2 Korɛnt 8 - Kálara Zyɛ̌m Edwán é mpʉ̌n

Mpʉ bʉr o Masedwan bé a fuʼo oYʉden ɨ

¹ Obɨɔ ga bam aa! Bɨh bé ekpɛl ó, bɨn gʉŋa lɔb wi: Zyɛm a si kʉ sʉ mocyɛʼ mo mpom me é mɨmbɛr mɨ Zyɛm ndɨ é Masedwan ɨ.

² Bé a si kʉ boblɔ é zi mɨtuu e mɨndɛl bé a sia e mye e. Dam be é l'enteʼe le egoblo lɔɔ, bwaʼbwaʼ bɨsʉhʉ byɔɔ, byé a si kʉ nyin é pono é zi mɨndwɛa myɔɔ.

³ Me mu ó mboʼla wɔɔ tɨ. Me elɛɛ bɨn ó nɛɛ: bé a si laŋle egba, du mpʉ nkul mobi wɔɔ, nye a be e. Bé a si kʉ gba, laa bim nkul mobi wɔɔ, nye a be e. Bé bʉr o tɨ, bé a tiʼe é mɨleme ó,

⁴ bé jwɨʼla e bɨh e nkul ó, bɨh mɛʼla ó, bé fuʼa mɨsaŋ mɨ bʉr mo Zyɛm ndɨ é Yʉda ɛ, ó bé diʼe é zyɛŋa-mɨleme obuʼla.

⁵ Syɛɛla bé a sa nɨ, yé a si laa mbi bɨh bé a be lé ebuʼla ɛ. Sa efoʼ bé a sa ɛ, yé a be ó, etimle bé bʉr o tɨʼ é mobo mo Da Yesʉs. Pie tɨʼ ó bé a ka timle bé bʉr o tɨʼ é mobo mɨh, é mpʉ Zyɛm a gwɨm ɨ.

⁶ Ebe no ó bɨh bé a jwɨʼla e Tit ó, nye toʼ bɨn ye, lé eto loŋlo syɛɛ mɨndwɛa nye a pa taare e.

⁷ Bɨn bé ó obil o bɨsa é mih mo Zyɛm, laa bʉʉ bʉr. Bɨn bé é bul laa bʉʉ bʉr é bim buʼo yin ndɨ ɨ. Bɨn bé elwib e mokan é lʉo-lʉo, laa bʉʉ bʉr, ndwe le egʉa ocyecye, ka kɛl bim bɨn lé egba monyʉl mɨn lé esa syɛɛ-Zyɛm ɨ, le é bim bɨn lé ekpɛl bɨh ɨ. É mpʉ yé ndɨ no e, saʼ ga mbɨambɨa syɛɛ yaa e mɨleme min mimyɛh, nteme laa bʉʉ bʉr!

Obuʼla o Korɛnt, bé ejala le edwe nteme myɔɔ mɨndwɛa

⁸ Sa me mu ó lé elɛɛ bɨn yi, bɨn bé abe é nkara ó, bɨn saʼ ye. Me ekpɛl ó, me lɛʼla mpʉ kpɛl yin ndɨ eduho bɨn é mɨmo si ɨ. Me ejwɨʼ ye ó, e yaa bʉʉ bʉr o b'a be e mɨleme é ntɨɨɨŋ ó, bé dweʼ Zyɛm mɨndwɛa myɔɔ ɛ.

⁹ Ebe, bɨn bé egʉa mpʉ Tî ga wina Yesʉs-Krɨst a cwɨa e bɨna ga ɛ. Nye a bɛa be ó mbil bɨsa, nye ze liʼe okum e l'ogbaa we, ze dwir nye mʉr tɨʼ anteʼenteʼe, ó bɨn kaʼ liʼ e l'okum e l'ogbaa, nyɛɛ liʼ e l'enteʼe le egoblo.

¹⁰ Banana, me elɛɛ bɨn ó, sa me lé ebee ó, yé é bul jɨŋɔ ɛ. É mbu pihe, bɨn o b'a be bʉr be efoʼ bé a tiʼe é mɨleme ó, bé ósyɛŋ mɔn mɨngula ɛ. Bɨn o b'a be bʉr be efoʼ nteme bé a taare ezyɛŋ ɨ.

¹¹ No ó, banana, yé é mbɨa ó, bɨn fwahla syɛɛ yaa. Mozyɛŋ, mé sia, mpʉ bɨn bé a taare gwɨm ó, bɨn syɛŋ ó syɛŋɨ ɨ. Syɛŋɨ ga bɨmɔn, lé ejwɨʼ e bim mobi mɨn ndɨ ɨ.

¹² Ebe, ǃbɨn si dwe Zyɛm yʉʉ sɔʼɔ e mpaŋ gwɨma nɛʼɛ, Zyɛm óbee ndwɛa waa mbɨmbɨa, lé ejwɨʼ e mobi bɨn ndɨ e me e. Nye aŋa jwɨʼ we e sa bɨn ndɨ abe e ye e.

¹³ Yé abe é l'efu ó, mɨtuu diʼe bɨn njɨ twii, bʉʉ bʉr bɛɛ lé edi é mopoʼ, duho é syɛɛ yin. Hɨʼɨ, yé abe no. Me ekpɛl-kpɛl ó, njɨ bʉr biʼe bɨsa mobim.

¹⁴ É jɔʼ yiʼ ó bɨn mu lé entuʼba e bɨsa. Yé é mbɨa ó, bɨn fuʼa baanteʼenteʼe. ǃBɨn si fuuba luʼo mobi, bɛɛ tiʼe é mopoʼ nɛʼɛ, bé ófuʼo bɨn. É jɔʼ yaa ó bɨn e boo nɔɔ, bé óbe ó e bɨsa mobim ɨ.

¹⁵ Yé ó mpʉ yé ndɨ tila é Kalara Zyɛm ɨ. Yé ó tila ó: «É sama bʉr o b'a to tœʼ manne ɨ, baa b'a bul tœʼ œ, bé a baabe e buobuo manne é jɔʼ bé a de e. Bʉr o b'a tœʼ ba titia ɛ, bé a baasaa manne bé deʼ.»

Tit bé e bʉr o nduo ye lé esyɛŋ mɨngula

¹⁶ Me edwe Zyɛm ekiba é lɔb syɛɛla ye! Nye a si cyɛb Tit é leme ó, wé diʼe nye é ntɨɨɨŋ ó, nye gulɨ bɨn. Bɨh e nɔɔ, bé ó jwɨʼ gwar é nko paʼ waa.

¹⁷ Tit a si mɛʼle sa mpʉ bɨh bé a jwɨʼla e nye ó, nye saʼ ɛ, lé eto bee bɨn. Sa gwar, nye a baato ebe lʉmlʉ wih wé ome. Leme, wé a bɛa be ó nye é ntɨɨɨŋ ó, nye ze ó gʉ, bɨn ye, duho é mɨtiʼa mɨ leme we.

¹⁸ Bɨh bé elomlo bɨn nya ó, bé e nuu mɨɔ ga wina, waa bé lé eseʼle é mɨmbɛr mɨ Zyɛm mimyɛh ɛ, ebe, mbi nye lé elɛɛ bʉr Mbɨambɨa Lɔɔ ɛ.

¹⁹ Yé abe njɨ no. Bé a pɛh nye nteme ó, nye toʼ, to liʼle bɨh, ó bɨh e boo nɔɔ sea syɛɛ ezyɛŋ e bɨmɔn byaa. Syɛɛ yaa, yé ódwe Da Yesʉs kum, lé elɛʼle gwɨma egul bʉʉ bʉr.

²⁰ Mɔn yaa, yé é buo. No ó, bɨh bé ebi ye ó, e l'ocyoo, lé ekpɛɛ ó, nuu mʉr amu jaa fœʼ bɨh, lé elɛɛ ó, bɨh bé ejeʼe ebi ebeʼe e mɔn yaa.

²¹ Bɨh bé egwɨm sa sa ndɨ é mbɨa ɛ, abe njɨ é mih mo Da Yesʉs mé ome, é bul laŋle ó é maa mo bʉr nteme.

²² Mʉr lɛl bɨh bé ólomlo bɨn ɨ, nye ó ndɨ waa bɨh lé ebee ó, nye ó mʉr ndɨ e nyɔm ɨ, ebe, nyi ntaa mobʉbla mbɨmbɨa, lé egba nyʉl é dwiii é syɛɛ-Zyɛm é bɨjɔʼ bibyɛh. No ó, nyi ka bul gba nyʉl é jɔʼ yi, ebe, nye e buʼo é mɨpaʼ mimyɛh é mɨlɔb lé edwɛʼ bɨn ɨ.

²³ É nko paʼ mo Tit, nye ó mʉr nduo wam, mʉr bɨh e nɔɔ ndɨ é l'empomo e syɛɛ egwar ɨ. É nko paʼ bʉʉ obɨɔ oba bé e boo nɔɔ lé eze e, mɨmbɛr mɨ Zyɛm, myé ó lé elomlo bɨn ba. É jɔʼ bʉr lé ebee syɛɛ yɔɔ ɛ, bé edwiibɨ Yesʉs-Krɨst tɨ.

²⁴ Ebe no, lɛʼla ga bʉr baa mbi bɨn lé ekpɛl bʉr ɨ. Bɨsyɛɛla byaa, byé óbe ó dweʼle, sa yé ólɛʼle bɨn ó, bɨn bé ekpɛl mɨmbɛr mɨ Zyɛm ɨ. Bé ógʉa ó, bɨlwib bɨh bé a lwib lé edoʼo e bɨn ɨ, byé a be ó ocyecye.