1 Yʉanes 5 - Kálara Zyɛ̌m Edwán é mpʉ̌n

Yesʉs, nye ó Mwan mo Zyɛm

¹ Mʉr nyiwɛh lé ebuʼla ó, Yesʉs, nye ó Lœma mulo mo Zyɛm ɨ, nye ó ndɨ mbyɛla é zi nkul mo Zyɛm. Waa nyiwɛh lé ekpɛl mʉr a bya mwan ɨ, nye ekpɛl nteme, mwan mʉr waa a bya ɛ.

² Gumo bɨna lé egʉa ga ó, bɨna bɨ kpɛl ga bwan mo Zyɛm ɨ, yé ó: é jɔʼ bɨna lé ekpɛl ga Zyɛm, le edu motie me e.

³ Mpʉ mʉr lé ejala le elɛʼle Zyɛm kpɛl ó yi: é zi edu motie me. Motie me, mé abul kɔbla lé edu,

⁴ ebe, mʉr nyiwɛh ndɨ mbyɛla é zi nkul mo Zyɛm ɨ, nye entaa ebebe e si nwaʼ é nkul. Nkul nye ndɨ e nye, waa lé esa ó, nye bula e l'esaa é koo e, nye ó buʼo ga yina.

⁵ Zé nyɛɛ ndɨ e nkul entaa ebebe e si nwaʼ é nkul, bula e l'esaa é koo e? Yé ó njɨ waa lé ebuʼla ó, Yesʉs, nye ó Mwan mo Zyɛm.

Mboʼla lé etiibe e Yesʉs-Krɨst ɨ

⁶ Yesʉs-Krɨst, nye ó mʉr a nʉa ndubo é modibe, pie tɨ ntɔʼ pyɛl motié me é klos ɨ. Nye a baaze nʉa ndubo njɨ é modibe. Zea we, wé a be ó lé enʉa ndubo é modibe ndwe le epyɛl motié me. Mbɨambɨa Sisim, nye ó lé eboʼlo no é lɔb ndubo we. Nye eboʼlo no ó, ebe, nye e l'ocyecye.

⁷ To kœb ó, bɨsa lé eboʼlo ocyecye, tiibe e Mwan mo Zyɛm ɨ, byé ó bɨlɛl:

⁸ Mbɨambɨa Sisim, ndubo modibe, ndwe e ndubo motié. Oboʼla olɛl onɨ, bé ó twii.

⁹ Bɨna pa taare mɛʼle ga é jɔʼ bʉr lé eboʼlo lɔb mboʼla ngwar ɨ, a dwɛʼra e Zyɛm. Mboʼla mo Zyɛm, wé ejala le ebe ó e modile, laa waa bʉr lé esa-sa ɛ, ebe, wé ó waa Zyɛm nye mʉr tɨʼ lé eboʼlo, tiibe e Mwan we e.

¹⁰ Mʉr lé ejyɛʼ taa buʼo ye boo Mwan mo Zyɛm ɨ, nye ó ndɨ ejoʼo mboʼla waa é leme we tʉŋlʉ. Mʉr ndɨ abuʼla Zyɛm ɨ, nyi sa mpʉ sa lɛɛ ó, Zyɛm Sɔŋ, nye ó mpʉmpʉl, ebe, nye abuʼla mboʼla Zyɛm a boʼlo, tiibe e Mwan we e.

¹¹ Mboʼla mo Zyɛm waa, wé ó wi: Zyɛm a be ó si dwe bɨna ga tiʼ molu mo mpoʼ mɨmɛh. Tiʼ yaa, yé ó é Mwan we tʉŋlʉ.

¹² É bʉr bɨbɛh, waa bé e Mwan mo Zyɛm ndɨ nkɔm mpwar ɨ, nyi bi tiʼ molu mo mpoʼ mɨmɛh. Mʉr ndɨ abe é zyɛŋa wɔɔ boo Mwan mo Zyɛm ɨ, nyi fib tiʼ molu mo mpoʼ mɨmɛh.

Vula lwib

¹³ Mɨlɔb me lé etile bɨn mɨnɨ, me etile mye ó, bɨn bʉr o ndɨ ejyɛʼ taa buʼo yɔɔ boo Mwan mo Zyɛm ɨ. Me etile bɨn ó, bɨn gʉŋa ó, bɨn mu ó si bi tiʼ molu mo mpoʼ mɨmɛh.

¹⁴ Pyala bɨna bé ópyal ga é mih mo Zyɛm ɨ, wé óbe ó, mɨleme ga mina, myé osi loŋlo e mbɛla. Bɨna bé egʉa ga ó, yé be ó, bɨna bé esa ga nye mɨnjwɨʼla lé edu bɨgwɨma bɨ leme we nɛʼɛ, nye ókʉ joʼo mɨnjwɨʼla ga mina myaa mbɨmbɨa.

¹⁵ Yé be nteme ó, bɨna bé egʉa ga ó, nye ejoʼo bɨna ga mbɨmbɨa nɛʼɛ, lɛɛ ó, bɨna bé egʉa ga nteme ó, nye ódwe bɨna ga sa bɨna lé ejaʼ ga nye e.

¹⁶ Yé be ó, mʉr, nyi bee mɨɔ we lé esa syem, gʉa nteme ó, mbi syem waa, wé abe lé esa ó, mʉr dwèʼ amboʼlonkono nɛʼɛ, nye jwɨʼla e Zyɛm é l'efu le. Zyɛm ókʉ tiʼ mɨɔ we waa. Yé e nyɔm ó, é nko paʼ mo mɨɔ ndɨ si sa mbi syem ndɨ abe lé esa ó, bʉr dwèʼ amboʼlonkono e. Sa gwar, guu mbi syem, wé yɛɛ ó tɨ, waa lé eto e mʉr é l'efie cyecye e. Me alɛɛ ó, bɨn jwɨʼla e Zyɛm é l'efu e mbi mʉr lé esa syem é mbi waa ɛ.

¹⁷ Bɨsyɛɛla bɨ ozyɛhozyɛh bibyɛh, byé ó mɨsyem. Yé nteme, yé e syem ndɨ abe lé egomlo bʉr é zi efie e.

¹⁸ Bɨna bé egʉa ga ó, mʉr nyiwɛh mu mbyɛla é zi nkul mo Zyɛm ɨ, nye ákwoʼ ka to dolo lé esa syem. Mwan Zyɛm Sɔŋ a bya ɛ, nye ekamle e mbi mʉr waa. Ebe no, abe e sa gwar Bɨbla-mʉr ndɨ e nkul esa nye.

¹⁹ Bɨna bé egʉa ga ó, bɨna ga bé ó, bwan mo Zyɛm. Bʉr o si nwaʼ nyiwɛh bɛɛ, bé ejaʼra ó e mpel mo Bɨbla-mʉr.

²⁰ Bɨna bé egʉa ga nteme ó, Mwan mo Zyɛm a si ze, ze gba bɨna ga pɨʼ é mɨleme, ó bɨna gʉŋa ga Zyɛm ndɨ cyecye e. Bɨna bé edi ga é zyɛŋa ga wina boo mʉr ndɨ cyecye e, ebe, bɨna bé edi ga é zyɛŋa ga wina boo Mwan we, Yesʉs-Krɨst. Nye ó ndɨ Zyɛm cyecye ndwe e l'Etin e Tiʼ.

²¹ Bwa o bwan bam, saʼ ga ó, bɨn cɛra e bɨbaŋabaŋa bɨdweʼle.