1 Timotɛ 4 - Kálara Zyɛ̌m Edwán é mpʉ̌n

Motɨɨ Pol a dwe Timote e

¹ Mbɨambɨa Sisim, nyi lɛɛ é kpɛŋlɛm ó: é jɔʼ esie e mbi jɔʼ yi, lé óbe, lé mu kunokuno le epyal ɨ, bʉr, bé ókaŋa e buʼo ga yina, bɔʼa é bɨna ga. Bé ójoʼlo mɨmpʉmpʉl mɨ oyeʼle. Sikʉlʉ bé óka jwɨʼ ɨ, yé óbe ó njɨ yaa moleme, mé a taare kuhlo e.

² Bé óbe ó baanya-bɨkʉʉŋʉ, olɛa o mpʉl. Ebebe lɔɔ, lé ódɨ lɨr mɨleme myɔɔ ó, to pyal é jɔʼ bé óka be, bé mu aka joʼo fwon ɨ.

³ Bé ekamle bʉrʉm lé eba bʉba! Bé enyiŋ bʉr ó, bé gwaʼa lé ede mʉʉ mode. To kœb ó, Zyɛm a bɛa cye bɨsa byaa ó, é l'efu ó, byé ó mode jala le edɨɨ ɨ! Bʉr o ndɨ egʉa ocyecye é kpɛhla, le ebuʼla we e, bé óde mode maa ó, de-de deʼ, lé edwe Zyɛm ekiba tɨ,

⁴ ebe, sa yiyɛh Zyɛm a cye e, yé é mbɨa. Jɨh tɨʼ mʉr, nyi jwɨʼla e nye, lé edwe nye ekiba é lɔb mode e, ebebe, lé aka be tɨ. Mʉr, nye ajala le eka til nye ya,

⁵ ebe, lwib mo Zyɛm le mɨnjwɨʼla, bi bɛa pub ye.

Mpʉ Yesʉs lé eze bɨna ga é nkɔm ɨ

⁶ ǃGo óntɛŋ-ntɛŋ obuʼla sikʉlʉ yiʼ nɛʼɛ, go óbe ó mpaŋ syɛl mosa mo Yesʉs-Krɨst! Go óyeʼle mɨlɔb mɨ buʼo ga yina é zi waa, le edwe mpaŋ sikʉlʉ go a bɛa jwɨʼ é jɔʼ go a be é l'oncyom go e.

⁷ Go ajala le ejoʼo bɨsa mɨlɔɔ, myaa otamabʉba lé esa-sa ɛ. Pɨʼɨ go mʉr tɨʼ é l'efu ó, go dwaaba Zyɛm.

⁸ Ebe, pɨʼa nyʉl wɛɛ, wé ó e ma nyɔm é guu paʼ. Edwaabe Zyɛm lɛɛ, lé e nyɔm é nko paʼ bɨsa bibyɛh, ebe, mʉr lé edwaabe Zyɛm ɨ, Zyɛm ódira monkɛʼ nye a liʼe mʉr waa e ma ɛ, é nko paʼ tiʼ yaa banana, to pyal é tiʼ yé óbe pie e l'esie e mbi jɔʼ yi.

⁹ Lɔɔ wi, wé ó lɔɔ ebuʼla, le waa bʉr bɨbɛh ndɨ ejala le enʉa, gba é nkɔb ɨ. Wé ó:

¹⁰ Zyɛm wina ndɨ kublakubla ɛ, a si kʉ gba bɨna mbɛla é mɨleme. Nye ó waa ndɨ Tiʼbʉr é l'efu e bɨkul bibyɛh, kʉ bul be baa ndɨ obuʼla ɛ. Lɔɔ waa wé ome ó lé esa ó, bɨh jaʼra e mɨtuu bɨsyɛɛ, ndwe le efwɛmla ɛ.

¹¹ Lɛŋɨ bʉr ó, bé duʼo mɨlɔb mɨnɨ. Go à dwe be sikʉlʉ tɨ.

¹² Anyamle mɛʼle ó, mʉr pyehɨ go ebe go dina ma soho. Obuʼla, bé ejala le enʉa dweʼle tiʼ yo lé ejoʼo lwib yo ndwe le egʉa leme ncwɨncwɨa go, buʼo yo, ndwe é mpʉ go lé ekœʼ ebò e cyen é pememe é mih mo Zyɛm ɨ.

¹³ To pyal é jɔʼ me óze gʉʼ go ye e, gbaʼ nyʉl lé eláa Kalara Zyɛm é pono, ndwe le egba bʉr nkul é monyʉl ndwe le eyeʼle be.

¹⁴ Anyamle pyeh ndwɛa go, waa Zyɛm a dwe go é jɔʼ ocyɛb be efoʼ o mbɛr Zyɛm win, bé a kɛl go mobo, le egwih mɨlɔb mo Zyɛm é l'efu lo e.

¹⁵ Saʼ zyee lé eloŋlo bɨsyɛɛla byaa, le egba nyʉl tɨʼ é dwiii. No ó bʉr bɨbɛh, bé óbee mpʉ go óto dolo lé esea bye e.

¹⁶ Gʉa dwɛʼ go mʉr tɨʼ ndwe e mbi sikʉlʉ go lé eto le edwe bʉr ɨ. Dɨʼe sa zyee lé edu mɨlɔb mɨnɨ. ǃGo si sa no nɛʼɛ, go ótiʼ go mʉr tɨ, tiʼ nteme baa lé ejoʼlo go e.