2 Tesalonika 1 - Kálara Zyɛ̌m Edwán é mpʉ̌n

Moswɨhlɨ

¹ Mɛm Pol ó lé etile bɨn kalara nwa, bɨh e Silas, ndwe e Timote. Bɨh bé etile ó, bʉr o mbɛr Zyɛm ndɨ ɨ Tesalonika ɛ. Bɨn bé ó baa mo Zyɛm Sɔŋ bé e Da Yesʉs-Krɨst.

² Mocyɛʼ mo mpom le motala mo Zyɛm Sɔŋ bé e Da Yesʉs-Krɨst, mé swɨŋɨ é bɨn.

Mɨnjwɨʼla mo Pol

³ Obɨɔ ga bam aa! Bɨh bé ejala le edwe Zyɛm ekiba é bɨjɔʼ bibyɛh é lɔb win. Yé ekʉ jala nteme no, ebe, bɨn bé eto le ejyɛʼ taa buʼo boo Zyɛm. Kpɛl bɨn lé ekpɛl bʉr ɨ, yé ebwaʼ ó bwaʼa.

⁴ No ó, é nko paʼ wih, é jɔʼ bɨh lé epyal é myʉʉ mɨmbɛr mɨ Zyɛm ɨ, bɨh bé edoʼo e bihbe e buʼo bɨn ndɨ e bye e, ebe, é jɔʼ bé lé etíile bɨn, le esa bɨn jeele e laŋ ɨ, bɨn bé edihbe.

⁵ Syɛɛla yin yaa, yé ó dweʼle, sa lé ekʉ lɛʼle bɨna ga ó, Zyɛm, nye e l'ocyecye é jɔʼ nye lé etiʼe bʉr mɨlɔb myɔɔ no e. É mpʉ bɨn lé esa bihbe no e, yé esa ó, bɨn jala e bɨdia é jwɨ̀ʼa mo Zyɛm mu lé ecyelɔ ɛ. Ebe no ó bɨn lé ebɔma e mɨtuu e mɨndɛl mɨnɨ ɨ.

Dobo Da Yesʉs óbula ze e

⁶ Ebe, Zyɛm, nye ó cɨcyel é syɛɛla ye yiyɛh. Nye ókuna bɨn, ndwe le ebala bɨntɨʼa bʉr lé edwe bɨn ɨ.

⁷ Yé nteme, yé óbe ó mpaŋ syɛɛla é jɔʼ nye ódwe bɨna ga bɨbɛh egbala pie bɨntɨʼa bin ɨ, ebe, bɨna bé ókʉ gbala ga é jɔʼ Da Yesʉs ónyin, duho é jobo kʉ ɨ. Bé e beengles be, baa ndɨ é lele monkul ɨ, bé ópyal é njʉl siʼe tʉŋlʉ.

⁸ Nye óze lé eze kab bʉr o ndɨ abuʼla ɛ, bɨntɨʼa, e baa ndɨ asa mojoʼo é jɔʼ bé lé ejoʼo Mbɨambɨa Lɔɔ mo Tî ga wina Yesʉs ɨ.

⁹ Bé ósia e bɨntɨʼa. Nye ódimle be. Bé ódim ó njʉmdia e njʉmdia. Bé ócenɔ é l'ejaa, bɛɛ l'aka pyal é mih mo Da Yesʉs. Bé aŋa ka kunbo e gumo nkul e kum we ndɨ ɨ.

¹⁰ Nye óze sa be no é dobo le etiʼ e mɨlɔb, é jɔʼ mɨsaŋ mɨ bʉr be, bé ódwe nye kum ɨ. Bʉr bɨbɛh bé óbe si jyɛʼ taa buʼo yɔɔ boo nye e, bé ójehe nye é l'epyal le. Bɨn nteme bé óbe ó tɨʼ é sama yaa, ebe, bɨn bé a si buʼla mboʼla wih.

¹¹ É paʼ waa nteme ó bɨh lé ejwɨʼla é bɨjɔʼ bibyɛh é l'efu lɨn ó, nye beŋɨ mbɨmbɨa ó, bɨn bé ekœʼ ebò e cyen nye a jebe bɨn ó, bɨn kœʼœ œ. Bɨh bé ejwɨʼla nteme ó, nye cyɛba bɨn é mɨleme ó, bɨn loŋla bɨsyɛɛ bibyɛh bɨn mu lé ebuʼla ó, bɨn bé ejala le esea nye e.

¹² No ó, bɨn bé ógʉa dwiibɨ Tî ga wina Yesʉs, nyɛɛ nteme seʼle bɨn ɨ, é zi ncwɨncwɨa mo Zyɛm Sɔŋ ga wina bé e Da Yesʉs-Krɨst.