1 Timotɛ 5 - Kálara Zyɛ̌m Edwán é mpʉ̌n

Syɛɛ mbuʼla lé ejala le esea ɛ

¹ ǃGo si kœb ó, tamamʉr, nyi sa gwìh nɛʼɛ, anyamle lɨl twii é jɔʼ go lé elɛʼle nye bɨgwìh nye sa ɛ. Go ejala le etɨe nye mpʉ sa cɨŋɔ ó, nye ó sɔŋ go e. É nko paʼ dor lo, tɨa be mpʉ sa cɨŋɔ ó, bɨbɛh, bé ó bɨɔ bo.

² Tɨe nteme otamabʉba mpʉ sa cɨŋɔ ó, bé ó onyɔŋ bo. Tɨe mosehe nteme mpʉ okɛl bo, lé ekœʼ e be ebò e cyen ndɨ é pememe é mih mo Zyɛm ɨ.

³ Dwaaba mɨkuho mɨ bʉba, baa ndɨ kʉ be mɨkuho myé a liʼɔ é ntɛʼɛ ɛ.

⁴ ǃƗ guu kuho, wé be e bwan, nkʉ onta nɛʼɛ, bwan be baa, bé ejala le etaare jwɨʼ lé esa syɛɛ-Zyɛm ó, é mbɛr bʉr wɔɔ tʉŋlʉ, le ebaʼle nyɔŋ wɔɔ, nkʉ nyɔŋ mpam wɔɔ. Bé nkʉʼ jɛna e l'osɔŋ le onyɔŋ ndwe e bɨmpam byɔɔ mpɔla é l'efu e bɨsyɛɛla bɛɛ, bé a pa sa be e, ebe, sa yaa, yé é mbɨa é mih mo Zyɛm.

⁵ No ó, kuho wé a liʼɔ é ntɛʼɛ ɛ, leme we, wé eka liʼ lé eloŋlo e mbɛla ó, njɨ ebe Zyɛm. Moho e pum, wé ó njɨ lé ejwɨʼla e Zyɛm é l'efu le nye mʉr tɨ, ó nye fuʼa we.

⁶ Guu mbi kuho nteme, wé ekpɛl nkul bɨtiʼ. Wiha, wi bɛa dwè, dam be ó, wé dina ó kʉ.

⁷ Lɛŋɨ be nteme ó, bé duʼo mɨlɔb mɨnɨ mimyɛh, é mbi ndɨ ó, bʉr, bé aŋa be e nkul etɛɛ be é yʉʉ sɔʼɔ.

⁸ ǃƗ nuu mʉr kʉ sa ncɨr, bene lé ebaʼle mɨmbyɛl mye, kʉ bul be bʉr o mbɛr bʉr we nɛʼɛ, nye mʉr tɨ, nyi tumo koo e buʼo ga yina. Nye é bebe, laa mʉr ndɨ abe mbuʼla ɛ.

⁹ Go ótile mʉma die é kalara mɨkuho mɨ bʉba ó, waa mu e mɨmbu mowʉm tobo e. Kuho waa, wé beʼ nteme waa wé a baʼle njʉm ngwar ɨ.

¹⁰ Go ótile kuho mʉma die ó, waa wé óbe si bul jwɨ̂ʼlɨ e mɨmpaŋ bɨsyɛɛla nye lé esa ɛ. Wé beʼ mbi mʉma wi: waa a bœʼ bwan, waa a bɨlan e l'ojyoo mbɨmbɨa, waa a jwɨ̀ɨ mɨsaŋ mɨ bʉr mokʉ, waa a kɛm bʉr o b'a bul sia e mɨtuu, le waa a gba nyʉl lé esa mɨmpaŋ bɨsyɛɛla mɨmbi mɨmbi ɨ.

¹¹ Yé óka be mɨkuho dina mosehe nkʉ mɨsile nɛʼɛ, anyamle tile mie mɔɔ é kalara mɨkuho waa, ebe, bɨgwɨma byɔɔ, byé amu ntaa be é nkul, bé ntɔʼ bene Krɨst. Bé óka saa ó, bé niʼe é guu mbɛr eba.

¹² Bé edaʼre mobe é monyʉl, ebe, bé a be ó si bɛa birɔ buʼo efoʼ yɔɔ.

¹³ No ó nteme, bé ejyɛnba lé encyehbe dobo lɨlɛh. Bé eto le eto mɨmbɛr e mɨmbɛr myɛh, njɨ lé enaa-naa bʉr. Yé abe ó, jyɛʼ yɔɔ, yé ó njɨ lɔb edi dia jwɨh. Bé esa nteme ó, mpuʼ lé egba nʉm é mɨlɔb myoonkan, le elwib bɨlwib ndɨ asiŋa ɛ.

¹⁴ Ebe no ó me lé etɨe mɨkuho mɨ bʉba dina mompɨh ó, myé toʼ é moba ɛ. Myé nkʉʼ bya bwan, le ebaʼle mɨmbɛr mɨ bʉr myɔɔ. Mʉr lé esa bɨna mongan ɨ, nye amu jaa kœb ó, mɨkuho myaa, myé edib nye zi ó, bʉr o dɔm bɨna, bé fœʼœ bɨna ga tɨ.

¹⁵ Ebe, dam be é banana, myʉʉ mɨkuho, mi gʉmla é bebebebe zi lé eto du Satan.

¹⁶ ǃƗ mbuʼla mʉma óbe e mɨmbyɛl ndɨ mɨkuho é mbɛr bʉr we nɛʼɛ, nye fuʼa mɨkuho myaa. Mbuʼla mʉma waa beʼ l'antwiŋ mbɛr Zyɛm e mbaʼla wɔɔ, ebe, mbɛr Zyɛm, wé ekʉ fuʼo mɨkuho ó, njɨ myaa ndɨ é ntɛʼɛ myé ome e.

¹⁷ Ocyɛb be efoʼ ndɨ ekœʼ e mbɛr Zyɛm mbɨmbɨa ɛ, bé ejala le ebi myɛna moba, kʉ bul be baa lé elɛɛ bʉr lɔɔ Zyɛm, le eyeʼle be e.

¹⁸ Ebe, yé ó tila é Kalara Zyɛm ó: «É jɔʼ ntɛɛ mu lé esea syɛɛ epɛʼ mɨlœla e mpʉn ɨ, apɨr ntɛɛ nʉm ó, yé l'ayi de.» Nteme: «Syɛl mosa, nye ejala le edweŋɔ myɛna me.»

¹⁹ Ajoʼo, nkʉ nʉa nkɔb é bɨtoora bʉr lé etooro ocyɛb be efoʼ o Mbɛr-Zyɛm ɨ. Fuo ka mɛʼle njɨ é jɔʼ oboʼla mu oba, nkʉ olɛl ɨ.

²⁰ Baa lé esa syem ɨ, dilɨ be si é pono, go à láa be bɨbaa bɨ ebebe byɔɔ. É jɔʼ yaa ó bʉʉ bʉr o sama yaa, bé ójoʼo bʉa lé esa syem yaa ɛ.

²¹ Me entɛŋ go mɨnkɛla é mih mo Zyɛm, le maa mo Yesʉs-Krɨst bé e beengles Zyɛm a pɛh ɛ, ó go baʼla motɨɨ ma. Atiʼe lɔb e nkar ngwar. Ato mʉr é nkɔm ebe nduula bɨn e nɔɔ ndɨ e we e.

²² Akpahbe kɛl mʉr mobo é lʉ, nkʉ sʉ nye mocyɛʼ mo mpom, ó nye cyelɔ é dia ɨ Mbɛr-Zyɛm tʉŋlʉ. ǃGo óbe si sa no nɛʼɛ, go amu jaa tœb mɨsyem myoonkan é zi waa. é nko paʼ ebò e cyen go lé ekœʼ œ, lé diʼe é pememe.

²³ Laa ó, go deʼ modibe mé ome, fuo de yɛɛ monwoʼ mo rezɛŋ ba bim, mé nkʉʼ komlo go mo ndwe le egul go é nko paʼ esyɛb go ndɨ ebaran e le e.

²⁴ Mɨsyem mɨ bʉʉ bʉr, myé asa dɨʼ. Myé ebana gʉŋɔ, bʉr baa l'apa dweŋɔ mobe. Bʉʉ bʉr bɛɛ, mɨsyem myɔɔ, myé eka gʉŋa é kpɛhla ó, njɨ é l'epihe.

²⁵ Jwɨʼ gwar e gwar yaa nteme e mɨmpaŋ bɨsyɛɛla. Byé ása dɨʼ. Byé dam di mɨfela é banana, byé ófuʼla ka beɔ.