2 Pyɛr 3 - Kálara Zyɛ̌m Edwán é mpʉ̌n

Dobo Da Yesʉs óbula ze e

¹ Obɨɔ o kpɛl bam aa! Kalara mba me lé etile bɨn ó nwa. Me etile-tile bɨn no ó, me nkʉʼ jɨm bɨn bɨtoŋla, bɨn nkʉʼ pahle-pahle bye é mɨleme ndɨ abe mbaʼra e bɨkʉʉŋʉ ɨ.

² Me egwɨm ó, bɨn toŋla mɨsaŋ mɨ ogwiha o mɨlɔb, le mokan bé a bɛa lɛɛ molu pihe e, ndwe e mɨtiʼa Tî ga wina le Tiʼbʉr ga wina a nʉa ɛ. Mɨtiʼa myaa ó bɨn bé a joʼo é zi mɨlʉmlʉ mye e.

³ Sa efoʼ, gʉa mɛr ga sa yi: é jɔʼ esie e mbi jɔʼ yi, lé óbe kunokuno le epyal ɨ, bʉr, bé óbe lé ekœʼ ebò e cyen mpʉ bɨgwɨma byɔɔ lé etine be e. Bé óbe ó bʉr o pyeh,

⁴ ebe, bé ólɛɛ-lɛɛ ó: «Lɛa nye a lɛɛ-lɛɛ ó, nye óze e, wé ó kʉ be lwib mbɛh. Oda, bɨ bɛa dime mih, nye l'aze. Sa yiyɛh, yé ó jwɨʼ gwar e gwar e mpʉ yé a bɛa be, taare é l'etɔɔrʉ, é jɔʼ Zyɛm a cye sa yiyɛh ɛ.»

⁵ Bé ekʉ saa ó, bé jɨha sa bé a taare gʉa ɛ. Sa yaa, yé ó: lwib mo Zyɛm ó b'a bɛa cye jobo e l'ejyoo le si é jɔʼ mya. Lwib ye nteme ó b'a sa ó, si bera, lé eduho é modibe. Yé a cye si ó e modibe.

⁶ Modibe mompwar maa, mé ntɔʼ bila bʉr o si bɨbɛh, jʉ be.

⁷ Lwib mo Zyɛm gwar e gwar yaa ó ndɨ ebaʼle jobo, le ejyoo le si nwa. Yé ódɨ baʼle bye ó, to pyal é dobo le etiʼ e mɨlɔb. Byé òdiʼɔ. Bʉr o ndɨ adwaabe Zyɛm ɨ, bé ódim cyecye é moho waa.

⁸ Obɨɔ o kpɛl bam aa! Ajɨha ga sa yi: é nko paʼ mo Da, dobo egwar, lé ó mpʉ tɔɔyin mɨmbu; tɔɔyin mɨmbu, nye ó mpʉ dobo egwar.

⁹ Da, nye ábɛa le epɛʼ nʉm we é bɛn. Nkʉ bʉʉ bʉr, bé ebee ó, nye edira monkɛʼ me jɔʼ yiyɛh e l'encyoo, é we paʼ, nye sɔʼɔ ó, é buo bihbe e bɨn, ebe, nye agwɨm ó, nuu mʉr dimɨ é nkɔb bʉr. Gwɨma leme we, yé ó, bʉr bɨbɛh gwɨma mobebe mɔɔ, le edwir mɨleme.

¹⁰ É dobo Da Yesʉs óbula ze e, nye ópyal bʉr ó, motwɨra, é mpʉ ndiblʉ. Jobo e l'ejyoo le ebantɛn, byé ójaa e bwaʼbwaʼ duu. Bɨsa bɨtwaʼa Zyɛm a cye, ntɔʼ me kʉ e si e tɨʼ ɨ, bibyɛh, byé ójɔa siʼe, ntɔʼ dinba. Si nwaʼ ndwe e bɨsa bibyɛh bʉr lé esa tɨʼ ɨ, byé óka gʉa gʉŋɔ.

¹¹ É mpʉ yé ndɨ ó, bɨsa biʼ bibyɛh, byé ódim no e, dɨʼe pahle ga! Wáa mbi ebò e cyen bɨn lé ejala le ekœʼ œ? Ebò e cyen laa, lé ó laa ndɨ ejala e mɨsaŋ mɨ bʉr ɨ, bé e bʉr o ndɨ edwaabe Zyɛm ɨ.

¹² Cye yiyɛh bɨna dina lé ekœʼ ga ebò e cyen laa ɛ, yé elɛʼle ó, bɨna bé ebono ga dobo Zyɛm óbula ze e. Bɨna bé esea ga nteme ó, syɛɛ yé ósa ó, nye kpahba ze e. É moho waa ó jobo e l'ejyoo le ebantɛn, byé ójɔa siʼe, ntɔʼ dinba.

¹³ Zyɛm a kɛʼ bɨna ga ó edwan e jobo e l'edwan le ejyoo, ndwe e l'edwan e si. Sa ndɨ ekœb dia tɨʼ ɨ, yé óbe ó yaa ndɨ cɨcyel ɨ. Bɨna ga bé é mpono lé ekʉ bono bye.

Motɨɨ mo epihe

¹⁴ Ebe no, obɨɔ o kpɛl bam aa! É mpʉ bɨna mu lé eka bono ga moho waa ɛ, nye ókœb bɨn nyá ɛ? Gbaʼ ga monyʉl lé edi abe e l'ebar, nkʉ ebebe bé a ngbaa nwahle bɨn e la ɛ. Diʼe ga é motala é jɔʼ nye óbula ɛ.

¹⁵ Cye yiyɛh bɨn dina lé ebee ó, Da Yesʉs, nye akpahbe ze e, dɨʼe lɛɛ ga é bɨjɔʼ byaa ó: «Nye é buo bihbe é nko paʼ bʉʉ osyɛl be ebebe é l'efu ó, nye dweʼ be tiʼ molu mo mpoʼ mɨmɛh.» É mbi waa ó mɨɔ kpɛl ga wina Pol a tile bɨn ɨ. Nye a tile no ó, é l'ocyoo Zyɛm a dwe nye e.

¹⁶ Nye elɛɛ bɨn mɨlɔb mɨmpwar myaa ó, é l'okalara bɨbɛh nye lé etile e. É bʉʉ okalara, nye a tile yɛɛ ó bɨsa ndɨ elara bʉʉ bʉr ɨ. Bʉr o ndɨ mɨmiʼ, baa ndɨ epɨŋla é l'ebò e cyen lɔɔ ɛ, é jɔʼ bé lé eláa miha mɨtila ɛ, bé ecene mɨlɔb mɨ tɨʼ guu mbi fih. Yé ó mpʉ bé lé ebɛa sa-sa nteme é jɔʼ bé lé eláa byʉʉ bɨpeh bɨ Kalara Zyɛm ɨ. Sa bé ójala e ye, yé ó nɨ!

¹⁷ Ebe no, obɨɔ o kpɛl bam aa! É mpʉ bɨn lé ebɛa gʉa sa nɨ ɨ, diʼe ga ncye, lé ekpɛɛ ó, bɨn bé amu jaa gʉmla é bebebebe zi, ntɔʼ to dim lé ebaŋa ontɔɔ o motie. Bɨn bé amu jaa pʉʼa é cye molele yin.

¹⁸ Toʼ le egwɨe ga ebe ncwɨncwɨa Tî ga wina le Tiʼbʉr ga wina Yesʉs-Krɨst lé elɛʼle bɨn ɨ. Bɨn bé à gwɨe nteme ebe bɨn bɨ gʉa nye. Nye ome ó ndɨ ejala e kum, taare é banana, to pyal é njʉmdia e njʉmdia. Amɛn.