2 Korɛnt 6 - Kálara Zyɛ̌m Edwán é mpʉ̌n

¹ No ó, mpʉ bɨh lé esea e Zyɛm syɛɛ gwar yaa ɛ, no nteme ó bɨh lé ejwɨʼla e bɨn ó, é mpʉ Zyɛm mu si lɛʼle bɨn ncwɨncwɨa no e, abi ga ncwɨncwɨa waa mbɛh,

² ebe, yé ó tila ó: «É jɔʼ me a bee mbɨmbɨa ó, me cwɨa ó e go e, me a si joʼo go. É dobo me a pyal ó, me ntaʼ, ze dwe bʉr tiʼ molu mo mpoʼ mɨmɛh ɛ, me a si kɛm go.» Jɔʼ Zyɛm a bee mbɨmbɨa ó, nye ejala le ecwɨa e bɨna ga ɛ, yé ó yi! Dobo nye a cyel ó, nye ódwe bɨna ga tiʼ molu mo mpoʼ mɨmɛh ɛ, lé ó lɨ!

Mɨtuu mo Pol

³ Bɨh bé aŋa gba bʉr mobɔʼ é zi, lé ekpɛɛ ó, mʉr amu twe. No nteme ó bɨh bé ósa syɛɛ-Zyɛm, mʉr adwe bɨh mobe tɨʼ ɨ.

⁴ Bɨh bé elɛʼle é zi bɨsyɛɛla bih ó, bɨh bé ó kʉ be cyecye osyɛl o mosa mo Zyɛm. Bɨh bé esa no ó: lé esa zyee, lé edihbe mɨtuu e mɨndɛl, lé edihbe edi é mpila bɨsyɛɛ, lé edi e leme cyela kʉ,

⁵ lé edihbe ebiʼe, lé edihbe mbʉʼ, lé edihbe bɨntʉ, lé edihbe mɨtuu, lé edihbe nkehe, lé edihbe eti mode.

⁶ Bɨh bé elɛʼle bɨn bɨdweʼle, sa yé a lɛʼle bɨn ó, bɨh bé ó mɨlʉmlʉ ɨ. Yé a be ó: é l'ebò e cyen lɨh lé a be é pememe e, é ngwɨa wih, é bihbe wih, é ncwɨncwɨa wih, é bɨsyɛɛla bɨh lé esa é Mbɨambɨa Sisim ɨ, é kpɛl ndɨ eduho bɨh é mɨmo si ɨ,

⁷ é tuno bɨh lé etuno ocyecye e, é nkul nɨnɨ mo Zyɛm, é mokʉa mo dɔm bɨh lé eguho, nkʉ ntɔʼ monkuo bɨh lé epemle mokʉa mo bʉʉ bʉr e tɨʼ ɨ. Mokʉa mo dɔm mɨh maa, mé ó ocɨcyel wih.

⁸ Bɨh bé elɛʼle bɨn bɨdweʼle bɨ cye lʉmlʉ yih ó: é jɔʼ bé lé edwiibɨ bɨh, nkʉ sa bɨh pyeh e, é jɔʼ bé lé efœʼ bɨh nkʉ gumlo bɨh ɨ, é jɔʼ bé lé enʉa bɨh mpʉ mɨmpʉmpʉl, bɨh bɛɛ yɛɛ lé elɛɛ ocyecye e,

⁹ é jɔʼ bé ndɨ enʉa bɨh mpʉ bʉr o ndɨ agʉŋɔ ɛ, bɨh bɛɛ yɛɛ bʉr o lé egʉŋɔ ɛ, é jɔʼ bé ndɨ enʉa bɨh mpʉ mɨmuu, bɨh bɛɛ yɛɛ bʉr o dina kʉ ɨ, é jɔʼ bɨh lé ekabɔ bɨntɨʼa, bɨh bɛɛ yɛɛ l'ajʉŋɔ ɛ,

¹⁰ é jɔʼ bé sa ó, bɨh liʼɨ é gœʼra-gœʼra e mocyɛʼ mo nyʉl ɨ, bɨh bé eto dolo lé esoho é jɔʼ yiyɛh, é jɔʼ bɨh ndɨ é l'enteʼe, bɨh bɛɛ lé ekab buobuo bʉr mopoʼ e, é jɔʼ bɨh ndɨ é l'enteʼe e, bɨh bɛɛ yɛɛ lé entuʼba ɛ.

¹¹ Bɨh bé a si lwib e bɨn é l'ocyecye, obɨɔ bɨh, bʉr o Korɛnt. Bɨh bé ekpɛl bɨn é buobuo, kpɛl yaa lé eduho bɨh é mɨmo si.

¹² Bɨh bé a baabene bɨn. Bɨn ó lé ebene bɨh.

¹³ No ó, me elwib e bɨn ó, mpʉ bwan bam. Saʼ ga bɨh syɛɛla lé ejala e kpɛl yih yaa ɛ. Kpɛlɨ ga bɨh nteme é buobuo!

Etiʼe nduula e bʉr o ndɨ abuʼla ɛ

¹⁴ É syɛɛ-Zyɛm yin, adɨ baʼra ga mobo yɛɛ e bʉr o ndɨ abuʼla ɛ, ebe, wáa mbi zyɛŋa-mɨleme cɨcyel mʉr bé e bɨbla mʉr, bé e nkul ebe e nye e? Myɛn e l'edurʉ, byé ó e nkul esyɛŋa nyá ɛ?

¹⁵ Krɨst bé e Njwɨɨ moleme, bé ó e nkul etwe twii wáa mbi? Nkʉ ntɔʼ ó, wáa mbi nkɔb mbuʼla ndɨ e nkul ebi, bé e mʉr ndɨ abuʼla ɛ, jwɨʼ gwar ɨ?

¹⁶ Zê opara ndɨ esea é l'Odia mo Zyɛm tʉŋlʉ ɨ, bé e baa lé eto é mpah bé ndɨ edwiibɨ bɨbaŋabaŋa bɨdweʼle e, bé ó e nkul emɛʼle mɨlɔb é mbi ngwar ɛ? Ebe, monyʉl ga mɨna, mé ó bana kʉ be Odia mo Zyɛm ndɨ kublakubla ɛ! Zyɛm nye mʉr tɨʼ a lɛɛ ó: «Me ódi é sama yɔɔ, lé ekœʼ e be. Me óbe ó Zyɛm wɔɔ. Bɛɛ, bé óbe ó bʉr bam.»

¹⁷ Ebe no ó Da lé elɛɛ ó: «Duha ga é sama yɔɔ. Bɔʼa ga e be. Anyamle kuna ga e sa ndɨ elœʼ mʉr é mih mo Zyɛm ɨ. No ó me ómɛʼle lé ebaʼle bɨn me ye e.

¹⁸ Me óbe ó Sɔŋ win; bɨn bé óbe me ó bwan, mɨsile ndwe e mɨsoho. No ó Zyɛm Nkul nyiwɛh ndɨ elɛɛ ɛ.»