1 Yʉanes 3 - Kálara Zyɛ̌m Edwán é mpʉ̌n

¹ Mbe ga: é mpʉʼ ó Zyɛm Sɔŋ ndɨ ebul kpɛl bɨna ga ɛ! Nyi gban bɨna ga, le elɛɛ ó, bɨna ga bé ó bwan be. Bɨna ga bé ó baa be é l'ocyecye. Bʉr o si nwa, bé apa gʉa Sɔŋ ga wina. Ebe no ó bé ndɨ agʉa bɨna ga ɛ.

² Obɨɔ o kpɛl bam aa! Banana, bɨna mu ó bwan mo Zyɛm. Yé dam be no, mbi bʉr bɨna bé ódi ga ɛ, wé apa gʉa gʉŋɔ. Sa bɨna lé egʉa ga ɛ, yé ó, é dobo Yesʉs-Krɨst óbula ze e, bɨna bé ónwɨɨla ga e nye, ebe, bɨna bé óbee ga nye mbi nye ndɨ ɨ.

³ Yé be ó, mʉr fih mʉr kɛ̀l, leme we, wé ó lwɨŋla e mbɛla waa nɛʼɛ, lɛɛ ó, mʉr waa, nye ekʉ puba, ó nye beʼ saŋ mʉr. Ebe no ó nye ónʉa dweʼle tiʼ mo Yesʉs, Mʉr ndɨ ti ɨ.

⁴ Mʉr nyiwɛh lé esa syem ɨ, nye entaa etie mo Zyɛm. Esa syem, lé ó entaa motie.

⁵ Bɨn bé egʉa: Yesʉs-Krɨst a ze é si nwaʼ ó, nye nkʉʼ ze pɛʼ mɨsyem tɨ. Bɨn bé egʉa nteme ó, abe e guu syem ndɨ é nye.

⁶ Mʉr nyiwɛh ndɨ é zyɛŋa wɔɔ boo Zyɛm ɨ, nye abe e nkul eto dolo lé esa mɨsyem. Waa nyiwɛh lé eto dolo lé esa mɨsyem ɨ, nye apa bee nye, nkʉ gʉa nye.

⁷ Bwan bam aa! Abir ga ó, mʉr gomla bɨn é bebebebe zi. Mʉr lé esa mɨmpaŋ bɨsyɛɛla ɛ, nyiha ó ndɨ cɨcyel mpʉ mo Yesʉs-Krɨst.

⁸ Mʉr lé eto dolo lé esa mɨsyem ɨ, nyiha, nye ó waa mo Njwɨɨ moleme, ebe, Njwɨɨ moleme ó ndɨ etin e mɨsyem, duho é l'etɔɔrʉ. To kœb ó, Mwan mo Zyɛm a ze é si nwaʼ ó, nye nkʉʼ gbɛɛ bɨsyɛɛla mo Njwɨɨ moleme.

⁹ Mʉr nyiwɛh ndɨ mbyɛla é zi nkul mo Zyɛm ɨ, nye abe e nkul eto dolo lé esa mɨsyem, ebe, tiʼ lé eduho boo Zyɛm ɨ, yé ó é nye tʉŋlʉ. Nye abe e nkul eto dolo lé esa mɨsyem, ebe, nye a byɛl ó, é zi nkul mo Zyɛm.

¹⁰ Ebe, mbɛʼ, wé enyin paʼra bwan mo Zyɛm e baa mo Njwɨɨ moleme ó, é mbi wi: mʉr nyiwɛh ndɨ asa mɨmpaŋ bɨsyɛɛla ɛ, nkʉ waa ndɨ akpɛl mɨɔ we e, nye a baabyɛl é zi nkul mo Zyɛm.

Kpɛl é mɨmbɛr mɨ Zyɛm tʉŋlʉ

¹¹ No ó, mpaŋla bɨn bé a cenɔ, duho é l'etɔɔrʉ ɨ, nye ó nwa: bɨna kpɛla ga paʼra ga wina.

¹² Bɨna l'ayi be ga mpʉ mo Kan. Nye a bɛa be ó é nkɔm mo Bɨbla-mʉr, nye ze jʉ ncyom we Abɛl. Nye a pa kʉ jʉ nye é wáa lɔb? Yé a be ó, ebe, bɨsyɛɛla mo Kan, byé a be ó ozyɛhozyɛh; byaa mo mɨɔ we, ocɨcyel.

¹³ Obɨɔ ga bam aa! Yé be ó, bʉr o si nwa, bé enwim bɨn nɛʼɛ, atwɨra ga.

¹⁴ Bɨna bé egʉa ga ó, bɨna bé a pàh, ntɔʼ bi tiʼ molu mo mpoʼ mɨmɛh ó, ebe kpɛl bɨna lé ekpɛl ga obuʼla ɛ. Mʉr ndɨ akpɛl bʉr ɨ, nye dina ó ndwè.

¹⁵ Mʉr nyiwɛh lé enwim mɨɔ we e, nye ó njʉl bʉr. Bɨn bé egʉa nteme ó, abe e njʉl bʉr ngwar ndɨ ebi tiʼ molu mo mpoʼ mɨmɛh.

¹⁶ É mbi wiʼ ó bɨna lé edweʼe ga sa ndɨ mpaŋ kpɛl ɨ: Yesʉs-Krɨst a si dwè, jala e bɨna ga. No nteme ó bɨna mu ó e mpɔla boo bʉʉ obuʼla ɛ. Bɨna bé ejɛna ga mpɔla waa ó, lé edwè, jala e l'obuʼla.

¹⁷ Mʉr ndɨ e mobi mo si nwa, waa ndɨ esa mɨɔ we cere, nyɛɛ lé ekʉ bee nye é mɨtuu ɨ, wáa mbi nye ndɨ e nkul elɛɛ ó, nye ekpɛl Zyɛm é leme we e?

¹⁸ Bwan bam aa! Yé ajala ó, kpɛl ga yina, yé nyinɨ njɨ é mokan mo nʉm bɨna lé elɛɛ ga ɛ. Yé ekʉ jala le ebul nyin ó, é bɨsyɛɛla bɨna lé esa ga é l'ocyecye e.

Lé ejyɛʼ taa buʼo boo Zyɛm

¹⁹ Bɨna bé egʉa ga ó, bɨna bé ó baa mo Mʉr ndɨ e l'ocyecye ó, é mbi wi: bɨna bé efil ga mɨleme ga mina si é mih mo Zyɛm

²⁰ é bɨjɔʼ myé lé edwe bɨna ga mobe e. Mɨleme ga mina, myé ebana fila, ebe, Zyɛm, nye ó é bul bwaʼ, laa mɨleme ga mina. Nye egʉa nteme sa yiyɛh.

²¹ Obɨɔ o kpɛl bam aa! Yé be ó, mɨleme ga mina, myé ó, é puuu, abe lé edwe bɨna ga bʉr o tɨʼ mobe nɛʼɛ, lɛɛ ó, bɨna bé ódɨ tʉm monyʉl, ntɔʼ pyal é mih mo Zyɛm.

²² Bɨna bé óbi ga nteme sa yiyɛh bɨna bé ójaʼ ga nye e, ebe, bɨna bé edu ga motie me, le esa bɨsyɛɛla nye lé ebee mbɨmbɨa ɛ.

²³ Etie nye a tiile é l'efu ga lɨna ó lɨ: Bɨna jyɛʼɛ ga taa buʼo ga yina boo Mwan we Yesʉs-Krɨst le ekpɛla paʼra ga wina mpʉ nye a tɨe bɨna ga ɛ.

²⁴ Mʉr lé edu motie mo Zyɛm ɨ, nye edi ó, é zyɛŋa wɔɔ boo Zyɛm; Zyɛm nteme é zyɛŋa wɔɔ boo mʉr waa. Bɨna bé egʉa ga ó, Zyɛm, nye é zyɛŋa ga wina boo nɔɔ ó, ebe, nye a si ntɨh bɨna ga Sisim we.