ lɔɔ waa é bɨjɔʼ lé ejala ɛ, ndwe e byaa ndɨ ajala e we e. Láŋa bʉr bɨbaa é lɔb mobebe mɔɔ. Bâma e bʉr. Gbaʼ be nkul é monyʉl. Saʼ no e bihbe, ndwe e sikʉlʉ mpa.

³ Ebe, jɔʼ, yé eze, é jɔʼ bʉr, bé ópyeh mpaŋ sikʉlʉ bɨna lé ejwɨʼ ga ɛ. Bé ókʉ joʼo-joʼo ó, njɨ bɨsikʉlʉ lé etine be ó, bé toʼ le edu bɨgwɨma bɨ nyʉl bɨpuno wɔɔ. Bé ósyɛŋ esama le oyeʼle, lé ódɨ dwe be njɨ bɨsikʉlʉ byaa ɛ, bé nkʉʼ gʉa soho lé ejoʼo mye.

⁴ Bé aŋa ka joʼo ocyecye. Bé ógʉmla é bebebebe zi, ntɔʼ to laʼ mɨlʉ é bɨsa mɨlɔɔ.

⁵ Sa gwar, gwɔɔ, mɛrɨ leme é bɨjɔʼ bibyɛh. Dihba mɨtuu. Sea syɛɛ mo lɛa Mbɨambɨa Lɔɔ. Gwɔɔ syɛl mosa mo Zyɛm, sea empomo e syɛɛ ndɨ laa lo e.

⁶ É paʼ wam, me mu ó ndwɛa ósʉŋɔ si lé edwiibɨ Zyɛm e tɨʼ ɨ. Etœœlɨ lam, lé mu ó kunokuno le epyal.

⁷ Mɨ fwɛmla, tɛl mbɨmbɨa. Mɨ sa jwɨʼla mɨkam mokʉ, to pyal é l'odumo. Mɨ jyɛʼ taa buʼo yam boo Zyɛm, kʉ be mpʉ buʼo yina lé elɛɛ ɛ.

⁸ Yi kʉ ka liʼ me ó njɨ ebœrɔ epʉʼlʉ é lʉ, laa ndɨ koma é l'efu lam ɨ. Epʉʼlʉ laa, lé ó ngo lɛʼle ó, mɨ bi mokebe é mih mo Zyɛm. Da Yesʉs óbœr me la ó, é dobo nye óbula ze e. Nye ó tiʼà mɨlɔb ndɨ etiʼe é l'ocɨcyel ɨ. Nye aŋa dwe yɛɛ njɨ me e me. Mopʉʼlʉ maa, mé óbœrɔ nteme ó, bʉr bɨbɛh lé esoho dobo Yesʉs-Krɨst óbula ze e.

Vula lwib ndwe e mɨlɔɔ mo Pol

⁹ Saŋa zi eze kœb me wâʼ kam e kam.

¹⁰ Demas, nyi ntwiŋ me, ebe, nye ekpɛl mbi jɔʼ yi. Nyi to Tesalonika. Kresaŋ, nyi to lal Galat; Tit, nyɛɛ lé eto Dalmatia.

¹¹ Lʉkas nye ome o ndɨ wâ. Nʉŋa Markus, go ntaʼ me e nya. Nye e nyɔm ebe syɛɛ nye óbɛm sea e me e.

¹² Mɨ lomo Tisikos Efɛɛz.

¹³ É jɔʼ go óze e, go ntaʼ me e len kʉr wam. Wé a liʼ me ó, ɨ Troas, é mobo mo Karpʉs. Go à ze nteme me e mɨmbom mɨ okalara mimyɛh, kʉ bul be myaa ndɨ mɨpila e bɨkʉr bɨ tir ɨ.

¹⁴ Alɛksandros, ndɨ lul molul ɨ, a si bul sa me ebebe. Da Yesʉs óbala bɨsyɛɛla bye byaa.

¹⁵ Go nteme, gʉa di ncye! Mʉr nɨ, nyi bul tɨ mɨlɛa ga mina.

¹⁶ É jɔʼ efoʼ me a komo nkar wam si ɨ, abe e mʉr a ze me é nkɔm; bɨbɛh, bé a si ntwiŋ me! Zyɛm beʼ yɛɛ l'aniʼe be baa ebebe tɨ.

¹⁷ Tî wam ó b'a ze me é nkɔm, ndwe le egba me nkul é nyʉl. Nye a sa no ó, nye nkʉʼ cen mpaŋla waa é zi wam, mɛm cyela mɨtuno we, lé esa ó, bʉr o bɨkul bibyɛh nkʉʼ joʼo nye. No nteme ó me a syɛbɔ é nʉm ngbampwɨɨ ɨ.

¹⁸ Da Yesʉs óto le esyɛb me é jɔʼ yiyɛh bé ódɨ sa me ebebe e. Nye ósa ó, me pyala é jwɨ̀ʼa ye, yaa ndɨ é jobo kʉ ɨ. Nye dweŋɔ kum njʉmdia e njʉmdia. Amɛn.

Moswɨhlɨ

¹⁹ Soha me Priska bé e Akilas, ndwe e mbɛr bʉr mo Onesiforos.

²⁰ Erast, nyi liʼ pihe Korɛnt. Trofimos a diibe Miletos ó, ebe, nye a be ó lé esyɛb.

²¹ Saŋa zi eze pyal wâ, kolo l'apa taare. Ebulus bé e Pudens, e Linɔs, ndwe e Klodia bé e l'obuʼla bɨbɛh, bé esoho go.

²² Da Yesʉs diʼe e go é sisim. Mocyɛʼ mo mpom me, mé swɨŋɨ é bɨn.