2 Korɛnt 5 - Kálara Zyɛ̌m Edwán é mpʉ̌n

¹ Bɨna bé egʉa ga ó, monyʉl ga mɨna, mé ó mpʉ bɨsaʼ. ǃMe si dwihɔ é saʼ yam, ndɨ nyʉl wam nwaʼ nɛʼɛ, me óbi odia ofih, waa óduho boo Zyɛm, ndɨ é jobo kʉ ɨ. Ntʉʼ bʉr bé a fumo odia waa. Wé ó ngo di njʉmdia e njʉmdia,

² ebe, é nyʉl nwaʼ tʉŋlʉ, me eto dolo lé esime é jɔʼ yiyɛh. Sa me lé ebul gwɨm ɨ, yé ó, me kaʼ di é mpaŋ odia wam, waa ndɨ é jobo kʉ ɨ.

³ Me e gwɨma eni é mpaŋ odia waa, ebe, me egʉa ó, é jɔʼ yaa, me óbe ó mpʉ mʉr a taare be fufwah, waa a ka bœrɔ kan ɨ.

⁴ É jɔʼ yi, cye yiyɛh me dina kʉ, é saʼ yiʼ tʉŋlʉ ɨ, me ebee tuu le esime, leme wam lé ekʉ gwɨm ó, mpa me mu ó si bi nyʉl wam ndɨ koma boo Zyɛm ɨ. Yé abe ó, me egwɨm foŋɔ nyʉl bɨpuno me ndɨ e nye nwa. Yé njɨ ó, me ekpɛl nyʉl lé edi njʉmdia e njʉmdia ɛ. Nye pɛʼɛ nyʉl ndɨ e nkul epuro e, lé edila nyiha.

⁵ No ó, mʉr a sa ó, bɨna diʼe ga no e, nye ó ndɨ Zyɛm. Nye ó b'a ntɨh bɨna ga Sisim we mpʉ bɛn, lé elɛʼle mbɨambɨa bɨkul nye lé ekomo bɨna ga ɛ.

⁶ Ebe no ó bɨna ndɨ etʉm ga monyʉl é bɨjɔʼ bibyɛh ɛ. Bɨna bé egʉa ga nteme ó, cye yiyɛh bɨna dina lé edi ga é mɨmbor monyʉl bɨpuno tʉŋlʉ ɨ, yé ó jɔʼ bɨna ga e boo Da Yesʉs dina é ncɛra ɛ.

⁷ Bɨna bé ebi ga tiʼ molu mo mpoʼ mɨmɛh ó, ebe taa buʼo bɨna lé ejyɛʼ ga boo Krɨst ɨ. Mʉr, nye abi ye ebe ebee e mih me.

⁸ Me ekʉ lɛɛ ó, bɨna bɨ tʉm ga monyʉl. Bɨna bé ebee ga embɨa lé etwaʼ é nyʉl bɨpuno nwa é l'efu ó, bɨna toʼ, to fil ga é mbɛr mo Da Yesʉs.

⁹ Bɨna dam di ga e tiʼ si nwaʼ mpʉʼ, nkʉ ó, bɨna dam twaʼ ga wâ, yé ejala ó, bɨna taara saa ga ó, Da beŋɨ syɛɛla yiyɛh bɨna mu lé esa ga ɛ, mbɨmbɨa.

¹⁰ Ebe, bɨna bé ó yɨma ó, bɨna pyala ga é mih mo Krɨst é dia tiʼà mɨlɔb ye. Mʉr nyiwɛh óbi myɛna nkʉ ntɨʼa ó, du mpʉ bɨsyɛɛla bye, byé a be nye é jɔʼ nye a be, nye dina é tiʼ si nwaʼ ɛ: nkʉ byé a be ó é mbɨa, nkʉ ó, byé a be ó é bebe.

Bɨna ga e boo Zyɛm, bɨ sàa ebe Yesʉs

¹¹ Bɨh bɨ gʉa sa lé esa ó, mʉr dwaaba Zyɛm ɨ. Ebe no ó bɨh lé eto le enyiŋ bʉr ó, bé buʼla nye e. Zyɛm, nyi kʉ gʉa mpʉ bɨh ndɨ ɨ. Leme wam, wé ó lwɨŋla e mbɛla ó, mɨpɛhla mɨleme min, mi gʉa bɨh nteme é mbi waa.

¹² É l'ocyecye, bɨh bé aseʼle bɨh bʉr o tɨʼ é mih mɨn. Sa bɨh tile e, yé ó, ebe, bɨn nkʉʼ be e l'ekan le elɛɛ é jɔʼ bɨn kpɛl mɨɨla e me e. Ebe no ó bɨn bé óbe e nkul ebɛʼ e bʉr o ndɨ edoʼo e bɨsa lé enyin kʉl ɨ. Bé adoʼo yɛɛ e byaa ndɨ be é mɨmo si ɨ.

¹³ Yé be ó, bɨh bé ekaa ogʉ nɛʼɛ, bɨh bé ekaa ó, é l'efu mo Zyɛm, lé edwiibɨ nye é zi waa. ǃBɨh pahle mɨlɔb mpʉ mɨpɨpɨʼ nɛʼɛ, bɨh bé esa no ó, é l'efu lɨn.

¹⁴ Sa lé etine bɨh ɨ, yé ó kpɛl Krɨst a gba bɨh é mɨleme e. Bɨh bɨ bee ó, mpʉ mʉr ngwar a dwè, jala e bʉr bɨbɛh ɛ, yé elɛʼle bɨna ga ó, bʉr bɨbɛh, bé a si dwè.

¹⁵ Nye a si jala e bʉr bɨbɛh é l'efu ó, bɨbɛh biʼe tiʼ molu mo mpoʼ mɨmɛh. Cye yiyɛh bé dina kʉ ɨ, bɨtiʼ byɔɔ, byé ejala le ebe e nyɔm é l'efu e mʉr a jala e be, ntɔʼ pàh ɛ. Bé aka jala le eka saa myɔɔ mɨnyɔm.

¹⁶ Ebe no, banana, bɨh e bʉr o si nwa, bé aka bee mʉr mbea ngwar. Dam be mpʉ bɨh bé a taare bee Krɨst wɔɔ mbi mbea ɛ, banana, bɨh bé aka gʉa nye é mbi waa.

¹⁷ Yé be ó, nuu mʉr, nye ó é zyɛŋa wɔɔ boo Krɨst cyecye nɛʼɛ, lɛɛ ó, nye mu ó edwan e cyea sɔʼɔ. Mɨnjʉ̌m bɨsɔʼɔ mimyɛh, mi laa; bɨsa bibyɛh mu ó, njɨ modwan e modwan.

¹⁸ No ó, syɛɛla yaa yiyɛh, yé eduho ó, njɨ boo Zyɛm. Nye ó b'a sa sàa lé edira bɨna ga e boo nɔɔ ɛ. Nye a sàa lɔb ga wina ó, dumo e Krɨst. Nye nteme ó b'a cyel bɨh é syɛɛ ó, bɨh niŋla bʉʉ bʉr é sama bʉr o bé e boo nɔɔ mu é sàa ɛ.

¹⁹ Ebe, Zyɛm a sa sàa e bʉr o si bɨbɛh ó, dumo e Krɨst. Nye aka láa bim bɨbaa nye a niʼe bʉr é lɔb motie bé a ntaa ɛ. Nye ze dwe bɨh nkul ó, bɨh toʼ le etuno mbɨambɨa sàa waa.

²⁰ Ebe no ó bɨh ndɨ mɨlʉmlʉ mo Krɨst ɨ. É jɔʼ bɨh lé ejebe bɨn ɨ, yé ó mpʉ sa lɛɛ ó, Zyɛm nye mʉr tɨʼ ó ndɨ ejebe bɨn. Ebe no ó bɨh lé ejwɨʼla e bɨn é zyɛŋa wih boo Krɨst ó, mɛʼla ga ó, bɨn diʼe baa Zyɛm a de mpʉn e be e!

²¹ Mʉr a baasa syem ɨ, nye ó ndɨ waa Zyɛm a kɛl mɨsyem mimyɛh é koo é ziʼrɨ ɨ. Yé a be ó é l'efu ga lɨna, ó bɨna nkʉʼ di ga ocɨcyel o bʉr é mih mo Zyɛm dumo e cɨcyel mʉr waa.