2 Timotɛ 2 - Kálara Zyɛ̌m Edwán é mpʉ̌n

Diʼe nkɔɔ dɔm

¹ Mwan wam aa! Lela nkul é zi mocyɛʼ mo mpom Zyɛm a sʉ go, maa ndɨ epyal bɨna ga é zyɛŋa ga wina boo Yesʉs-Krɨst ɨ.

² Sikʉlʉ yiyɛh go a joʼo me lé edwe, yaa buobuo oboʼla bé a joʼo e, pɛhɛ bʉr be ebuʼla. Go à dwe be ya. Bɛɛ bé ófuʼla to le edwe bʉʉ bʉr sikʉlʉ gwar yaa.

³ Gwɔɔ nteme, dihba mɨtuu mpʉ mo me. Diʼe mpaŋ nkɔɔ dɔm mo Yesʉs-Krɨst.

⁴ Mʉr nyiwɛh a cyelɔ é dia zima ɛ, nye abe lé esyɛŋa é mɨlɔb mɨ si nwa. Nye eyeʼbe sɔʼɔ ó, njɨ syɛɛ ye, lé esaa ó, mʉr a cyel nye é dia ye e, nkʉʼ seʼle nye.

⁵ É bʉr oba lé efwɛmla é mosiŋ ɨ, mʉr óbœrɔ epʉʼlʉ é lʉ ɨ, nye óbe ó waa ósil nuu, du é mpʉ motie mo duʼo yaa ndɨ ɨ.

⁶ Syɛl mosa ndɨ egʉa sea ɛ, nye ó ndɨ ejala le etaare bi mode lé epah é peme e. Mode maa ó ndɨ nkɔb we.

⁷ Baʼla ekan me tile go lɨ, ebe, Da Yesʉs ódwe go ocyoo é mɨpaʼ mimyɛh.

⁸ Dɨʼe toŋlo Yesʉs-Krɨst, nta mo David a pàh ɛ, mpʉ Mbɨambɨa Lɔɔ wam lé elɛɛ ɛ.

⁹ Bʉr, bé a si kaʼ me monkara mpʉ sa lɛɛ ó, me a be ó zilngan. Me esia e mɨtuu ó ebe Mbɨambɨa Lɔɔ me lé elɛɛ ɛ. Dam be no, ntʉʼ lɔɔ ndɨ eduho boo Zyɛm ɨ, wé a kaʼɔ!

¹⁰ Ebe no ó me ndɨ edihbe mɨtuu mimyɛh ɛ. Yé ó é l'efu e bʉr o Zyɛm a pɛh ɛ, ó bé biʼe tiʼ molu mo mpoʼ mɨmɛh ndwe e kum é zyɛŋa wɔɔ boo Yesʉs-Krɨst.

¹¹ Lɔɔ wi, wé ó lɔɔ ebuʼla: «ǃBɨna si syɛŋa ga e Krɨst é l'efie le wa, bɨna bé óbi ga tiʼ molu mo mpoʼ mɨmɛh, bɨna ga e boo nɔɔ.

¹² ǃBɨna si dihbe ga mɨtuu wa, bɨna bé ódi ga nteme ó ojwɨɨ. ǃBɨna si lɛɛ ga ó, bɨna bé agʉa ga nye wa, nye ólɛɛ nteme ó, nye a baagʉa bɨna ga.

¹³ ǃBɨna dam gwaʼ ga lé ebe bʉr be ebuʼla wa, nyɛɛ é we paʼ, nye ó mʉr ebuʼla.» Nye ákwoʼ kɛla ó, nye abe mʉr ebuʼlɔ.

Syɛl mosa Zyɛm lé emɛʼle e

¹⁴ Jɨmɨ bʉr bɨtoŋla é mɨlɔb mɨnɨ. Go à ntɛŋ be mɨnkɛla é mih mo Zyɛm ó, bé gwaʼa le elɨr bʉr é zi mogo mɔɔ, lé egœa njɨ é lɔb mokan. Mogo maa, mé abe e nyɔm.

¹⁵ Saŋa zi edi mbi mʉr Zyɛm ójwɨʼ é lor, ntɔʼ bee ó, wé e nyɔm ɨ. Saŋa ó, go diʼe syɛl mosa ndɨ asɔma é syɛɛ ye e. É jɔʼ go ólwib-lwib e bʉr é sa lé etiibe e l'ocyecye mo Zyɛm ɨ, duʼo ntɨn.

¹⁶ Syɛhla baalwibalwiba o bʉr o ndɨ esa lɔɔ Zyɛm ebɨh ɨ. Byé abe e nyɔm é buʼo. Bʉr o ndɨ elʉo monyʉl mɔɔ é zi waa ɛ, bé egomlo bʉr é bebebebe zi, ó bé saʼ Zyɛm ebɨh.

¹⁷ Lwib yɔɔ, yé óbe ó mpʉ bol pɨɨ. É sama bʉr o ndɨ elwib no e, yé e Imenaus bé e Filetos.

¹⁸ Bé a gʉmla ó, é bebebebe zi, bé osi gwaʼ lé eka buʼla ocyecye. Bé elɛɛ ó, Zyɛm, nyi bɛa pɛ̀h bʉr é mofoo. Lɔɔ wɔɔ waa, wi sa ó, bʉʉ obuʼla, bé duma é nko paʼ buʼo yɔɔ.

¹⁹ Dam be no, nkan Zyɛm a cyel ɨ, nye dina ó, lé ecyɛb é nkʉʼʉ. Mokan nye a tile e nkan waa ɛ, mé ó ma: «Da, nye egʉa baa ndɨ baa be e.» Mʉʉ mo tɨ, mé ó: «Mʉr lé etɨʼ bɨr, le elɛɛ ó, nye ó ndɨ waa mo Da ɛ, nye ejala le esyɛhle sa ndɨ ozyɛhozyɛh ɛ!»

²⁰ É ntwaŋ mbɛr, yé e bɨfua mɨmbi mɨmbi. Ntʉʼ bibyɛh ndɨ mɨlula e gol, nkʉ e nkoho mɔn. Bɨfua bɨnɨ, byé e nyɔm é jɔʼ bɨsyɛɛ bɨ duu mu lé esaŋɔ ɛ. Byʉʉ bɨfua byɛɛ, byé ó mɨkpɛʼa e bɨlɨ. Byʉʉ nteme, mea e deʼe. Biha bɨfua, byé ebiŋɔ ó, njɨ é bɨsyɛɛ lé ebul pyehɔ ɛ.

²¹ Ebe no, ǃɨ mʉr óbe si puba ndwe le ebene bɨsyɛɛla byaa nɛʼɛ, Zyɛm ópɛh nye é l'efu e bɨsyɛɛ bɨ duu, le ecyel nye é dia mʉr we ndɨ saŋ ɨ. Da óbee ó, mʉr waa, nye é bul buo nyɔm é nko paʼ we. Leme, wé óbe ó mʉr waa é ntɨɨɨŋ ó, nye saʼ bɨsyɛɛla bɨ ncwɨncwɨa bibyɛh nye ótimle nye e.

²² Gʉa kʉ cɛra e bɨgwɨma bɨ oncyom. Duʼo njɨ bɨsa ndɨ cɨcyel ɨ. Buʼla Zyɛm. Lɛʼla bʉr ncwɨncwɨa. Gbaʼ motala paʼra bʉr e bʉr. Dɨʼe sa no, bɨn e bʉr bɨbɛh ndɨ ejwɨʼla e Da Yesʉs e mɨpɛhla mɨ leme ndɨ é pyɛɛɛ ɛ.

²³ Gʉa kʉ cɛra e bʉr o ndɨ epere motwii mpʉ bɨgʉ le mɨmiʼ ɨ. Go ejala le egʉa ó, mɨlɔb myaa, myé ebya sɔʼɔ ó, njɨ bɨtom.

²⁴ To kœb ó, yé ajala ó, syɛl mosa mo Zyɛm gœa. Nye ejala le edi é zɔhba-zɔhba é nko paʼ bʉr bɨbɛh, le edwe bʉr mɨmpaŋ mɨyeʼla, le egʉa edihbe nteme ebebe.

²⁵ Yé ejala ó, nye gʉa tɨe bʉr o ndɨ edo e nye e, e njwɨr é tala tala. ǃNye si sa no nɛʼɛ, Zyɛm óbɛm cyɛb be é mɨleme, ó bé gwɨma mobebe mɔɔ, le edwir mɨleme. Bé ògʉa ocyecye é jɔʼ yaa.

²⁶ Bʉr o ndɨ mɨmɛra é mpila mo Njwɨɨ moleme e, bé é mpila ó, bé saʼ mpʉ nyɛɛ lé egwɨm ɨ. Sa gwar, ocyecye mo Zyɛm, wé óbɛm sa ó, bé duho é mpila yaa é pololo.