1 Timotɛ 2 - Kálara Zyɛ̌m Edwán é mpʉ̌n

Mɨnjwɨʼla é l'efu e bʉr bɨbɛh

¹ Ebe no, sa efoʼ me lé ejwɨʼla e go e, yé ó, go saʼ mɨnjwɨʼla é l'efu e bʉr bɨbɛh. Go jaʼa Zyɛm sa yiyɛh é l'efu e bʉr ofih, le ndwɛa ekiba nteme.

² Saʼ Zyɛm mɨnjwɨʼla nteme é l'efu e mɨnjwɨɨbʉr ndwe e baa bɨbɛh ndɨ e nkul mojwɨ̀ʼa ɛ. Ebe no ó bɨna bé ódi ga é motala, abe e ntɨʼa ɛ. É bɨtiʼ ga bina, bɨna bé ódwaabe ga Zyɛm le edwiibɨ nye.

³ Zyɛm, Tiʼbʉr ga wina, nye ebee syɛɛla yaa mbɨmbɨa.

⁴ Nye ekpɛl ó, bʉr bɨbɛh biʼe tiʼ molu mo mpoʼ mɨmɛh, le egʉa mɨlɔb ndɨ cyecye e.

⁵ Ebe, Zyɛm, nye ó njɨ ngwar. No nteme ó, bʉr, bé e mosàa-mɔm ngwar lé eduula paʼra bʉr bé e boo Zyɛm ɨ. Nye mʉr tɨ, nye ó mʉr: Yesʉs-Krɨst.

⁶ Nye ó b'a kɛha tiʼ ye lé ejala e mobebe mo bʉr bɨbɛh, le ekʉr be e. No ó, mboʼla waa, wé a lɛɔ ó, njɨ é jɔʼ wé a jala le elɛɔ ɛ.

⁷ Zyɛm ze cyel me é bɨdia bɨba: yaa cyela mɨtuno, ndwe e yaa lʉmlʉ we—me ekʉ lɛɛ ó ocyecye; me alɛɛ mpʉl—, me ó yeʼle mɨlɔb mo Zyɛm é l'efu e bʉr o ndɨ abe oYʉden ɨ, lé elɛʼle be é zi buʼo ga yina le ocyecye mo Zyɛm.

⁸ Ebe no ó me lé ekpɛl ó, é gumo yiyɛh, bʉrʉm puba bé bʉr o tɨ. Bé òjwɨʼla, abe e l'empime é mɨleme. Bé beʼ l'asa mosono paʼra wɔɔ.

⁹ Me ekpɛl nteme ó, bʉba bwara mompor mompa, lé efol ofwah wɔɔ. Bé diʼe e pɨʼ é lɔb waa. Bé ajala le ebe e mɨsine mɨ jaale, nkʉ e bɨnkoho bɨ gol mɨfwama é mpine, nkʉ e mɨkan le mɨndwe ndɨ é buo tɔɔ ɛ.

¹⁰ Bé ejala le elɛʼle bʉr ó, bé e bɨsyɛɛla bɨ ncwɨncwɨa lé ejala e bʉba lé edwaabe Zyɛm ɨ.

¹¹ Yé ejala ó, mʉma diʼe njɨ é puuu lé ejoʼlo sikʉlʉ yina, le duu yiyɛh.

¹² Me adwe nkul ó, mʉma dweʼ bʉr sikʉlʉ. Me alɛɛ ó, nye diʼe e nkul mojwɨ̀ʼa é bʉrʉm. Nye ódi-di sa ye ó, njɨ é puuu... joʼlo.

¹³ Ebe, Adam ó b'a taare cyeŋɔ; pie tɨ, Efa.

¹⁴ Ntʉʼ Adam a duma é bɨkʉʉŋʉ. Mʉma ó b'a taare gʉmla é bebebebe zi, nye ntɔʼ di ntɔɔ etie.

¹⁵ Nye óbi yɛɛ tiʼ molu mo mpoʼ mɨmɛh é l'ebya nye lé ebya ɛ, nkʉ nye ójyɛʼ taa buʼo ye boo Zyɛm, le ekpɛl bʉr, ndwe le ebaʼle bé bʉr o tɨʼ ti. Bé diʼe e pɨʼ é lɔb waa.