1 Timotɛ 6 - Kálara Zyɛ̌m Edwán é mpʉ̌n

¹ Molʉa, mé ejala le enʉa omasa bɔɔ mpʉ bʉr bé lé ejala le edwaabe e. No ó bʉr nkʉʼ di, apyeh Zyɛm, nkʉ fœʼ bʉr o lé edu sikʉlʉ bɨna lé eyeʼle ga bʉr ɨ.

² No ó, molʉa ndɨ egumo e l'obuʼla ɛ, bé ajala le epyeh omasa bɔɔ ebe mboʼla bé lé ekʉ boʼlo ó, bé ó obuʼla ɛ. Mʉr, nye ejala le esea syɛɛ elʉa ye mbɨmbɨa. Nye toŋla ó: «Mʉr lé edira nyɔm e syɛɛ yam ɨ, nye ó ndɨ mbuʼla me lé ebul kpɛl ɨ.» Bɨsa biʼ ó go lé ejala le eyeʼle ndwe le etɨe bʉr ɨ.

Motɨɨ é lɔb kpɛl mɔn

³ Tî ga wina Yesʉs-Krɨst a si kʉ dwe bɨna ga mpaŋ sikʉlʉ lé eyeʼle bɨna ga mpʉ mʉr jala le edwaabe Zyɛm ɨ. Yé be ó, mʉr fih mʉr kɛ̀l, nye amɛʼle sikʉlʉ nɨ, nkʉ du ye, bula to dwe bʉr bɨsikʉlʉ bɨfih nɛʼɛ, lɛɛ ó, nye mu ó lé enkɛɛ nyʉl.

⁴ Nyɛɛ nteme agʉa sɔʼɔ. Nye dina ó lé ekʉ syɛb. Esyɛb le, lé ó lɨ: nye ekpɛl ó, njɨ epɨra mokan, le ekpɛl nteme mogo é lɔb mɨlɔɔ. Sa lé eduho tɨʼ, yé ó: zii, mpɔʼa monkɔm, movoʼ, ndwe e bɨbuʼa.

⁵ Esyɛb laa ó ndɨ esa ó, bʉr saʼ zyee lé esa mosono paʼra wɔɔ. Bé esa-sa no ó, bé e bʉʉ bʉr o ndɨ e bɨbol mɨpɛhla, baa b'a dɛʼɔ ocyecye e. Bé eniŋe ó, bé óbi-bi bɨmɔn é jɔʼ bʉr, bé ópaʼle be é mpʉ bé lé egʉa dwaabe Zyɛm ɨ.

⁶ To kœb ó, edwaabe Zyɛm lɛɛ, lé e buobuo nyɔm ó, nkʉ mʉr lé edwaabe Zyɛm ɨ, nye edwɛʼ njɨ mobi nye lé ebi-bi ɨ.

⁷ Ebe, é jɔʼ bɨna bé a byɛl ga é si nwaʼ ɛ, bɨna bé a baaze ga e sɔʼɔ. No nteme ó, é jɔʼ bɨna bé ómuno mʉa ga tɨʼ ɨ, bɨna bé aŋa be ga e nkul enʉa yʉʉ sɔʼɔ tɨ, to e ye.

⁸ No ó, é jɔʼ bɨna lé ebi ga mode, ndwe e mompor ɨ, bɨna bé ófil ga mɨleme si é jɔʼ yaa.

⁹ Bʉr, bé a tiʼe é mɨleme myɔɔ ó, bé bi ó bɨsa twiha ɛ, bé eduma é mobʉbla. Bé efwam bé bʉr o tɨʼ koko é twii. Bé emɛrɔ é mpila bɨgwɨma é buobuo. To kœb ó, bʉr o ndɨ edu bɨgwɨma byaa ɛ, bé edu ó, sa ndɨ ajwɨ̂ʼ ba, yaa ndɨ edaʼre mɨtuu é nyʉl ɨ. Bé e mbi bɨgwɨma ndɨ edimle mʉr ndwe le ejʉ nye e,

¹⁰ ebe, kpɛl mɔn, yé ó etin e bɨsa bɨ ebebe bibyɛh. Bʉʉ bʉr o b'a taare buʼla Zyɛm ɨ, bé a si bi gwɨma ebi bɨmɔn, bé ntɔʼ gʉmla é bebebebe zi waa. Bɨ daʼre mɨtuu é buobuo é monyʉl mɔɔ.

Lwimla ga dɔm mbɨmbɨa

¹¹ Gwɔɔ mʉr mo Zyɛm! Cɛra e bɨsa bɨnɨ bibyɛh. Duʼo njɨ syɛɛla ndɨ cɨcyel ɨ. Dwaaba Zyɛm, lé ejyɛʼ taa buʼo yo boo nye, le ekpɛl bʉr. Diʼe mʉr bihbe. Tala nteme njwɨr.

¹² Bɨn e bʉr lé ejyɛʼ taa buʼo yɔɔ boo Zyɛm ɨ, fwɛmla ga, tɛlɨ ga mbɨmbɨa, bɨn biʼe tiʼ molu mo mpoʼ mɨmɛh. Zyɛm a jebe go ó, go biʼe tiʼ yaa. Yé a pyal go ó, é jɔʼ go a mɛʼle ocyecye é mih mo bʉr é buobuo e.

¹³ Me elɛɛ go é mih mo Zyɛm Sɔŋ, waa lé edwe bɨsa bibyɛh tiʼ ɨ, ndwe e maa mo Yesʉs-Krɨst, mʉr a mɛʼle mbɨmbɨa é mih mo Pɔŋtos Pilat ɨ,

¹⁴ ó go duʼo etie enɨ, abe e l'ebar é mih mo Zyɛm. Mʉr beʼ l'abe e nkul etɛɛ go é yʉʉ sɔʼɔ, to pyal é dobo Tî ga wina Yesʉs-Krɨst óbula ze e.

¹⁵ Nye ónyin é jɔʼ yé ójala ó, nye nyinɨ ɨ. Nye ome ó ndɨ Njwɨɨbʉr bɨna lé egumlo ga, ndɨ Njwɨɨ ojwɨɨ le Tî otî ɨ.

¹⁶ Njɨ nye ome ó ndɨ abe e nkul edwè. Nye edi ó, é myɛn tʉŋlʉ, myɛn nuu mʉr ndɨ abe e nkul ekunbo e tɨʼ ɨ. Mʉr ngwar, nye apa bee nye. Mʉr abe e nkul ebee nteme nye. Kum, ndwe e nkul, byé dweŋɔ nye njʉmdia e njʉmdia. Amɛn.

¹⁷ Cyelɨ obil o bɨsa é mbi jɔʼ yiʼ mpene ó, bé l'ankɛɛ monyʉl. Mɨleme myɔɔ, myé l'ayi loŋlo e mbɛla é lɔb okum e l'ogbaa, sa ndɨ elaa mpʉ ngul mpaa ɛ. Bé jyɛʼɛ taa buʼo yɔɔ njɨ boo Zyɛm, waa lé epa dwe bɨna ga bɨsa byaa é ntuʼ-ntu-ntuʼ, lé egba bɨna ga bɨsʉhʉ é mɨleme e.

¹⁸ Lɛŋɨ be ó, bé saʼ embɨa. Okum wɔɔ, wé diʼe é nko paʼ mɨmpaŋ bɨsyɛɛla bé lé esa ɛ. Mɨleme, myé diʼe be é ntɨɨɨŋ ó, bé cwɨa e bʉr, lé eto gul be é zi mobi mɔɔ.

¹⁹ Bé ekomo-komo bé bʉr o tɨʼ ó, ekʉm empa, é l'efu e molu lé eze e. Bé esa no ó, bé nkʉʼ mɛr tiʼ é kpɨɨɨ, yaa ndɨ kʉ be mpaŋ tiʼ ɨ.

Vula lwib

²⁰ No ó, Timote ɛɛ! Baʼla sikʉlʉ Zyɛm a timle go e. Go à syɛhle baalwibalwiba o bʉr o ndɨ esa lɔɔ Zyɛm ebɨh ɨ, baa bʉr lé ejwɨʼ ó, bé ó «mpaŋ ngwɨa» ɛ.

²¹ Mbi ngwɨa waa, bʉʉ bʉr, bé a si mɛʼle we, bé ntɔʼ gwaʼ lé ejyɛʼ taa buʼo yɔɔ boo Zyɛm. Ncwɨncwɨa mo Zyɛm diʼe e bɨn.