2 Tesalonika 3 - Kálara Zyɛ̌m Edwán é mpʉ̌n

Jwɨʼla ga e Zyɛm é l'efu lɨh

¹ Obɨɔ ga bam aa! Bɨh bé eka tile bɨn ó, bɨn jwɨʼla e Zyɛm é l'efu lɨh, ó lɔɔ lé etiibe e Da Yesʉs ɨ, wé toʼ dolo kam e kam, ó bʉr dweʼ lɔɔ waa duu, du mpʉ bɨn bɛɛ mu lé edwiibɨ we e.

² Jwɨʼla ga nteme ó, Zyɛm syɛbɨ bɨh é mpel bɨbɨbla bɨ bʉr, ebe, ntʉʼ bʉr bɨbɛh lé ejyɛʼ taa buʼo yɔɔ boo Zyɛm.

³ Sa gwar, Da Yesʉs, nye ó mʉr ebuʼla. Nye ódwe bɨn nkul, le ekamle e bɨn é nko paʼ mo Bɨbla-mʉr.

⁴ Da Yesʉs, nye egba me mbɛla é leme é lɔb win, ebe, me ebuʼla ó, sa me a lɛɛ bɨn ɨ, yé ó yaa bɨn mu lé esa ɛ. Me ebuʼla nteme ó, bɨn bé óto dolo lé esa sa gwar yaa.

⁵ Da cyɛba bɨn é mɨleme, ó bɨn kpɛlɨ nye. Nye saʼ nteme ó, bɨn dihba mɨtuu é mpʉ Krɨst a dihbe mye e.

Epɨh

⁶ Obɨɔ ga bam aa! É die mo Tî ga wina Yesʉs-Krɨst, bɨh bé elɛɛ bɨn ó, bɨn tiʼa nduula e mbuʼla win nyiwɛh lé esa epɨh ɨ. Cɛra ga e nye, ebe, nye adu mɨnjwɨr bɨh bé a ntɛŋ bɨn ɨ.

⁷ Ebe, bɨn bʉr o tɨ, bé ekʉ gʉa mpʉ bɨn lé ejala le enʉa dweʼle tiʼ yih ɨ. Bɨh bé a baasa epɨh é jɔʼ bɨh bé a be paʼra win ɨ.

⁸ Bɨh bé a baade mode mo nuu mʉr mbɛh, ajɛna. Bɨh bé a be ó lé esea syɛɛ moho e pum. Bɨh bé a sa no ó, bɨh beʼ l'agba nuu mʉr é bɨn tuu é nyʉl lé enkɛɛ mbeʼ wih.

⁹ Dam be no, bɨh bé ó e nkul mojwɨ̀ʼa ndɨ ó, bɨh biʼe bɨsa bin, de. Byé ó dɔɔ. Sa gwar, bɨh bé a be ó lé ekpɛl lɛʼle bɨn mpaŋ ebò e cyen, laa bɨn bé a jala le ekœʼ œ.

¹⁰ É jɔʼ bɨna bé a be ga ɛ, bɨh bé a lɛɛ bɨn ó: «Yé be ó, nuu mʉr, nye amɛʼle sea bɨsyɛɛ nɛʼɛ, nye dihba za.»

¹¹ Bɨh bé etile no ó, ebe, bɨh lwanbe kʉ joʼo ó, bʉʉ bʉr o mbɛr Zyɛm win, bé esa epɨh. Bé egʉa ó, njɨ elaʼ mɨlʉ é bɨsa byoonkan.

¹² No ó, é nko paʼ bʉr baa, bɨh bé elɛɛ be é die mo Da Yesʉs-Krɨst ó, bé sea bɨsyɛɛ byɔɔ é dwiii. Bé óbi mode mɔɔ ó, duho é syɛɛ mobo mɔɔ.

¹³ Obɨɔ ga bam aa! Monyʉl, mé beʼ l'acyɛʼ bɨn pie mɨmpaŋ bɨsyɛɛla bɨn lé ebɛa sa ɛ.

¹⁴ ǃƗ mʉr si be, ajoʼo motɨɨ bɨh lé edwe bɨn é kalara nwaʼ nɛʼɛ, nʉŋa ga nye die. Tiʼa ga nduula e nye. É mbi waa ó nye ójoʼo fwon ɨ.

¹⁵ Sa gwar, abee ga nye mpʉ sa lɛɛ ó, nye ó mʉr dɔm win. Bala ga nye, ebe, nye ó mbuʼla.

Moswɨhlɨ

¹⁶ No ó, Da Yesʉs, waa lé egba bɨna ga motala é mɨleme e, nye gbaʼ bɨn motala maa é mɨleme bɨjɔʼ bibyɛh, le mozi mɨmɛh. Da Yesʉs diʼe e bɨn bɨbɛh.

¹⁷ Mɛm Pol, me etile bɨn mokan maʼ ó e mbo wam: Moswɨhlɨ mo Pol! É mbi nɨ ó me lé esân okalara bɨbɛh me lé etile e. Mpʉ me lé esân-sân yaa ó yi.

¹⁸ Ncwɨncwɨa mo Da Yesʉs-Krɨst, nye diʼe e bɨn bɨbɛh.