1 Yʉanes 1 - Kálara Zyɛ̌m Edwán é mpʉ̌n

Lwib tiʼ

¹ Lɔɔ bɨh lé elɛɛ bɨn ɨ, wé etiibe ó, e Lwib, waa mu lé edwe bɨn tiʼ molu mo mpoʼ mɨmɛh ɛ. Nye a bɛa ó be, duho é l'etɔɔrʉ. Bɨh bé a si joʼo twii we, bee nteme nye e mih mɨh. Nye ó mʉr bɨh bé a siŋle, waa mobo mɨh, mé a bobo e

² —ebe, Etin e tiʼ laa, lé a si kʉ nyin é si nwa. Bɨh bɨ bee nye, bɨh ntɔʼ taare lé eboʼlo mboʼla lé etiibe e mʉr waa ɛ. Ebe no ó bɨh lé eze gʉʼ bɨn ye e tuno lé etiibe e mʉr ndɨ edwe bɨna ga tiʼ molu mo mpoʼ mɨmɛh ɛ. Bé e Zyɛm Sɔŋ ó b'a be. Nyi ze nyin é si nwa.

³ Sa bɨh bé a bee e mih mɨh, joʼo e mogwal mɨh ɨ, yé ó bɨh lé etuno bɨn nteme, é mbi ndɨ ó, bɨna nkʉʼ di ga é zyɛŋa-mɨleme. Zyɛŋa bɨna bé ósyɛŋa ga ɛ, nye óbe ó é zyɛŋa ga wina boo Zyɛm Sɔŋ bé e Mwan we Yesʉs-Krɨst.

⁴ Bɨh bé etile bɨn kalara nwaʼ ó, sʉhʉ ga yina nkʉʼ di lwɨŋla.

Zyɛm ó ndɨ myɛn

⁵ Mpaŋla Yesʉs-Krɨst a cen bɨh ó nwa. Nye ó sa bɨh lé eboʼlo bɨn ɨ. Nye ó: Zyɛm ó ndɨ myɛn. Edurʉ, lé abe ba é nye, abe ba titia.

⁶ Yé be ó, bɨna bé elɛɛ ga ó, bɨna bé ó é zyɛŋa ga wina boo nɔɔ, bɨna yɛɛ lé entime ga nɛʼɛ, lɛɛ ó, bɨna bɨ lɛɛ ga mpʉl. Bɨna bé asa ga bɨsyɛɛla lé edu ocyecye e.

⁷ Yé be ó, bɨna bé ekœʼ ga mbɨambɨa ebò e cyen é myɛn tʉŋlʉ, du mpʉ Zyɛm nye mʉr tɨʼ ndɨ é myɛn nɛʼɛ, lɛɛ ó, bɨna bé óbe ga é mpaŋ zyɛŋa-mɨleme é jɔʼ yaa. Motié mo Mwan we Yesʉs, mé ópubo bɨna ga, pɛʼ mɨsyem mimyɛh.

⁸ Yé be ó, bɨna bé elɛɛ ga ó, bɨna bé abe lé esa ga mɨsyem nɛʼɛ, lɛɛ ó, bɨna bɨ sa ga bɨgwìh. Ocyecye, wé abe é bɨna ga tʉŋlʉ.

⁹ To kœb ó, yé be ó, bɨna bé si gwih ga mɨsyem ga mina nɛʼɛ, Zyɛm ósa sa ndɨ cɨcyel ɨ, ebe, nye ó mʉr ebuʼlɔ. Nye ópɛʼ bɨbaa bɨ ebebe bibyɛh nye a niʼe bɨna ga ɛ, le epubo bɨna ga é bɨsyɛɛla bɨ ozyɛhozyɛh ga bina bibyɛh.

¹⁰ Yé be ó, bɨna bé ekɛla ga ó, bɨna bé asa ga syem nɛʼɛ, lɛɛ ó, bɨna bɨ lɛɛ ga ó, Zyɛm ó ndɨ mpʉmpʉl. Lwib ye, yé abe e ja é mɨleme ga mina.