2 Korɛnt 7 - Kálara Zyɛ̌m Edwán é mpʉ̌n

¹ Ebe no, obɨɔ o kpɛl bam aa! É mpʉ bɨna ga bé a bi ga monkɛʼ monɨ ɨ, bɨna puba bɨna ga bʉr o tɨ, lé epɛʼ sa ndɨ elœʼ monyʉl ga mɨna ndwe e mɨsisim ga mina é mih mo Zyɛm ɨ. Bɨna kœʼœ ga ebò e cyen bɨna ndɨ é pememe, laa ndɨ ejala e bʉr o ndɨ edwaabe Zyɛm ɨ.

Bɨsʉhʉ mo Pol

² Saŋa ga zi ó, bɨn kpɛlɨ bɨh. Bɨh bé a baasa nuu mʉr ebebe. Bɨh bé a baagomlo nuu mʉr é bebebebe zi. Bɨh bé a baakpah nuu mʉr sɔʼɔ é zi bɨkʉʉŋʉ.

³ Me alɛɛ ó, me dwe ó bɨn mobe, ebe, me si bɛa lɛɛ e bɨn ó, bɨh bé ekpɛl bɨn kpɛl apurapura; dam be é l'efie, dam be é tiʼ.

⁴ Leme wam, wi loŋlo e mbɛla é lɔb win. Bɨh bé ó e nkul edoʼo e bɨn é buobuo. Nkul, nye mu ó lwɨŋla é leme wam. Bɨh dam be é mɨtuu e mɨndɛl tʉŋlʉ, bɨsʉhʉ byam, byé elaŋle!

Mpɔma e Tit

⁵ Ebe, é jɔʼ bɨh bé a pyal Masedwan ɨ, bɨh bé a baabi egbala. Bɨh bé a si dihbe mɨtuu é mɨpaʼ mimyɛh. É nko paʼ monyʉl mɨh, bɨh bé a bɔma ó e bɨtom. É mɨleme mih, bɨh bé a dɨ joʼo ó, njɨ bʉa.

⁶ To kœb ó, Zyɛm, nye ekɛm bʉr o ndɨ e monyʉl mɨfila si ɨ. Nye a si gba bɨh nkul é monyʉl é jɔʼ Tit a pyal ɨ.

⁷ Abe njɨ é l'epyal le, lé ome. Nye a gba me nkul é nyʉl nteme ó, lé ejoʼo mpʉ nye a taare fuʼɔ bɨn ye e. Me a ka gbaŋɔ nkul é nyʉl pie tɨʼ nteme ó, é jɔʼ nye a lɛɛ bɨh gwɨma yin ɨ, le mpʉ bɨn bé a jɨ modwe, le mpʉ bɨn lé ekpɛl me é buobuo e. Lɔɔ waa ó b'a bul gba me bɨsʉhʉ é leme.

⁸ Kalara me a tile bɨn ɨ, nye a si to kwɨɨ mompime mɨn. Dam be no, me agwɨma nye. Yé be ó, me a si taare gwɨma kalara waa nɛʼɛ, yé a be ó é jɔʼ me a bee mpʉ me a kwɨɨ mompime mɨn é ma jɔʼ ɛ.

⁹ No ó, me esoho kalara waa é banana. Nkʉ me esoho nye, yé abe, ebe, nye ó b'a liʼe bɨn é gœʼra-gœʼra e mocyɛʼ mo nyʉl. Me ebul soho nye ó, ebe, é jɔʼ bɨn bé a liʼ é gœʼra-gœʼra no e, me a si dib bɨn zi egwɨma mobebe mɨn, le edwir mɨleme. Bɨn bé a si joʼo mompime, ntɔʼ sa mpʉ Zyɛm lé ekpɛl ɨ. Ebe no ó bɨn bé a baadimle sɔʼɔ ebe syɛɛla yih ɨ,

¹⁰ ebe, é jɔʼ bɨna bé eliʼ ga é gœʼra-gœʼra e mocyɛʼ mo nyʉl ebe sa Zyɛm lé esa-sa bɨna ga ɛ, yé esa-sa ó, mʉr gwɨma mobebe me le edwir leme. Ndwira leme waa, wé esa ó, bɨna biʼe tiʼ molu mo mpoʼ mɨmɛh. Mʉr nyiwɛh Zyɛm lé ekwɨɨ empime e, nye abe lé egwɨma empime laa pie tɨ. To kœb ó, é jɔʼ bʉr o si nwaʼ lé egba mʉr empime é leme e, lé ebula jʉ mʉr waa ó, jʉ jʉʼo.

¹¹ Dwɛʼa ga sɔʼɔ njɨ mpʉ Zyɛm a dwir bɨn é mɨleme e. Empime lɨn, lé a be ó si sa ó: Mɨleme, myé diʼe bɨn é ntɨɨɨŋ ó, bɨn saʼ embɨa. Bɨn saŋa zi ndɨ ó, me tɨʼe bɨbaa bɨ ebebe me a niʼe bɨn ɨ. Bɨn joʼa kalara waa e tuu. Bɨn joʼa bʉa. Bɨn biʼe mɨmpaŋ bɨgwɨma. Bɨn beʼ e zyee é mɨleme. Bɨn kuna mʉr a saŋɔ ebebe e. Bɨsa biʼ bibyɛh, byé ó bɨdweʼle, bɨsa lé elɛʼle ó, bɨn bé ó bʉr o ndɨ agʉa lɔb ɨ.

¹² Kalara waa a baatilɔ é l'efu ó, me nwahla mʉr a sa ebebe e, nkʉ ebe me kɛmɨ waa a saŋɔ ebebe e. Me a tile bɨn kalara waa ó, yé nkʉʼ gʉa nyin mpʉ bɨn lé ekpɛl bɨh é buobuo e. Bɨn bʉr o tɨ, mbe ga mpʉ bɨn ndɨ ɨ, é mih mo Zyɛm.

¹³ Ebe no ó bɨn bé a gba bɨh nkul é monyʉl ɨ. Bɨh dam soho ebe nkul bɨh ndɨ e nye é mɨleme e, sa yé a bul laŋle gba bɨh bɨsʉhʉ é mɨleme e, yé a be ó bɨsʉhʉ mo Tit, ebe, leme we, wé a be ó si loŋlo e bɨsʉhʉ ebe bɨn bɨbɛh.

¹⁴ Yé cyecye ó, me a si doʼo e bɨn é mih me. Sa gwar, me a baasɔma. Mpʉ bɨh bé a lwib-lwib e bɨn é l'ocyecye é jɔʼ yiyɛh ɛ, Tit a si bee nteme no, ebe, bɨsyɛɛla bin, byé a si lɛʼle nye ó, bɨh bé a lwib ó e l'ocyecye lé edoʼo e bɨn.

¹⁵ Nye elaŋle bul kpɛl bɨn é jɔʼ nye lé etoŋlo mojoʼo mɨn, bɨn bɨbɛh ɛ, le é jɔʼ nye lé etoŋlo mpʉ bɨn bé a bɨlan e nye e bʉa e mosaʼ ɛ.

¹⁶ Me mu ka bul soho ó, bɨn bɛɛ, ebe, bɨn bɨ sa ó, me tʉmɨ nyʉl é mɨlɔb mimyɛh.