2 Timotɛ 1 - Kálara Zyɛ̌m Edwán é mpʉ̌n

Moswɨhlɨ

¹ Mɛm Pol, lʉmlʉ mo Yesʉs-Krɨst é gwɨma mo Zyɛm ó lé etile go e. Me etile ó, é l'efu le etuno nkɛʼ tiʼ molu mo mpoʼ mɨmɛh nye a liʼe bɨna ga e wa ɛ. Bɨna bé óbi tiʼ molu mo mpoʼ mɨmɛh yaa ó, é zyɛŋa ga wina boo Yesʉs-Krɨst.

² Me etile ó, gwɔɔ mwan kpɛl wam Timote. Mocyɛʼ mo mpom, le njwɨʼa-nkoo, le motala mo Zyɛm Sɔŋ bé e Tî ga wina Yesʉs-Krɨst, mé swɨŋɨ é go.

Ndwɛa ekiba

³ Me edwe Zyɛm ekiba é jɔʼ yiyɛh. Me esa zyee lé esa mɨnjwɨʼla é l'efu lo, moho e pum. Me esea syɛɛ ye ó e mɨpɛhla mɨ leme ndɨ é pyɛɛɛ ɛ, jwɨʼ gwar mpʉ bɨmpam byam, byé a dɨ sea nye ya ɛ.

⁴ É jɔʼ me lé etoŋlo mpʉ go a jɨ ɨ, leme wam, wé ejoʼo ntɔʼ dweh ebee go. Leme wam, wé óbe ó lwɨŋla e bɨsʉhʉ lé ebâʼle bee go.

⁵ Me esa nteme ó, toŋlo-toŋlo buʼo yo ndɨ eduho é mo si ɨ. Yé ó mbi buʼo ngwar e ngwar nyɔŋ mpam go Lɔyis bé e nyʉŋ Enike, bé a be e ye e. Mɨ kʉ gʉa nteme ó, mbi buʼo waa ó ndɨ go nteme é leme.

⁶ Ebe no ó me lé ejɨm bɨtoŋla byo é nko paʼ bɨntɔɔ Zyɛm a nol go, byaa go a bi, duho é kɛla me a kɛl go mobo mam ɨ. No ó, saʼ ó, go fuʼa bʉr é zi bɨntɔɔ byo binɨ,

⁷ ebe, sisim Zyɛm a ntɨh bɨna bɛɛ ɛ, wé abe sisim bʉa. Wé ó sisim nkul, sisim kpɛl, sisim bihbe.

⁸ Ebe no, ajoʼo fwon é lɔb sa bɨna ndɨ eboʼlo ga, tiibe e Da Yesʉs ɨ. Laa ó, go joʼa mboʼla waa fwon, fuo dihbe yɛɛ mɨtuu lé entɨhɔ bɨna é lɔb Mbɨambɨa Lɔɔ ɛ. Go à dihbe é zi nkul Zyɛm lé edwe e. Ajoʼo nteme me fwon, mɛm ndɨ mbʉʼ we e.

⁹ Nye a baajebe bɨna ebe mɨmpaŋ bɨsyɛɛla bina. Nye a dwe bɨna ga tiʼ molu mo mpoʼ mɨmɛh le ejebe bɨna ó, bɨna diʼe mɨsaŋ mɨ bʉr be. Nye a sa no ó, ebe pɛhla we nye mʉr tɨ, le ncwɨncwɨa nye a be e nye, waa nye a be ó, nye ólɛʼle bɨna ɛ. Nye a bɛa lɛʼle bɨna ncwɨncwɨa ó, kʉ e si apa cyeŋɔ, é zi mo Yesʉs-Krɨst.

¹⁰ Ncwɨncwɨa waa a ka nyin é kpɛŋlɛm ó, é l'epyal mo Yesʉs-Krɨst, Tiʼbʉr ga wina. Nyi gbah efie. Nyi lɛʼle bɨna é zi Mbɨambɨa Lɔɔ nteme ó, bɨna bé ebi tiʼ molu mo mpoʼ mɨmɛh é zyɛŋa wina boo Krɨst.

¹¹ Mbɨambɨa Lɔɔ waa ó me lé etuno e, ebe, Zyɛm a si cyel me é dia cyela mɨtuno, le yaa lʉmlʉ, le yaa yeʼle.

¹² Ebe no ó me lé ebɔma-bɔma e mɨtuu ɨ. Dam be no, me ajoʼo ba fwon é lɔb tuu waa, ebe, me egʉa Zyɛm, waa me a jyɛʼ taa buʼo yam boo nye e. Mɨ kʉ gʉa nteme ó, nye ó e nkul esa ó, me gʉa baʼle sikʉlʉ nye a taare komo boo me e. Nye óbaʼle sikʉlʉ yaa ó, to pyal é dobo nye óbula ze e.

¹³ Gʉa baʼle mpaŋ sikʉlʉ go a joʼo me lé edwe e. Yé diʼe go dweʼle, sa go óto le entɛŋ bʉʉ bʉr ɨ. Dɨʼe yeʼle é mbi waa, e buʼo, ndwe e kpɛl, mpʉ bɨna lé ebi ga bye é zyɛŋa wina boo Yesʉs-Krɨst ɨ.

¹⁴ Baʼla sikʉlʉ go a bɛa timlɔ ɛ. Mbɨambɨa Sisim lé edi é bɨna ɛ, wé ókʉ kɛm go tɨ.

¹⁵ Go ebɛa gʉa ó, bʉr o lal Azia bɨbɛh, bɨ ntwiŋ me. Figɛlus, ndwe e Ermogɛn, bé ó é sama bʉr baa tʉŋlʉ.

¹⁶ Da Yesʉs saʼ mbɛr bʉr mo Onesiforos mombɨa mɨmɛh, ebe, nye a be ó si bul lɛʼle me nkʉnkoo, zɔʼ e zɔʼ. Nye ajoʼo ba fwon ebe me ndɨ é nkara é mbɛr mɨmbʉʼ.

¹⁷ É jɔʼ nye a pyal Rom ɨ, nye a be ó, nye saŋa me kam e kam. Nye a si bana kœb nteme me!

¹⁸ Go ekʉ gʉa nteme mpʉ nye a sea e bʉr o Efɛɛz ɨ. Da Yesʉs saʼ ó, nye biʼe njwɨʼa-nkoo é mih me é dobo nye óbula ze e.