1 Timotɛ 3 - Kálara Zyɛ̌m Edwán é mpʉ̌n

Ocyɛb be efoʼ o mbɛr Zyɛm

¹ Lɔɔ wi, wé ó lɔɔ ebuʼla: ǃɨ mʉr be lé egwɨm ó, nye diʼe mbɔʼlʉ é mbɛr Zyɛm nɛʼɛ, nye egwɨm sa mbɨambɨa syɛɛ.

² Ebe no, yé ejala ó, nye diʼe mʉr bé ndɨ abe e nkul etɛɛ ɛ. Yé ejala ó, nye diʼe njɨ e mʉma ngwar. Yé ajala ó, mbɔʼlʉ mbɛr Zyɛm, nye fwaʼa monwoʼ. Nye kœʼœ ebò e cyen é mpaŋ pɨʼ. Nye diʼe mʉr ndɨ e modile e. Nye diʼe mʉr lé ebɨlan e l'ojyoo, waa lé egʉa dwe bʉr sikʉlʉ ɨ,

³ abe nunwoʼ, nkʉ mʉr ndɨ é feha ɛ. Nye ejala le ebe ó é tala njwɨr. Nye abe mʉr bɨtom. Nye alaʼ lʉ é kpɛl mɔn.

⁴ Yé ejala ó, mbɔʼlʉ mbɛr Zyɛm, nye beʼ mʉr lé egʉa kœʼ e mbɛr bʉr we e. Bwan be, bé ejala le edwaabe nye, le esa nye mojoʼo é mozi mɨmɛh.

⁵ Ebe, ǃɨ mʉr baagʉa ekœʼ e mbɛr bʉr we nɛʼɛ, a nye e nkul ekœʼ e mbɛr Zyɛm wáa mbi?

⁶ Yé ajala ó, nye beʼ mʉr lwanbe gwɨma ebebe le edwir leme, ni é buʼo e. Yé amu jaa sa ó, nye diʼe e nkɛa nyʉl. ǃNye si sa no nɛʼɛ, nye òfuʼla ó, duma, Njwɨɨ moleme ntɔʼ taare lé edwe nye mobe tɨ.

⁷ Yé ekʉ jala ó, nye dweŋɔ duu boo bʉr o ndɨ abuʼla ɛ, ebe, ǃnye si kwɨa é l'eboʼo mo Njwɨɨ moleme nɛʼɛ, nye amu sɔma é mih mɔɔ.

Odiakɔn

⁸ Jwɨʼ gwar e gwar yaa nteme, odiakɔn, bé ejala le etiʼe é modile, abe e l'alwiblwib. Bé ajala le elɔʼba é monwoʼ, nkʉ saa bɨmɔn byɔɔ é mozi ndɨ ozyɛhozyɛh ɛ.

⁹ Yé ejala ó, bé gʉa baʼle lwib odim o buʼo ga yina e mɨpɛhla mɨ leme ndɨ é pyɛɛɛ ɛ.

¹⁰ Yé ejala ó, bɨn taara pahle be, bé l'apa sea syɛɛ odiakɔn. ǃBé si pahlɔ, é pahlɔ, pahlɔ, adweŋɔ mobe nɛʼɛ, bé óbe e nkul eka ni é syɛɛ odiakɔn é jɔʼ yaa.

¹¹ Bʉba bɔɔ nteme, bé ejala le ebe ó e modile, abe lé efœʼ bʉr. Bé ajala le efwaʼ monwoʼ. Bé ejala le ebe ó bʉr be ebuʼla é mɨpaʼ mimyɛh.

¹² Diakɔn diʼe njɨ e mʉma ngwar. Odiakɔn, bé ejala le egʉa jwɨ̀ʼ nteme bwan bɔɔ, le ekœʼ e mɨmbɛr mɨ bʉr myɔɔ mbɨmbɨa.

¹³ Baa ndɨ ekʉ sea e bʉr mbɨmbɨa ɛ, bé ófuʼla dweŋɔ duu tɨ. Bé óto dolo lé ebuʼla lɔɔ lé etiibe e Yesʉs-Krɨst ɨ, le enʉa pim é buʼo yaa.

Buʼo ga yina

^14-15 Me etile go kalara nwaʼ ó, me ndɨ ekʉ gʉa ó, me mu ó kunokuno le eze bee go gʉ. Sa gwar, ǃme baalɨ pyal, ze kœb go nɛʼɛ, go nkʉʼ gʉa ebò e cyen mʉr Mbɛr-Zyɛm jala le ekœʼ œ. Mbɛr-Zyɛm waa, wé ó esama e bʉr o ndɨ baa mo Zyɛm ndɨ kublakubla ɛ. Ocyecye mo Zyɛm, wé ecyɛb é nkʉʼʉ ó, ebe, Mbɛr-Zyɛm ó ndɨ mpʉ edwii e sɔŋ ndwe e nkan tɨ.

¹⁶ Yé ejala ó, buʼo yina, yaa ndɨ é lwib odim ɨ, yé é laŋle bwaʼ. Yé ó: «Nye a ze nyin é si nwaʼ ó e nyʉl bɨpuno. Mbɨambɨa Sisim ze lɛʼle bɨna ga nya, bɨna gʉŋa ga ó, nye abe e mobe. Beengles, bé a si siŋle nye. Bʉr o bɨkul bɨfih, bé a si joʼo lɔɔ lé etiibe e nye e. Bʉr o si nwa, bé a si jyɛʼ taa buʼo yɔɔ boo nye. Nye a si to é jobo kʉ, é fum nye a dweŋɔ kum ɨ.»