2 Pyɛr 1 - Kálara Zyɛ̌m Edwán é mpʉ̌n

Moswɨhlɨ

¹ Mɛm, Simɔn Pyɛr, ndɨ syɛl mosa mo Yesʉs-Krɨst, ndɨ nteme lʉmlʉ we e, ó lé etile bɨn kalara nwa. Me etile ó bʉr o b'a bi mbi buʼo bɨh ndɨ e ye e, buʼo ga yina e l'odime é mɨpaʼ mimyɛh. Bɨna bé a bi ga buʼo yaa ó, ebe syɛɛla mo Yesʉs-Krɨst yé a be cɨcyel ɨ. Nye ó Zyɛm ga wina le Tiʼbʉr ga wina.

² Mocyɛʼ mo mpom le motala, mé swɨŋɨ é bɨn é ntuʼ-ntu-ntuʼ, duho é ngwɨa bɨn lé egʉa Zyɛm bé e Tî ga wina Yesʉs ɨ.

Njɨblɨ mo Zyɛm

³ Zyɛm a si dwe bɨna ga sa yiyɛh ndɨ e nyɔm é l'efu ó, bɨna biʼe tiʼ molu mo mpoʼ mɨmɛh le ekœʼ ebò e cyen é mbi nye ndɨ ekpɛl ɨ. Nye a sa no ó, é zi nkul nye ndɨ e nye ebe tiʼ nye ndɨ e ye e. Bɨna bi ga tiʼ molu mo mpoʼ mɨmɛh yaa ó, é zi ngwɨa bɨna lé egʉa ga nye e. Nye ó b'a jebe bɨna ga, lé elɛʼle mbɨambɨa njwɨr we ndwe e kum we.

⁴ Ebe no, bɨna mu ó si bi ga monkɛʼ ndɨ é buo dime e. É jɔʼ bɨna lé ebuʼla ga monkɛʼ me e, bɨna bé esyɛhle ga bɨbol mofulu bʉr o si nwaʼ ndɨ e bye, duho é bɨgwɨma byɔɔ ɛ. É zi waa ó bɨna lé ekœʼ ga ebò e cyen ndɨ elɛʼle njwɨr mo Zyɛm nye mʉr tɨʼ ɨ.

⁵ Ebe no ó me ndɨ elɛɛ e bɨn ó: Gbaʼ ga monyʉl lé etaʼ bɨsa biʼ é taŋa taŋa: é buʼo yin, bɨn bé à kɛl mbɨambɨa njwɨr. É mbɨambɨa njwɨr, bɨn bé à kɛl ngwɨa.

⁶ É ngwɨa, bɨn bé à kɛl mɛra leme. É mɛra leme, kɛlɨ ga bihbe. É bihbe, kɛlɨ ga edwaabe Zyɛm.

⁷ É l'edwaabe Zyɛm, kɛlɨ ga efo paʼra obɨɔ e l'obɨɔ. É l'efo paʼra obɨɔ e l'obɨɔ, kɛlɨ ga kpɛl.

⁸ ǃƗ mɨnjwɨr mɨnɨ si nyin le egwɨe é l'ebò e cyen yin nɛʼɛ, bɨn bé aŋa ka ncyehbe nkʉ lɛŋ bɨtiʼ bin mbɛh, lé ebaʼ mobo. Bɨtiʼ byaa, byé óka sa nteme ó, bɨn gʉŋa Tî ga wina Yesʉs-Krɨst é kpɛhla.

⁹ Sa gwar, mʉr ndɨ akœʼ ebò e cyen laa ɛ, mbea we, wé ajaa to. Nye ó mpʉ ntim. Nyi kʉ jɨha ó, Zyɛm a be ó si pubo nye é nko paʼ mɨsyem nye a be lé esa ɛ.

¹⁰ Obɨɔ ga bam aa! Me elɛɛ bɨn ó nɛɛ: gbaʼ ga monyʉl lé esea é dwiii é l'efu ó, bɨn gʉŋa cyecye ó, Zyɛm a si jebe bɨn, le epɛh bɨn, ebe, ǃbɨn si sa no nɛʼɛ, bɨn bé ákwoʼ duma é syem.

¹¹ No nteme ó Zyɛm óbeŋle bɨn le edib bɨn zi ó, bɨn niʼe é jwɨ̀ʼa mo Tî ga wina le Tiʼbʉr ga wina Yesʉs-Krɨst ɨ. Jwɨ̀ʼa ye yaa, yé ódi ó njʉmdia e njʉmdia.

¹² Me egʉa ó, bɨn mu ó lé egʉa mɨlɔb mɨ ocyecye mɨnɨ. Me egʉa nteme ó, myé ó ndɨ esa ó, bɨn cyɛba é nkʉʼʉ, apɨŋla. Me dam gʉa no, me ódɨ jɨm bɨn bɨtoŋla bɨ tɨʼ é jɔʼ yiyɛh.

¹³ Yé ó no: me ebee ó, yé ó cɨcyel lé ejɨm bɨtoŋla bin byaa é zi mɨlɛa myam, cye yiyɛh me dina kʉ ɨ. Diŋa ó, bɨn bé ókubla,

¹⁴ ebe, me egʉa ó, me mu ó kunokuno le edime mih, lé edu mpʉ Tî ga wina Yesʉs-Krɨst a bɛa lɛɛ me é kpɨbɨbɨ ɨ.

¹⁵ Me ógba nyʉl lé eliʼe bɨn e mɨtila myam. É jɔʼ me óka liʼe bɨn ɨ, mɨtila myaa, myé óka liʼ pihe lé ejɨm-jɨm bɨtoŋla bin é nko paʼ mɨlɔb mɨnɨ é jɔʼ yiyɛh.

Bʉr o b'a bee moncɛnba mo Krɨst ɨ

¹⁶ Bɨh ó b'a sa ó, bɨn gʉŋa mpʉ Tî ga wina Yesʉs-Krɨst a nyin e buobuo nkul ɨ. Yé a baabe ebe pɨʼ bɨh bé a nʉa, duho é bɨkɨkɛna bɨ mpʉl ɨ. Sa yé a sa ó, bɨh lɛʼla bɨn no e, yé a be ó bɨh bé a si bee mpwaʼ we e mih mɨh.

¹⁷ Zyɛm Sɔŋ a si dwe nye duu. É jɔʼ Zyɛm Sɔŋ a ntɨh twii, duho é dia kum nɨnɨ ye e, nye a lɛɛ ó: «Nwaʼ, nye ó mwan kpɛl wam. Me ekʉ mɨɨla e nye.»

¹⁸ Bɨh bʉr o tɨʼ ó b'a joʼo twii we é jɔʼ twii waa a duho é jobo kʉ ɨ. Yé a be ó é jɔʼ bɨh e boo nɔɔ, bé a be é l'ecwɨʼ ndɨ e l'ekɛn ɨ.

¹⁹ No ó, lɔɔ ogwiha o mɨlɔb bé a lɛɛ-lɛɛ ɛ, wé ó lɔɔ ebuʼlɔ. Bɨn bé à kʉ gʉa joʼlo lɔɔ wɔɔ é kpɛhla. Wé ó mpʉ elama lé epan é gumo edurʉ, lé a be-be lé mara bʉr ɨ. Toʼ ga dolo lé ebuʼla we, to pyal é jɔʼ mɛn, wé ólama, le é jɔʼ myɛn atwitwɛn molama mo mɛn, wé ópan bɨn é mɨleme e.

²⁰ Gʉŋa ga sɨʼ yi: yé abe e mʉr a gwih sa ndɨ tila é Kalara Zyɛm ebe gwɨma ye anta nye.

²¹ Ogwiha o mɨlɔb, bé a baagwih mɨlɔb mo Zyɛm lé edu mpʉ gwɨma mɨleme myɔɔ, myé a be e. Bʉr, bé a lwib ó, mokan mé a duho boo Zyɛm ɨ, é zi Mbɨambɨa Sisim.