2 Timotɛ 3 - Kálara Zyɛ̌m Edwán é mpʉ̌n

Molu mo efehle

¹ Gʉŋa sa yi: é molu mo efehle, yé óbe ó e bɨjɔʼ é kɔbla kɔbla.

² É til molu yaa, bʉr, bé óbul kpɛl ó, njɨ bé bʉr o tɨ. Bé ókpɛl mɔn laŋle. Bé e jaale ndwe e nkɛa nyʉl. Bé óbul pyeh bʉʉ bʉr. Bé aŋa joʼo obyɛl bɔɔ. Bé ólono embɨa bé lé esaŋɔ ɛ. Bé óbe ó bʉr o ndɨ epyeh Zyɛm ɨ.

³ Bé óbe ó e cere é mɨleme. Bé óbul sa zyee é jɔʼ bé e bʉʉ bʉr ndɨ e mɨlɔb ɨ. Bé óbe ó baanya-movoʼ. Bé aŋa gʉa egba monyʉl mɔɔ modile. Bé óbe ó bʉr o monyan, bʉr o ndɨ ebene bɨsa bɨ embɨa ɛ.

⁴ Bé ókɛha bʉr o nduo yɔɔ. Bé ósa bɨsa bibyɛh mpʉ mɨcehle mɨ ogʉ. Bé óbul nkɛɛ monyʉl mɔɔ. Bé ókʉ kpɛl ó, njɨ bɨsyɛɛla bɨpuno byɔɔ lé ebul gwɨm ɨ, akpɛlɔ Zyɛm.

⁵ Bé ósa jaale, lé ejɨ nyin ó, bɛɛ ó ndɨ edwaabe Zyɛm. To kœb ó, bé ókɛla ó, buʼo ga yina, yé abe e nkul. Cɛra e bʉr onɨ.

⁶ Bʉr o sama yɔɔ, bé óni é mɨmbɛr mɨ bʉr myoonkan é myaaa, lé esaa ekwab bʉba ndɨ luʼo pɨʼ ɨ, le edilɔ be molʉa mɔɔ. Bʉba baa, bé a si sa syem é buobuo, bé ntɔʼ liʼ e bɨjyɛʼ é nyʉl é luu-lu-luu. Bé óbe ó molʉa, bɨgwɨma byɔɔ lé ejwɨʼ be mɨmbi mimyɛh.

⁷ É jɔʼ yiyɛh, bé óbe ó lé ejwɨʼ bɨsikʉlʉ. Bé aŋa koʼo yɛɛ egʉa ocyecye é kpɛhla.

⁸ Mɨmpʉmpʉl mɨ oyeʼle myaa, myé óbe ó e bol syɛɛla Yanɛs bé e Yambrɛs, bé a be e ye e. Bé a si ngbaa tɨ mɨlɛa mo Moyiz. To kœb ó, bʉr onɨ, bé etɨ mɨlɛa mɨ ocyecye wé mʉr tɨ. Mopɨʼ mɔɔ, mé ó ontʉlontʉl. é nko paʼ buʼo yina, abe e syɛɛla gwar bé ndɨ e nkul ekoʼo.

⁹ Bé aŋa koʼo sɔʼɔ é zi pɨʼ yɔɔ, ebe, ogʉ wɔɔ, wé óka nyin bʉr é mih é kpɛŋlɛm, jwɨʼ gwar e gwar e mpʉ ogʉ mo Yanɛs bé e Yambrɛs, wé a ka nyin é pono e.

Motɨɨ mo epihe

¹⁰ Gwɔɔ mu ó si kʉ gʉa bee mpʉ me lé eyeʼle e, bee nteme ebò e cyen me lé ekœʼ œ. Go a si gʉa mɨtiʼa mɨ leme wam ndwe e buʼo yam. Go egʉa nteme bihbe wam, kpɛl yam, ndwe e mpʉ me lé ebɔma e mɨtuu ɨ.

¹¹ Go egʉa mpʉ bé a tíile me le esa me cere e. Bé a sa me no ó, ɨ Antios, le ɨ Ikoniʉm, ndwe ɨ Listra. Go egʉa mɨmbi bé a tíile me, mɛm njɨ lé edihbe e. To kœb ó, Da Yesʉs a si syɛb me é mobo mɔɔ mɨmɛh.

¹² Mʉr nyiwɛh lé ekpɛl dwiibɨ Zyɛm, waa ndɨ é zyɛŋa wɔɔ boo Yesʉs-Krɨst ɨ, nye ótíilɔ.

¹³ Bɨbɨbla bɨ bʉr, ndwe e baanya-bɨkʉʉŋʉ bɛɛ, bé óto le elɨŋa é buʼo ó, to-to ó toʼ. Bé óto dolo lé egomlo bʉr é bebebebe zi. Bʉʉ bʉr, bé óto gomlo be é mɔɔ mozi mo ebebe.

¹⁴ No ó, sa go a jwɨʼ, gʉa nteme ó, yé ó tɨʼ ɨ, yé diʼe go mboʼla é leme. Anyamle jɨha mɨmbi mɨ bʉr o b'a dwe go sikʉlʉ yaa ɛ!

¹⁵ Toŋla nteme mpʉ go a bɛa taare gʉa Kalara Zyɛm, duho é l'oncyom go e. Kalara waa, nye ó e nkul ecɨl bɨna. Ocyoo waa, wé elɛʼle bɨna ó ejyɛʼ taa buʼo yina boo Yesʉs-Krɨst. Buʼo yaa ó ndɨ edwe bɨna tiʼ molu mo mpoʼ mɨmɛh.

¹⁶ Mɨtila myaa mimyɛh, myé eduho ó boo Zyɛm. Myé e nyɔm é l'efu le edwe bɨna sikʉlʉ mpa, le edwe bɨna mobe é jɔʼ bɨna mu lé esa ebebe e. Myé eturo bɨna mɨlʉ, le etɨe bɨna mpʉ bɨna lé ejala le ekœʼ é l'ocɨcyel ɨ.

¹⁷ Myé ó ndɨ ekomlo mʉr mo Zyɛm nyiwɛh, lé esa ó, leme, wé diʼe nye é ntɨɨɨŋ ó, nye sa ó bɨsyɛɛla bɨ ncwɨncwɨa, mɨmbi mimyɛh.