1 Yʉanes 4 - Kálara Zyɛ̌m Edwán é mpʉ̌n

Krɨst bé e mʉr dɔm we

¹ Obɨɔ o kpɛl bam aa! Akpahbe buʼla ga mʉr nyiwɛh bɨn lé efuuba e nye, waa lé edwe-dwe bʉr bɨsikʉlʉ ɨ. Taara boblo ga mbi mʉr waa, bɨn nkʉʼ gʉa pie tɨʼ nkʉ sisim nye ndɨ e we e, wé eduho ó boo Zyɛm, ebe, mɨmpʉmpʉl mɨ ogwiha o mɨlɔb, myé mu ó si buo é si nwaʼ nyiwɛh.

² Bɨn bé ódweʼe Mbɨambɨa Sisim ó, é mbi wi: Waa nyiwɛh lé elɛɛ ó: «Yesʉs-Krɨst a ze é si nwaʼ ó e nyʉl mʉr» ɨ, mʉr waa, nye ó waa mo Zyɛm.

³ To kœb ó, waa ndɨ akpɛl mɛʼle ó, Yesʉs a ze é si nwaʼ ó e nyʉl mʉr ɨ, nyiha, nye abe e Sisim lé eduho boo Zyɛm ɨ. Sisim nye ndɨ e we e, wé ó kʉ be waa mo mʉr dɔm mo Krɨst. Bɨn bé a be ó si cenɔ mpaŋla ó, nye ejala le etaare ze. No ó, banana, nye mu ó si pyal é si nwa.

⁴ Bɨn bɛɛ bwan bam, bɨn bé ó baa mo Zyɛm. Bɨn bɨ ntaa bʉr o dɔm mo Krɨst onɨ, ebe, Sisim bɨn ndɨ e we e, wé ó, é lele nkul, laa waa ndɨ é bʉr o si nwaʼ ɛ.

⁵ Bé ó bʉr o si nwa. Ebe no ó bé ndɨ elwib mɨlɔb mɨ si nwa, bʉr o si nwaʼ nteme lé egʉa joʼlo be e.

⁶ No ó, bɨna ga bɛɛ, bé ó baa mo Zyɛm. Mʉr lé egʉa Zyɛm ɨ, nye ó ndɨ esa bɨna ga mojoʼo. Mʉr ndɨ abe waa mo Zyɛm ɨ, nyɛɛ, nye ákwoʼ joʼo bɨna ga. É mbi waa ó bɨna ndɨ e nkul egʉa ga mbɛʼ paʼra Sisim Ocyecye bé e sisim mpʉl ɨ.

Zyɛm, nye ó kpɛl

⁷ Obɨɔ o kpɛl bam aa! Bɨna kpɛla ga paʼra ga wina, ebe, kpɛl, yé eduho ó boo Zyɛm. Mʉr nyiwɛh ndɨ e kpɛl ɨ, nye ó ndɨ mbyɛla é zi nkul mo Zyɛm. Nye nteme, nyi gʉa Zyɛm.

⁸ To kœb ó, mʉr ndɨ abe e kpɛl ɨ, nyɛɛ, nye apa gʉa Zyɛm, ebe, Zyɛm, nye ó kpɛl.

⁹ Mpʉ Zyɛm a lɛʼle kpɛl ye é sama ga yina ó yi: nye a si ntɨh bɨna ga Etiʼe e Mwan le é si nwa, ó bɨna nkʉʼ bi tiʼ molu mo mpoʼ mɨmɛh dumo e nye.

¹⁰ Mpaŋ kpɛl, yé abe yaa bɨna lé elɛʼle ga Zyɛm ɨ. Mpaŋ kpɛl, yé ó yaa Zyɛm nyɛɛ a lɛʼle bɨna ga ɛ, ebe, nye a si ntɨh bɨna ga Mwan we. Nye ó mʉr a dwè, jala e mɨsyem ga mina, lé eleʼe empime mo Zyɛm ɨ.

¹¹ Obɨɔ o kpɛl bam aa! Yé be ó Zyɛm, nyi kpɛl bɨna ga bim yaa nɛʼɛ, lɛɛ ó, bɨna bé ejala le ekpɛla ga paʼra ga wina.

¹² Abe e mʉr ndɨ si pa bee Zyɛm. Yé be ó, bɨna bé ekpɛla ga paʼra ga wina nɛʼɛ, lɛɛ ó, Zyɛm, nye etiʼe é zyɛŋa ga wina boo nɔɔ. Nyi sa ó, kpɛl ye, yé kuma é l'ombɨmbɨa é mɨpaʼ mimyɛh.

¹³ Bɨna bé egʉa ga ó, bɨna bé etiʼe ga é zyɛŋa wina boo Zyɛm, nyɛɛ é zyɛŋa ga wina. Bɨna bé egʉa no ó, ebe, nye a si ntɨh bɨna ga Sisim we.

¹⁴ Bɨna bɨ bee ga sa bɨna lé eto le eboʼlo ga ɛ. Mboʼla ga wina, wé ó wi: Zyɛm Sɔŋ a ntɨh Mwan we ó, nye beʼ Tiʼbʉr é l'efu e si nwaʼ nyiwɛh.

¹⁵ Yé be ó, mʉr, nyi lɛɛ ó: «Yesʉs, nye ó Mwan mo Zyɛm» nɛʼɛ, lɛɛ ó, Zyɛm, nye etiʼe é mʉr waa; mʉr waa, nye nteme ódi é zyɛŋa wɔɔ boo Zyɛm.

¹⁶ É mbi waa ó bɨna mu lé egʉa ga leme ncwɨncwɨa Zyɛm lé elɛʼle bɨna ga ɛ. Bɨna bé ekʉ buʼla ga ó, nye ecwɨa e bɨna ga. Zyɛm, nye ó kpɛl. Mʉr lé ekpɛl bʉʉ bʉr ɨ, nye edi ó, é zyɛŋa wɔɔ boo Zyɛm; Zyɛm nteme, nye etiʼe é mʉr waa.

¹⁷ ǃBɨna si be ga é zyɛŋa ga wina boo Zyɛm nɛʼɛ, kpɛl ga yina, yé ókumo é l'ombɨmbɨa é mɨpaʼ mimyɛh. Bɨna bé ótʉm ga monyʉl é dobo le etiʼ e mɨlɔb, ebe, ebò e cyen bɨna lé ekœʼ ga é mbi jɔʼ yiʼ ɨ, lé enwɨɨla ó e laa nye a kœʼ œ.

¹⁸ Bʉa bé e kpɛl, byé abe e nkul esyɛŋa. Yé be ó, kpɛl mo Zyɛm, yi ni mʉr é leme nɛʼɛ, yé ekɛ̂m bʉa é leme we. Mʉr dina e bʉa ɛ, nye ebono bɨntɨʼa nye ókabɔ ɛ. Waa ndɨ e bʉa é leme e, nye dina ó apa jʉʼra kpɛl mo Zyɛm. Kpɛl ye, yé apa fwahle syɛɛ ye é mɨpaʼ mimyɛh.

¹⁹ No ó, é nko paʼ ga wina, bɨna ga bɛɛ mu ó lé ekpɛla ga ó, ebe, nye a si taare kpɛl bɨna ga.

²⁰ Yé be ó, mʉr, nye elɛɛ ó: «Me ekpɛl Zyɛm,» nyɛɛ yɛɛ lé enwim mɨɔ we nɛʼɛ, lɛɛ ó, nye ó kʉ be mpʉmpʉl, ebe, mʉr ndɨ akpɛl mɨɔ we, mʉr nye lé ebee e, nye abe e nkul ekpɛl Zyɛm, waa nye ndɨ abee e.

²¹ Ndwe nteme, Zyɛm a tiile bɨna ga etie ó, mʉr nyiwɛh lé ekpɛl Zyɛm ɨ, nye kpɛlɨ nteme mɨɔ we.