2 Korɛnt 10 - Kálara Zyɛ̌m Edwán é mpʉ̌n

Nkul mojwɨ̀ʼa mo Pol

¹ No ó, me mʉr tɨ, Pol, me ejwɨʼla e bɨn é zyɛŋa wih boo Krɨst, a fil nyʉl we si ɨ, le mʉr ndɨ é tala njwɨr ɨ—Mɛm, mʉr bɨn lé elɛɛ ó: «Nye efil nyʉl we si é jɔʼ bɨna ga e boo nɔɔ ndɨ gumo gwar ɨ», waa bɨn lé elɛɛ nteme ó: «Nye é bul sa yɛɛ monyan e bɨna ga é jɔʼ bɨna ga e boo nɔɔ mu é ncɛra» ɛ.

² Me ejwɨʼla e bɨn ó, ǃme si ze gʉʼ bɨn ye nɛʼɛ, bɨn beʼ l'asa ó, me lɛʼla bɨn mpʉ me ndɨ e nkul lwib é kpɛŋlɛm, abaawe sɔʼɔ e mʉr ɨ. Me elɛʼle monyan maa ó e bʉr o ndɨ elɛɛ ó, me ekœʼ ebò e cyen lé ebaŋa bʉr o si nwaʼ ɛ.

³ Yé cyecye ó, bɨna bé etiʼe ga ó, é si nwa. Sa gwar, dɔm bɨna lé elwimla ga ɛ, bɨna bé abe lé elwimla ga le e nkul bʉr o si nwa,

⁴ ebe, mokʉa mo dɔm ga mɨna, mé abe mɨfwana e nkul lé eduho é ma mʉr ɨ. Nkul ndɨ é mokʉa mo dɔm ga mɨna ɛ, nye eduho ó boo Zyɛm. Nkul waa ó lé esa ó, bɨna buʼa ga bɨpɨpɨm bɨ dɔm.

⁵ Sa ndɨ ebɨn lʉ we e, bɨna bé enkɛŋ ga ye si, bé e yaa lé ekamle bʉr lé egʉa Zyɛm ɨ. Bɨna bé elwimla ga ó, bɨna dwirɨ ga sa yiyɛh bʉr lé ejwɨʼ é mɨleme myɔɔ ɛ, yé diʼe yaa mu fila si é jwɨ̀ʼa mo Krɨst ɨ.

⁶ É jɔʼ bɨn bé óbe si sa mojoʼo ntinɨ e ntinɨ ɨ, ǃbɨh si kœb bʉʉ bʉr dina lé esa ebɨh nɛʼɛ, kunokuno yé óbe bɨh ó, bɨh láŋa be bɨbaa bɨ ebebe, le ekab be bɨntɨʼa.

⁷ Gʉa dwɛʼ ga bɨsa lé enyin é mih é pono e. ǃƗ mʉr si kʉ gʉa é zi buʼo ó, nye ó waa mo Krɨst cyecye nɛʼɛ, nye gʉŋa nteme ó, bɨna ga e boo nɔɔ bɨbɛh, bé ó baa mo Krɨst ngwar waa.

⁸ Da Yesʉs a dwe me nkul mojwɨ̀ʼa ó, me gbaʼ bɨn nkul é monyʉl, abe é l'efu le elɨr bɨn. Me óbɛm doʼo e nkul mojwɨ̀ʼa wam waa, me l'abil fwon.

⁹ Me akpɛl ó, bɨn beŋɨ ó, me ebɛŋ-bɛŋ bɨn é zi okalara me lé etile-tile bɨn ɨ.

¹⁰ Ebe, bé elɛɛ ó: «É jɔʼ Pol lé etile bɨh okalara ɛ, nye etile bɨna ga ó njɨ e monyan. To kœb ó, é jɔʼ nye ndɨ é l'esama ga yina ɛ, nye ó mpʉ cyɛʼ-bol; lwib ye nteme, lwib epyehɔ.»

¹¹ Me elɛɛ e waa lé elwib no ó: «É jɔʼ bɨh ndɨ é l'ejaa, tile bɨn kalara, tiibe e sa sî sa kɛ̀l ɨ, é jɔʼ bɨh bé ópyal bɨn ye e, sa yaa ó bɨh bé ótaare sa nteme e.»

¹² Yé beʼ akunbo ba e me ó, me lɛŋɨ ó, bɨh e bʉr o ndɨ eseʼle bé bʉr o tɨʼ ɨ, bé ó mɨcye. Dam be no, bʉr onɨ, bé ó kʉ be luʼo pɨʼ, ebe, bé enʉa jwɨʼ ó, e bé bʉr o tɨʼ é l'efu le egʉa bɨcye byɔɔ.

¹³ É wih paʼ, bɨh bé aŋa doʼo e bɨh bʉr o tɨʼ ntaa njɨ. Bɨh bé ódoʼo ó njɨ e syɛɛ yih. Empomo e syɛɛ Zyɛm a dwe bɨh ɨ, lé a be-be ó, taare wâ, ze kumo gʉʼ bɨn ye.

¹⁴ Bɨh bé antaa mɨnjɨ Zyɛm a tulo e. Ntʉʼ bɨh bé a taare to lɛɛ lɔɔ mo Krɨst waa bɨn ye ɛ? Bɨh ó b'a ze bɨn e wa!

¹⁵ No ó, bɨh bé antaa mɨnjɨ Zyɛm a tulo e. Bɨh bé adoʼo e syɛɛ yoonkan. Sa ndɨ tɨʼ ɨ, mɨleme mih, myé ó lwɨŋla e mbɛla ó, buʼo yin, yé ókʉ gwɨe ó gwɨa. Mbɛla waa nteme, wé ó: bɨh bé ó e nkul efwahle syɛɛ ndɨ é buo nyɔm é lɔb win ɨ.

¹⁶ Yé ódib bɨh zi eto dolo lé etuno-tuno Mbɨambɨa Lɔɔ é mɨlal ndɨ é ncɛra e bɨh ɨ. Bɨh bé abe lé ekœb-kœb bɨsyɛɛ byoonkan, ntɔʼ dwir bye zi é l'efu ó, bɨh doʼa e syɛɛ yih boo nɔɔ.

¹⁷ Ebe, yé ó tila ó: «Mʉr lé ekpɛl lɔb edoʼo e, nyi bi mpaŋ zi edoʼo ó, e sa Da a sa ɛ!»

¹⁸ Ebe, ntʉʼ waa lé eseʼle nye mʉr tɨʼ ɨ, Da lé emɛʼle. Da mɛʼle ó, waa nye mʉr tɨʼ lé eseʼle e.