1 Yʉanes 2 - Kálara Zyɛ̌m Edwán é mpʉ̌n

¹ Bwa o bwan bam, me etile bɨn bɨsa bɨnɨ ó, bɨn gwaʼa lé eka sa syem. Sa gwar, yé si ka pyal yɛɛ ó, nuu mʉr, nyi sa syem nɛʼɛ, nye gʉŋa ó, nye e mʉr ndɨ ekamle e nye e: Yesʉs-Krɨst, ndɨ cɨcyel mʉr ɨ! Nye ekɛm nye ó, é mih mo Zyɛm Sɔŋ.

² Ebe, Yesʉs-Krɨst, nye ó mʉr a dwè, jala e mɨsyem ga mina, efie le laa, lé ó ngo leʼe empime mo Zyɛm. Abe njɨ mɨsyem ga mina, myé ome. Nye a dwè ó, jala e bʉr o si nwaʼ nyiwɛh!

³ Yé be ó, bɨna bé edu ga motie mo Zyɛm nɛʼɛ, lɛɛ ó, syɛɛla yaa, yé óbe ó dweʼle, sa lé elɛʼle ó, bɨna bɨ gʉa ga nye.

⁴ Mʉr lé elɛɛ ó: «Me egʉa Zyɛm,» nyɛɛ yɛɛ adu motie me e, nye ó ndɨ mpʉmpʉl. Ocyecye, wé abe é nye.

⁵ Mʉr waa lé edu motie mo Zyɛm ɨ, Zyɛm, nyi sa ó, kpɛl ye, yé kuma é l'ombɨmbɨa é mɨpaʼ mimyɛh. Ebe no ó bɨna bé ókʉ gʉa ga ó, bɨna ga bé ó é zyɛŋa wina boo nɔɔ ɛ.

⁶ Mʉr lé elɛɛ ó, nye ó é zyɛŋa wɔɔ boo Zyɛm ɨ, nye ejala le ekœʼ ebò e cyen mo Yesʉs.

Edwan le etie

⁷ Obɨɔ o kpɛl bam aa! Ntʉʼ edwan le etie me lé etiile bɨn lɨ. Yé ó njʉ̌m etie bɨn bé a bɛa bi, taare é jɔʼ bɨn bé a buʼla Mbɨambɨa Lɔɔ ɛ. Njʉ̌m etie waa, wé ó lwib bɨn bé a bɛa joʼo e.

⁸ Sa gwar, lé yɛɛ ó edwan le etie—yé ekʉ nyin ó, lé ó cyecye ó, é Yesʉs-Krɨst tʉŋlʉ, ndwe e bɨn bɛɛ nteme—ebe, edurʉ, lé mu ó lé esɔa; mpaŋ myɛn, wé mu ó lé epan.

⁹ Mʉr lé elɛɛ ó, nye ó é myɛn tʉŋlʉ, nyɛɛ yɛɛ lé enwim mɨɔ we e, nye dina ó njɨ teme edurʉ.

¹⁰ To kœb ó, mʉr waa ndɨ ekpɛl mɨɔ we e, nye ó ndɨ é myɛn. Nye aŋa kol mɨɔ we ebɔʼ nye óbɨm é leme, laa lé ódumo nye e.

¹¹ Sa gwar, mʉr waa lé enwim mɨɔ we e, nye dina ó lé entime é l'edurʉ. Nye agʉa nko nye lé eto le entime e, ebe, edurʉ, lɨ liŋ nye ntim.

¹² Bwan bam aa! Me etile bɨn ó, ebe Zyɛm, nyi pɛʼ bɨbaa nye a niʼe bɨn é lɔb mɨsyem min ɨ. Nye a sa no ó, é die mo Yesʉs.

¹³ Osɔŋ ee! Me etile bɨn ó, ebe, bɨn bé egʉa mʉr a bɛa be, duho é l'etɔɔrʉ ɨ. Mɨsoho ee! Me etile bɨn ó, ebe, bɨn bɨ ntaa Bɨbla-mʉr é nkul dɔm. Bwan bam aa! Me etile bɨn ó, ebe, bɨn bɨ gʉa Zyɛm Sɔŋ.

¹⁴ Osɔŋ ee! Me etile bɨn ó, ebe, bɨn bɨ gʉa mʉr a bɛa be, kʉ e si apa cyeŋɔ ɛ. Mɨsoho ee! Me etile bɨn ó, ebe, bɨn bé ó e nkul. Lwib mo Zyɛm, yé ekubla é bɨn. Bɨn nteme bɨ ntaa Bɨbla-mʉr é nkul dɔm.

Bɨsa bɨ jobo yi, adwia e bye

¹⁵ Anyamle dwia ga e bɨsa bɨ jobo yi. ǃƗ mʉr si dwia e bɨsa bɨ jobo yiʼ nɛʼɛ, lɛɛ ó, kpɛl mo Zyɛm Sɔŋ, yé apa kœb ja é leme we.

¹⁶ Bɨsa bibyɛh lé etiibe e jobo yiʼ ɨ—bɨsa bɨbɨbla bɨ bʉr lé egwɨm ɨ, byaa mih mɔɔ lé egwɨm bee e, mobi mɨmɛh bé lé edoʼo e me e, bibyɛh—byé eduho ó, é si nwa, abe boo Zyɛm Sɔŋ.

¹⁷ To kœb ó, bɨsa bɨ jobo yiʼ ndwe e byaa bʉr lé egwɨm tɨʼ ɨ, byé elaa ó laŋa. No ó, mʉr lé esa gwɨma mo Zyɛm ɨ, nyiha ó ndɨ ebi tiʼ molu mo mpoʼ mɨmɛh.

Mʉr dɔm mo Krɨst

¹⁸ Bwan bam aa! Esie e mbi jɔʼ yi, lé mu ó kunokuno le epyal. Bɨn bé a si bɛa joʼo ó: «Mʉr dɔm mo Krɨst, nye ekʉ jala le etaare ze.» No ó, banana, bʉr o dɔm mo Krɨst, bé mu ó si buo! Ebe no ó bɨna mu lé egʉa ga ó, yi pyal é l'esie e mbi jɔʼ yiʼ ɨ.

¹⁹ Bʉr baa, bé a si kaŋa e Krɨst, mʉa é l'esama ga lɨna, toŋɔ kʉl. Bé a baabe yɛɛ obɨɔ ga bɨna. Nkʉ bé a be ó be, be bʉr be esama ga lɨna nɛʼɛ, mpa bɨna ga e boo nɔɔ, bé dina ó sama, ze pyal é muh é dobo lɨ. To kœb ó, yé a kʉ jala ó, bé laŋa, to yɔɔ, yé nkʉʼ nyin é kpɛŋlɛm ó, abe e mʉr é sama yɔɔ a be é zyɛŋa ga wina.

²⁰ No ó, bɨn bɛɛ, bɨ ntɨhɔ Mbɨambɨa Sisim dumo e Waa ndɨ ti ɨ. Wé ó mpʉ mulo nye lé elœm bɨn e ma ɛ. Ebe no ó bɨn bɨbɛh mu lé egʉa ocyecye e.

²¹ Me atile bɨn e yʉʉ toŋla ó, bɨn bé ejeʼe ocyecye. Me etile bɨn ó, ebe, bɨn bɨ gʉa we. Bɨn nteme bé egʉa ó, mpʉl, nye abe e nkul eduho é l'ocyecye.

²² Zé nyɛɛ ndɨ mpʉmpʉl? Nye ó waa nyiwɛh ndɨ ekɛla ó, Yesʉs, nye abe Lœma mulo mo Zyɛm. Mʉr dɔm mo Krɨst ó nɨ! Nye ó mʉr lé ekɛla Zyɛm Sɔŋ, bâʼle kɛla Mwan mo Zyɛm ɨ.

²³ Mʉr ndɨ ekɛla ó, Yesʉs, nye abe Mwan mo Zyɛm ɨ, bé e Zyɛm Sɔŋ, bé abe nkɔm mpwar. To kœb ó, waa lé elɛɛ ó, Yesʉs, nye ó Mwan mo Zyɛm ɨ, nyiha bé e Zyɛm Sɔŋ, ndwe e Mwan mo Zyɛm, bé ó nkɔm mpwar.

²⁴ Bɨn bɛɛ, gʉa toŋlo ga mpaŋla bɨn bé a bɛa joʼo, duho é l'etɔɔrʉ ɨ. Yé be ó, mpaŋla waa, nyi loŋlo mɨleme min nɛʼɛ, lɛɛ ó, bɨn bé ókʉ di nteme é zyɛŋa win boo Mwan mo Zyɛm bé e Zyɛm Sɔŋ bɨbɛh.

²⁵ No ó, Zyɛm Sɔŋ nye mʉr tɨʼ a be ó si kɛʼ bɨna ga tiʼ molu mo mpoʼ mɨmɛh.

²⁶ Me etile bɨn bɨsa biʼ ó, tiibe e baa ndɨ e gwɨma ó, bé gomla bɨn é bebebebe zi ɨ.

²⁷ Bɨn bɛɛ, bé ó e Mbɨambɨa Sisim, waa Zyɛm a ntɨh bɨn mpʉ mulo nye lé elœm bɨn e ma ɛ. Sisim waa, wé edi é bɨn ó, di diʼe. Ebe no, bɨn bé aka gwɨm ó, mʉr ntaʼ, ze tɨe bɨn. Sisim Zyɛm a ntɨh bɨn ɨ, wé ó ndɨ eyeʼle bɨn é mɨlɔb mimyɛh—Sisim we waa, wé elɛɛ ó ocyecye, abe mpʉl—, jwɨʼ gwar e gwar mpʉ wé lé eyeʼle bɨn ɨ, jwɨʼɨ ga sikʉlʉ yaa e duu.

Bwan mo Zyɛm

²⁸ No ó, bwa o bwan bam, diʼe ga é zyɛŋa win boo Krɨst, é mbi ndɨ ó, é dobo nye óbula ze e, bɨna bé ótʉm ga monyʉl ndwe le ecyɛb ga é mih me é nkʉʼʉ. Bɨna bé aŋa bil fwon.

²⁹ Bɨna bé egʉa ga ó, Krɨst, nye ó cɨcyel mʉr. Bɨn bé ejala le egʉa nteme ó, mʉr nyiwɛh lé esa mɨmpaŋ bɨsyɛɛla ɛ, nye ó ndɨ mbyɛla mo Zyɛm.