2 Korɛnt 1 - Kálara Zyɛ̌m Edwán é mpʉ̌n

Moswɨhlɨ

¹ Mɛm Pol, lʉmlʉ mo Yesʉs-Krɨst é gwɨma mo Zyɛm ó lé etile bɨn kalara nwa, bɨh e mɨɔ ga wina Timote. Bɨh bé etile ó, mbɛr Zyɛm ndɨ ɨ Korɛnt ɨ, ndwe e mɨsaŋ mɨ bʉr mimyɛh ndɨ Akayi ɨ.

² Mocyɛʼ mo mpom le motala mo Zyɛm Sɔŋ ga wina bé e Da Yesʉs-Krɨst, mé swɨŋɨ é bɨn.

Ndwɛa ekiba mo Pol

³ Bɨna gumla ga Zyɛm, waa ndɨ Sɔŋ mo Tî ga wina Yesʉs-Krɨst ɨ. Nye ó Sɔŋ ga wina lé elɛʼle bɨna ga njwɨʼa-nkoo we, waa lé egba bʉr nkul é monyʉl ɨ.

⁴ Nye egba bɨh nkul é monyʉl ó, é jɔʼ yiyɛh bɨh lé ebɔma e mɨtuu ɨ. Nye ó mʉr lé ecyɛb bɨh é mɨleme ó, bɨh gbaʼ bʉʉ bʉr nkul é myɔɔ mɨleme é mbi ngwar waa ɛ. É jɔʼ bé lé ebɔma e myɔɔ mɨtuu ɨ, bɨh ó ndɨ ekɛm be é zi ngula bɨh bé a taare bi boo Zyɛm ɨ.

⁵ Ebe, mpʉ bɨh lé ekabla mɨtuu mo Krɨst ɨ, jwɨʼ gwar e gwar yaa nteme ó bɨh lé ebi monkɔb é nkul we nye lé egba bɨh é mɨleme e.

⁶ ǃBɨh bé óbe si sia e mɨtuu nɛʼɛ, syɛɛla yaa, yé e nyɔm é nko paʼ win, ebe, yé ógba bɨn nkul é monyʉl, le etiʼ bɨn. ǃBɨh bé óbe si gbaŋɔ nkul é monyʉl nɛʼɛ, yé óbe ó, njɨ ebe bɨn dira nyɔm e bɨh é yʉʉ jɔʼ. Mɨleme min, myé ódira nyɔm e ngula wih ó, é jɔʼ bɨn bɛɛ, bé ósia e mbi mɨtuu mɨmpwar myaa ɛ. Myé ó bɨn bé a bɛa bee bɨh lé esia e mye e.

⁷ Mɨleme mih, myé ó lwɨŋla e mbɛla é lɔb win. Bɨh bé apɨŋla, ebe, bɨh bé egʉa ó, jwɨʼ gwar e gwar mpʉ bɨn lé ebi mɨtuu ɨ, no nteme ó Zyɛm ógba bɨn nkul é monyʉl ɨ.

⁸ No ó, obɨɔ ga bam, bɨh bé ekpɛl ó, bɨn gʉŋa mɨtuu e mɨndɛl bɨh bé a sia e mye é lal Azia ɛ. Bɨh bé a si kʉ bul sia e mye. Myé a si laa bɨh é nkul, to pyal é jɔʼ mɨleme mih, myé a baaka be e mbɛla ɛ. Bɨh bé a be ó lé esoŋlo nkʉ bɨh bé óbâʼle tiʼe mʉʉ molu.

⁹ Bɨh bé a bee ó, bé a be ó si dwe bɨh mobe mo jala e l'efie e. Yé a syɛɛlɨ no ó, bɨh beʼ l'aka jyɛʼ taa buʼo yih boo bɨh bʉr o tɨ. Sa ndɨ ekʉ jala ɛ, yé ó bɨh jyɛʼɛ ye boo Zyɛm, waa lé epɛ̀h bʉr é mofoo e.

¹⁰ Nye ó mʉr a syɛb bɨh é bim bwaʼbwaʼ efie laa tʉŋlʉ ɨ. Nye nteme óbâʼle syɛb bɨh é l'ebebe no. Yé ó no! Mɨleme mih, mi loŋlo e mbɛla ó, nye óto dolo lé esyɛb bɨh é l'ebebe é molu mé ndɨ eze e,

¹¹ ebe, bɨn bé óze bɨh é nkɔm é zi mɨnjwɨʼla min. Ebe no ó Zyɛm óbul dweŋɔ ekiba é jɔʼ buobuo bʉr, bé óbe si sa nye mɨnjwɨʼla é l'efu lɨh ɨ.

Cyen mo Pol, yi bwiʼ

¹² Sa bɨh lé edoʼo e ye e, yé ó yi: mɨpɛhla mɨleme mih, myé eboʼlo ó, bɨh bé ekœʼ ebò e cyen egwar é mih mo bʉr bɨbɛh, ndwe é maa mɨn, ebò e cyen ndɨ ti é mih mo Zyɛm, laa ndɨ eduho bɨh é mɨmo si ɨ. Bɨh bé a baakœʼ le lé edu ocyoo o bʉr o si nwa. Bɨh bé a kœʼ ebò e cyen laa ó, lé edu bim ncwɨncwɨa Zyɛm a lɛʼle bɨh ɨ.

^13-14 Sa bɨh bé ndɨ etile e, yé abe yaa bɨn bé ókar lé eláa nkʉ joʼo e. Bɨn bɨ taare lé egʉa bɨh. No ó, me e mbɛla é leme ó, bɨn bé ógʉa bɨh é kpɛhla é l'efu ó, bɨn gʉŋa ó, bɨn bé óbɛm doʼo e bɨh é dobo Tî ga wina Yesʉs óbula ze e. Bɨh bɛɛ, bé ódoʼo e bɨn nteme é dobo egwar laa.

¹⁵ No ó, ebe mbɛla waa, me a tiʼe é leme wam ó, me ótaare kœb bɨn. Me a kpɛl ó, bɨn nkʉʼ bee me zɔʼ ba, ntɔʼ gbaŋɔ nkul é monyʉl é bɨjɔʼ bɨba.

¹⁶ Me a bà jwɨʼ ó, me ótaare pyal bɨn ye, ze cyɛb, ntɔʼ ze laa, to Masedwan. Mpula me a ngbaa bula, duho é Masedwan ɨ, nye ó me a dɨ jwɨʼ ó, me bâʼla cyɛb bɨn ye e. É jɔʼ yaa, bɨn bé a ngbaa sa ó, me toʼ e cyen zi dolo, ó me kuma Yʉda ɛ.

¹⁷ É jɔʼ me a tiʼe é leme wam ó, me óze gʉʼ bɨn ye no e, zê bɨjwɨʼ byaa, lé esa ocabcab ɛ? Zê me a bà bɨjwɨʼ ó, mpʉ bʉr o si nwaʼ lé esa ɛ? Zê me a lɛɛ ó «Eee!» ndwe e «Hɨʼɨ!» é jɔʼ gwar ɛ?

¹⁸ Neme Zyɛm ndɨ mʉr ebuʼla, me a baalɛɛ bɨn «Eee!» ndwe e «Hɨʼɨ!»,

¹⁹ ebe, Mwan mo Zyɛm—no yé ó Yesʉs-Krɨst—a baabe lé elɛɛ ó «Eee!» ndwe e «Hɨʼɨ!» Lwib ye, yé a bɛa be ó njɨ «Eee!» Nye ó mʉr mpaŋla we bɨh e Silas ndwe e Timote bé a cen bɨn ɨ.

²⁰ Ebe, monkɛʼ mɨmɛh Zyɛm a liʼe bʉr be e ma ɛ, nye edira me ó, njɨ é zyɛŋa ga wina boo Yesʉs. Ebe no nteme ó bɨna lé elɛɛ ga ó: «Amɛn» ɨ. Bɨna bé edwiibɨ ga Zyɛm ó tɨ, é zi mɨnjwɨʼla myaa.

²¹ No ó, Zyɛm nye mʉr tɨʼ ó lé ecyɛb bɨna ga e boo nɔɔ é mɨleme, ó bɨna cyɛba ga é nkʉʼʉ é zyɛŋa wina boo Krɨst. Nye ó b'a ntɨh bɨna ga Sisim we, mpʉ mulo nye lé elœm bʉr be e ma ɛ.

²² Nye nteme ó b'a ntɨh bɨna ga Mbɨambɨa Sisim. Naa yé ó, nyi gba mɨsisim ga mina luʼ, ntɔʼ ŋmɛh luʼ waa e sitam. Mojwɨʼ nye a gba é bɨna no e, mé ó dweʼle ndwe e bɛn, sa lé elɛʼle ó, nyi dwe bɨna ga tiʼ molu mo mpoʼ mɨmɛh ɛ.

²³ Neme Zyɛm ndɨ mboʼla wam, me elɛɛ ó nɛɛ: yé be ó, me elɛɛ ó mpʉl nɛʼɛ, nye dimla tiʼ yam! Sa yé a kʉ sa ó, me l'ayi ka ze Korɛnt ɨ, yé a be ó gwɨma ebɛʼ bɨn tuu.

²⁴ Bɨh bé alɛʼle bɨn mpel é nko paʼ buʼo. Bɨna ga bé ó é l'empomo e syɛɛ egwar é l'efu ó, bɨn soha é buobuo. Taa buʼo bɨn bé a jyɛʼ boo Zyɛm ɨ, yé ó ndɨ esa ó, bɨn cyɛba é nkʉʼʉ.