2 Korɛnt 3 - Kálara Zyɛ̌m Edwán é mpʉ̌n

¹ Zê bɨh mu ó lé ebâʼle taare lé eseʼle bɨh bʉr o tɨʼ ɛ? Zê bɨh bé lé ejala le elɛʼle bɨn okalara lé elɛʼle bɨn mbi bʉr bɨh ndɨ ɨ? Zê bɨn ó ndɨ ejala le elɛʼle bɨh okalara lé elɛʼle bɨh mbi bɨn ndɨ ɨ? Yé abe bɨna ga e nyɔm ó, bɨna saʼ ga no.

² Bɨn bʉr o tɨʼ ó ndɨ kalara wih a tilɔ é mɨleme mih tʉŋlʉ ɨ. Mʉr nyiwɛh óbɛm gʉa é kpɛhla é jɔʼ nye lé eláa kalara waa ɛ.

³ Bɨn bé elɛʼle é kpɛŋlɛm ó, bɨn bé ó kalara Krɨst a tile e. Kalara waa, nye elɛʼle nteme ó, syɛɛ bɨh bé a sa é l'esama lɨn ɨ. Bɨn bé abe kalara nuu mʉr a tile e nkus ndwe e modibe mo lwab ɨ. Bɨn bé ó kalara a tilɔ é zi Sisim mo Zyɛm ndɨ kublakubla ɛ. Nye a baatilɔ é bɨbah mokoʼ, njɨ é mɨleme min tʉŋlʉ.

⁴ Krɨst a si gba bɨh nkul é monyʉl. No ó bɨh lé etile bɨn é mih mo Zyɛm ɨ.

⁵ Yé akunbo ba e bɨh ó, bɨh lɛŋɨ ó, bɨh bé ó mbi bʉr o ndɨ ejala le esea nye syɛɛ yaa ɛ. Nkul ndɨ ó, bɨh sea nye ya ɛ, nye aduho é bɨh. Nye eduho ó, é Zyɛm.

⁶ Nye ó b'a dwe bɨh nkul ó, bɨh nkʉʼ di bʉr o ndɨ ejala le esea nye syɛɛ ye e. Bɨh mu ó osyɛl o mosa be, lé enyiŋ bʉr ó, bé nʉŋa Edwan e Mpʉn nye a de e bʉr ɨ. Nye a de mpʉn waa e be ó, é zi Sisim we, abe é zi motie ndɨ mɨtila ɛ, ebe, motie maa, mé ejʉ ó, jʉʼo. Sisim we ó ndɨ edwe bʉr tiʼ molu mo mpoʼ mɨmɛh.

⁷ É jɔʼ Moyiz a timle bʉr motie mé a be mɨmboʼla é bɨbah mokoʼ e, bé a kʉ ntaa me ó, ntaŋa, bé ntɔʼ dwè. É jɔʼ Moyiz a sea be syɛɛ yaa ɛ, yé a be ó e kum. Bwa b'Ɨzraɛl, bé a baabe e nkul edwɛʼ mpom mo Moyiz é tʉʉʉŋ ebe moncɛnba mé a duho é mpom we e. Moncɛnba me, mé a be nteme ó, lé eto le edime mé ome. Sa yé a ntɛŋ efie é bʉr ɨ, yɛɛ pa taare ncɛnba,

⁸ a dwɛʼra e yaa Mbɨambɨa Sisim! Sa yaa, yé é bul ncɛnba, laa yiha.

⁹ Sa Moyiz a sa ó, bʉr nkʉʼ dweŋɔ mobe tɨʼ ɨ, yɛɛ pa taare ncɛnba, a dwɛʼra e yaa Zyɛm a sa ó, bʉr biʼe mokebe tɨʼ ɨ! Yé óbe ó, é ncyɛn-nti-ncyɛn, laa yiha.

¹⁰ Bɨna bé óbɛm lɛɛ ga ó, moncɛnba mé a taare nyin é jɔʼ epihe e, mé aka be sɔʼɔ. Mé ancɛnba mpʉ maa mu lé enyin é zi syɛɛ ga yina é bananaʼ ɛ. Mɛɛ ó ka laŋle.

¹¹ Sa yé a be-be e moncɛnba mé a to le edime mé ome e, yɛɛ pa taare dwiibɔ, a dwɛʼra e yaa yé ódi njʉmdia e njʉmdia ɛ! Yé óbana dwiibɔ, laa yiha.

¹² Ebe no ó mɨleme mih mu si loŋlo e mbɛla ɛ. Mbɛla waa, wé ó ndɨ edwe bɨh nkul ó, bɨh lwibɨ e bɨn é kpɛŋlɛm.

¹³ Bɨh bɛɛ, bé abe mpʉ mo Moyiz. Nye a be ó si buuro mpom e kan é sʉlʉlʉ mpʉ egor, lé ekamle bwa b'Ɨzraɛl lé ebee mpom we, bé jaa bee moncɛnba mé a dime-dime mé ome e.

¹⁴ To kœb ó, taare é dobo laa, ze pyal é muh é dobo lɨ, ecyeble lɔɔ, lɨ lihba egʉʼla. Pɨʼ wɔɔ, nye ó mbuura e l'egor laa é jɔʼ bé lé eláa Njʉ̌m Sàa Kalara Zyɛm ɨ. Egor laa, lé ekʉ pʉʼa mʉr é mpom ó, njɨ é jɔʼ mʉr waa ndɨ é zyɛŋa wɔɔ boo Krɨst ɨ.

¹⁵ É jɔʼ yiyɛh bé lé eláa okalara baa ɛ, guu kan, wé dina ó lé ebuuro pɨʼ wɔɔ, ze pyal é muh é dobo lɨ.

¹⁶ To kœb ó, é jɔʼ mʉr si dwir leme we, jyɛʼ taa buʼo ye boo Da ɛ, egor laa, lé epʉʼa é fum lé ndɨ ebuuro pɨʼ wɔɔ ɛ.

¹⁷ To kœb ó, ekan e «Da» Kalara Zyɛm lé elɛɛ ɛ, lé elɛʼle ó Mbɨambɨa Sisim! No ó, gumo Sisim mo Da Yesʉs ndɨ ɨ, bʉr, bé mu ó é dia otî.

¹⁸ No ó, egor laa, lɨ pʉʼa é mompom ga mɨna. Ebe no ó bɨna ga mu lé ekʉ bee ga moncɛnba mo Da Yesʉs é sʉlʉlʉ ɨ, moncɛnba mo tɨʼ lé ekʉ pan nteme, duho é bɨna ga. Bɨna mu ó lé edwirɔ ga é l'efu ó, bɨna nkʉʼ gʉa nwɨɨla ga e nye, ndwe le elɛʼle bʉr kum we. Da ó lé edwir bɨna ga no, nyɛɛ waa bɨna lé ejebe ga ó, Mbɨambɨa Sisim ɨ.