2 Korɛnt 13 - Kálara Zyɛ̌m Edwán é mpʉ̌n

Motɨɨ é nko paʼ osyɛl be ebebe

¹ Yé mu ó jɔʼ lɛl me muno ze pyal gʉʼ bɨn ye e. Yé ó tila ó: «Lɔb wiwɛh, wé ókʉ tiʼɔ ó, njɨ ebe bɨlwib bɨ oboʼla oba, nkʉ olɛl.»

² Me a si taare bal bɨn é cyen mba é jɔʼ bɨna bé a be ga ɛ. Me ebâʼle bal bɨn é jɔʼ bɨna ga dina é ncɛra ó: ǃme si bâʼle ze nɛʼɛ, me aŋa kamle e mʉr ngwar é sama bʉr o dina lé esa syem mpʉ bé a bɛa sa mɨsyem é molu pihe e. Me aŋa kamle e baa dina lé esa syem ɨ.

³ Mbi zea waa, wé ó ngo be dweʼle bɨn lé egwɨm bee, yaa yé ólɛʼle bɨn ó, Krɨst ó ndɨ ekʉ lwib é zi wam. Krɨst, nye acyɛʼ é nko paʼ win! Nye ekʉ bul lɛʼle bʉr o mbɛr Zyɛm win nkul we.

⁴ Yé cyecye ó, nye a si bomlɔ e mosen, bɨnɔ é klos kʉ ebe ecyɛʼ le. Sa gwar, nye mu ó lé etiʼe é nkul mo Zyɛm. Banana, bɨh bé é cyɛʼ é zyɛŋa wih boo Krɨst. Sa gwar, ebe nkul mo Zyɛm, bɨh e boo nɔɔ, bé ótiʼe é nyɔm win.

⁵ Pahla ga bɨn bʉr o tɨ, bɨn beŋɨ nkʉ bɨn dina ó lé ejyɛʼ taa buʼo yin boo Zyɛm, nkʉ bɨn bé aka sa no. Bɨn bʉr o tɨ, saŋa egʉa ga nkʉ bɨn bé ekebe moveʼle le entaa mobʉbla. Zê bɨn bé agʉa ó, Yesʉs-Krɨst ó ndɨ é bɨn ɛ? Yé be ó, yé abe no nɛʼɛ, gʉŋa ga ó, bɨn bɨ ku moveʼle maa.

⁶ No ó, leme wam, wé ó lwɨŋla e mbɛla ó, bɨn bé óbee, le egʉa ó, bɨh bé aku moveʼle maa.

⁷ No ó, bɨh bé ejwɨʼla e Zyɛm ó, bɨn beʼ l'asa syɛɛla ebebe gwar. Me abul gwɨm ó, bʉr beŋɨ ó, bɨh bɛɛ, bɨ bi mokebe. Bé dam ka bee bɨh ó, bɨh bɨ ku moveʼle, me egwɨm ó, njɨ bɨn saʼ mɨmpaŋ bɨsyɛɛla.

⁸ Ebe, bɨh bé abe e nkul esa Zyɛm mongan, aboʼlo ocyecye we. Nkul wih, nye ó njɨ é nko paʼ elɛɛ ocyecye.

⁹ Bɨh bé esoho é jɔʼ bɨh lé enyin bɨcyɛʼ-bol, bɨn bɛɛ mɨlɨl-nkul ɨ. Lʉ ekan é mɨnjwɨʼla mih, wɛɛ, wé ó, bɨn gʉa kwɨmlɨ mbɨmbɨa.

¹⁰ Ebe no ó me mu lé etile bɨn bɨsa bɨnɨ cye yiyɛh me l'apa ze gʉʼ bɨn ye e. Yʉʉ jɔʼ, é jɔʼ me óze gʉʼ bɨn ye e, me aŋa kœb sa yé ósa ó, me lɛʼla bɨn nkul mojwɨ̀ʼa wam ɨ. Da Yesʉs a dwe me nya ó, me gbaʼ bʉr nkul é monyʉl, abe ó, me biʼe nkul waa njɨ é l'efu le elɨr be lɨrɨ.

Moswɨhlɨ

¹¹ Obɨɔ ga bam aa! Sa me óka tile bɨn é l'epihe e, yé ó nɛɛ: diʼe ga mbɨmbɨa. Dɨʼe komla ga paʼra win. Dɨʼe gba ga nkul é nyʉl mo mɨɔ nyiwɛh paʼra win. Dɨʼe toŋlo ga sa gwar. Tiʼa ga é motala. No ó Zyɛm lé eze bɨna ga e ncwɨncwɨa ndwe e motala ɛ, nye ódi e bɨn.

¹² Swɨhla ga mbɨmbɨa paʼra win, lé edwiila momuʼ ndwia ndɨ ti ɨ. Mɨsaŋ mɨ bʉr mimyɛh, myé esoho bɨn.

¹³ Ncwɨncwɨa mo Da Yesʉs-Krɨst, e kpɛl mo Zyɛm Sɔŋ ndwe e zyɛŋa-mɨleme mo Mbɨambɨa Sisim, byé diʼe e bɨn bɨbɛh.