2 Korɛnt 11 - Kálara Zyɛ̌m Edwán é mpʉ̌n

Ocyecye mo Pol

¹ Nkʉ bɨn be ó be, be e nkul edihbe ba ogʉ wam ba titia nɛʼɛ, mpa mɨ to dolo lé elwib. Sa gwar, bɨn bé ebɛa dihbe me!

² Ebe, me ebaʼ bɨn, mbɔʼ waa lé eduho boo Zyɛm. Mbɔʼ waa, wé ó, ebe, bɨn bé ó mpʉ saŋ ndu esehe me a bɛl njʉm ngwar ɨ. Njʉm waa, nye ó Krɨst.

³ Me ejoʼo bʉa. Me ekpɛɛ ó, bɨn bé amu jaa gomlo bɨbɛh é bebebebe zi ebe bɨkʉʉŋʉ. Bɨn bé amu dwibra e Krɨst jɔʼ gwar é dwirɨ, jwɨʼ gwar e gwar e mpʉ nyʉa a kʉa Efa, nye ntɔʼ bil é bɨkʉʉŋʉ ɨ. Bɨn bé amu jaa gwaʼ lé edwiibɨ Krɨst ntinɨ e ntinɨ.

⁴ Bɨn sa ó, bana kʉ dihbe ó, nuu mʉr ntaʼ, ze lɛɛ bɨn lɔɔ mo Yesʉs fih, Yesʉs yaa abe mʉr mpaŋla we bɨh bé a cen ɨ. Bɨn nteme bé é car lé emɛʼle sisim fih le guu lɔɔ fih, abe Sisim le Mbɨambɨa Lɔɔ bɨh bé a tuno e.

⁵ Mbea wam, wé yɛɛ ó: bʉr lé edoʼo le elɛɛ ó, bé ó ndɨ edihbe syɛɛ lʉmlʉ ɨ, sa bé ndɨ e ye e, me nteme, me e ye!

⁶ Yé be ó, me abe e nkul elwib e bʉr e mokan é lʉo-lʉo nɛʼɛ, me yɛɛ ó e ngwɨa bɨsɔʼɔ. É mozi monɨ mɨmɛh ó bɨh bé a lɛʼle bɨn mbi bʉr bɨh ndɨ ɨ, é mih mɨn é pono.

⁷ Me a si lɛɛ bɨn Mbɨambɨa Lɔɔ ndɨ eduho boo Zyɛm ɨ, anʉa myɛna. É jɔʼ me a fil nyʉl si e bɨn, bɨr bɨn kʉ ɨ, zê syɛɛla yaa, yé a be ó syem é mih mɨn?

⁸ Bʉr o mɨmbɛr mɨ Zyɛm ndɨ é bɨgumo bɨfih ɨ, bé ó b'a jɛna-jɛna me ya. Me a be ó si laʼ be é l'enteʼe, lé esea syɛɛ é l'efu lɨn.

⁹ No ó é jɔʼ me a be bɨn ye, me ndɨ é sɔɔlʉ ɨ, me a baafil nuu mʉr mbeʼ modile wam é nyʉl, ebe, obuʼla bé a duho Masedwan ɨ, bé a si ze me e ngula, lé edwe me sa yiyɛh yé a sa me sɔɔlʉ ɨ. No ó, é mozi mɨmɛh, me a si baʼle me mʉr tɨ, agba bɨn tuu é nyʉl. Me óto dolo lé ebaʼle me mʉr tɨʼ no.

¹⁰ Neme ocyecye mo Krɨst ndɨ é me, me ólɛɛ é lal Akayi mpʉ me a kœʼ ebò e cyen ɨ. Abe e mʉr ndɨ e nkul ekamle me lé edoʼo tɨ.

¹¹ Ebe yé me ndɨ ebene lé enʉa bɨmɔn bin ɨ? Zê yé ó ebe me ndɨ akpɛl bɨn ɛ? Zyɛm, nye egʉa ó, me ekpɛl bɨn!

¹² Syɛɛla me lé esa bɨn nɨ, me óto dolo lé esa ye. Me amu jaa nee bʉr zi ndɨ ó, bé pyala bɨn ye e moseʼla mɔɔ, bé ntɔʼ gba bɨn tuu é nyʉl. Bé amu ka lɛɛ ó, bɨh e boo nɔɔ, bé ó jwɨʼ gwar é nko paʼ ebò e cyen bɨh lé ekœʼ œ. Ebò e cyen lɔɔ, lé ó sa bé lé edoʼo e le e.

¹³ Mɨmbi mɨ bʉr myaa, myé ó mɨmpʉmpʉl mɨlʉmlʉ, osyɛl o mosa o bɨkʉʉŋʉ. Bé eliŋ bé bʉr o tɨʼ mɨlʉmlʉ mo Krɨst.

¹⁴ No ó, sa yaa, yé abe sa jehe, ebe, Satan nye mʉr tɨ, nye ebɛa liŋ-liŋ nye mʉr tɨʼ engles myɛn!

¹⁵ Ebe no, yé be ó, osyɛl o mosa mo Satan, bé eliŋ bé bʉr o tɨʼ ocɨcyel o bʉr nɛʼɛ, yé abe sa jehe. Efehle lɔɔ, lé ódu mpʉ bɨsyɛɛla byɔɔ, byé a be e.

¹⁶ Me ebâʼle lɛɛ ó, mʉr beʼ l'aláa ó, me ó gʉ. ǃBɨn ka lɛɛ ó, «Yaaa! Nye ó gʉ!» nɛʼɛ, dihba ga me mpʉ bɨn ndɨ ebɛa dihbe bɨgʉ ɨ. Ebe no ó bɨn bé ódwe me jɔʼ é l'efu ó, me doʼa e mɛm mʉr tɨʼ ɨ!

¹⁷ (Sa me lé elɛɛ nɨ, yé ó sa Da Yesʉs ndɨ akpɛl ɨ. É jɔʼ me lé edoʼo yi, me ekʉ lwib ó mpʉ gʉ!)

¹⁸ É mpʉ yé ndɨ ó, bʉr é buobuo, bé edoʼo e bɨsyɛɛla bɨpuno byɔɔ ɛ, me nteme óbɛm doʼo e me mʉr tɨʼ nteme,

¹⁹ ebe, bɨn, mɨpɨpɨʼ, bɨn bé emɛʼle lé edihbe bɨgʉ.

²⁰ Bɨn bé ebana dihbe mʉr lé edil bɨn é l'okomo e. Bɨn bé edihbe nteme, mʉr lé ede bɨpuno bin ɨ, le waa lé esà bɨn ɨ. Bɨn bé edihbe molɛɛ-nyʉl, le mʉr lé ejaa bɨn mompɛh ɛ.

²¹ Yé esa me fwon lé emɛʼle ó, ecyɛʼ bé lé elwɨɨ-lwɨɨ me e la ɛ, lé ó b'a sa ó, me l'ayi jaa bɨn mompɛh maa! Yé be ó, yé e nuu mʉr ndɨ e nkul edoʼo e yʉʉ syɛɛla e yʉʉ nɛʼɛ, mɛm nteme, me óbɛm doʼo e mbi syɛɛla ngwar e ngwar waa! (Me mu lwib naa ó mpʉ gʉ!)

²² Zê bé ó bɨmpɛh bɨ Ebrœ ɛ? Me nteme, me ó ye! Zê bé ó bɨmpɛh bɨ Ɨzraɛl ɛ? Me nteme, me ó ye! Zê bé ó mpoŋbʉr mo Abraham ɛ? Me nteme, me ó mʉr tɨ!

²³ Zê bé ó osyɛl o mosa mo Krɨst ɛ? (Me ekʉ lwib ó mpʉ gʉ!) Mɛm ó ndɨ é bul laŋle é nko paʼ waa! É nko paʼ bɨsyɛɛ, mɛm ó ndɨ é bul laŋle. É nko paʼ egbaŋɔ é mbʉʼ, mɛm ó ndɨ é bul laŋle. É nko paʼ mobiʼe, yé abe e tolɔɔ. É nko paʼ efie, me a be ó si jʉŋɔ zɔʼ e zɔʼ.

²⁴ OYʉden, bé a si fuura me mɨmbihe zɔʼ tɛn, é jɔʼ yiyɛh mɨmbihe zɔʼ mowʉm molɛl e bu.

²⁵ Bé a si kahle me mɨmbɨŋ zɔʼ lɛl. Me a si lumɔ mokoʼ jɔʼ gwar. Zɔʼ lɛl, me a si pamla efie é jɔʼ byɛl wih, wé a dɨ é maŋ ɨ. Moho ntinɨ ndwe e pum ntinɨ, me a si tonbo é l'oboʼo o maŋ.

²⁶ Mɨ jaʼra e bɨcyen zɔʼ e zɔʼ. Me a be ó si duho é ka foo lé entaa montibe monɨnɨ. Me a si pamla efie é mobo bɨzilngan, le maa mo kul yam, le maa bɨkul bɨfih. Me a be ó si ngbaa jʉŋɔ é bɨnkana, ndwe é bɨlʉn. Me a be ó si jɨbla, ngbaa dwè é maŋ. Me a si pamla efie é mobo mo okristen o bɨkʉʉŋʉ.

²⁷ Me a si jaʼra e mɨtuutuu bɨsyɛɛ le mokɔbla. Me a si di é dia nkehe zɔʼ e zɔʼ, e za ndwe e dweh modibe. Me a si ja za zɔʼ e zɔʼ. Me a si joʼo ejyoo, le edi fufwah.

²⁸ Me aka gum láa byaa byʉʉ byɛɛ. Sa lé eka kable tɨʼ kʉ, yaa lé ebul pebre me é leme e, yé ó: dobo lɨlɛh, me esyɛl ba e mɨmbɛr mɨ Zyɛm mimyɛh.

²⁹ Yé be ó, nuu mʉr, nye é cyɛʼ nɛʼɛ, yé edwe me ecyɛʼ e nyʉl. Yé be ó, nuu mʉr, nyi kol mbuʼla ebɔʼ nye lé ebɨm é leme nɛʼɛ, yé egba me ediʼa e leme.

³⁰ Yé be ó, yé ekʉ jala ó, me doʼa e me mʉr tɨʼ nɛʼɛ, sa me ndɨ e nkul edoʼo e tɨʼ ɨ, yé ó ecyɛʼ lam.

³¹ Zyɛm, waa ndɨ Sɔŋ mo Da Yesʉs ɨ, nye egʉa ó, me alɛɛ mpʉl. Nye e kum njʉmdia e njʉmdia.

³² Ɨ nkana Damas, ngoman mo njwɨɨbʉr Aretas a be ó si dible mobe mo nkana yaa ó, nye naʼ ó me mobo é nyʉl.

³³ No ó, me a ntaa pɨpɨm nkana ó, bʉr ntɛŋ me é wina, filɔ me si é l'ekuro tʉŋlʉ é nteeen, ze pɔhba be e mobo.